HHVM : ‘హరిహర వీరమల్లు’ కామెడీ మూవీగానా.. డైరెక్టర్ షాకింగ్ కామెంట్స్

HHVM : పవన్ కల్యాణ్ నటించిన భారీ పీరియాడికల్ చిత్రం ‘హరిహర వీరమల్లు’ ప్రస్తుతం థియేటర్లలో సందడి చేస్తోంది. సినిమా విడుదలైన తర్వాత దీనిపై కొత్త కొత్త ఆసక్తికర విషయాలు బయటకు వస్తున్నాయి. ముఖ్యంగా ఈ చిత్రానికి దర్శకత్వం వహించిన జ్యోతికృష్ణ తాజాగా చేసిన వ్యాఖ్యలు ఫ్యాన్స్‌ను ఆశ్చర్యానికి గురి చేస్తున్నాయి. ఒక ఇంటర్వ్యూలో మాట్లాడుతూ, ఈ సినిమా మొదట్లో కామెడీ ఎలిమెంట్స్‌తో కూడిన కథగా ఉండేలా ప్రణాళిక వేసినట్లు ఆయన వెల్లడించారు.

జ్యోతికృష్ణ మాట్లాడుతూ, ‘‘ఈ కథ మొదటగా డైరెక్టర్ క్రిష్ రాశారు. కోహినూర్ వజ్రాన్ని దొంగిలించే అంశాన్ని ఆధారంగా చేసుకుని కొంత కామెడీ షేడ్ ఉన్న మూవీగా రూపొందించాలనుకున్నారు. మేమంతా అదే ఆలోచనతో ఈ ప్రాజెక్ట్‌ను స్టార్ట్ చేశాం. కానీ ఈ విషయాన్ని ఇన్ని రోజులు గోప్యంగా ఉంచాము. ఇప్పుడు సినిమా థియేటర్లలో రిలీజ్ అయిన తర్వాత దీన్ని చెప్పడంలో ఇబ్బంది లేదని భావించాను’’ అని తెలిపారు.

జ్యోతికృష్ణ చెప్పిన ప్రకారం, సినిమా ప్రారంభం తరువాత మొదటి యాక్షన్ ఎపిసోడ్ పూర్తి అయిన వెంటనే కరోనా ఫస్ట్ వేవ్ వచ్చింది. దాంతో షూటింగ్ ఆగిపోయింది. ఆ తర్వాత మళ్లీ సెట్స్ మీదకు వచ్చి మరో యాక్షన్ ఎపిసోడ్ తీశాక కరోనా సెకండ్ వేవ్ కారణంగా మరోసారి బ్రేక్ వచ్చింది. ఈ గ్యాప్‌లో సినిమాకు సంబంధించిన మొత్తం ప్లానింగ్ మారిపోయిందని ఆయన తెలిపారు.

ఆ తర్వాత పవన్ కల్యాణ్ రాజకీయ, ఎన్నికల కార్యక్రమాలతో బిజీ అయ్యారని జ్యోతికృష్ణ చెప్పారు. ‘‘క్రిష్ మా కోసం చాలా కాలం వెయిట్ చేశారు. కానీ అనుకోకుండా ప్రాజెక్ట్ నుంచి తప్పుకున్నారు. ఆ సమయంలో ఈ కథ నా దగ్గరికి వచ్చింది’’ అని ఆయన పేర్కొన్నారు.

జ్యోతికృష్ణ మాట్లాడుతూ, ‘‘ఇంత భారీ బడ్జెట్ ఉన్న పీరియాడికల్ మూవీని కామెడీ మోడ్‌లో తీయడం సరైనది కాదని అనిపించింది. అందుకే నేను సనాతన ధర్మం, చరిత్రాత్మక అంశాలు, యాక్షన్ డ్రామా వైపు స్క్రిప్ట్‌ను మలిచాను. ఈ సినిమా రెండు భాగాలుగా రూపొందించాలని పవన్ కల్యాణ్‌తో చెప్పాను. ఆయన వెంటనే ఆలోచనకు అంగీకరించారు. మొదటి పార్ట్‌లో ఎక్కువ భాగం నేను రాసుకున్న కథ ఉంటుంది. రెండో పార్ట్‌లో క్రిష్ రాసిన కోహినూర్ వజ్రం దొంగిలించే కథని కొనసాగిస్తాం’’ అని తెలిపారు.

జ్యోతికృష్ణ ఈ ప్రకటనలు పవన్ కల్యాణ్ అభిమానులను ఆశ్చర్యపరుస్తున్నాయి. ‘‘ఇంత భారీ బడ్జెట్ పీరియాడికల్ మూవీలో కామెడీ మోడ్‌ను ప్రయత్నించడం ఎందుకు?’’ అని ఫ్యాన్స్ ప్రశ్నిస్తున్నారు. అయితే, జ్యోతికృష్ణ చెప్పిన విధంగా సనాతన ధర్మాన్ని, యాక్షన్ ఎపిసోడ్‌లను ప్రాధాన్యం ఇచ్చి రూపొందించిన కొత్త కథా దిశ ఫ్యాన్స్‌కు బాగా నచ్చుతుందని ఆయన నమ్మకం వ్యక్తం చేశారు.

Insurance : రైతుల కోసం అద్భుతమైన పథకం..ఎరువులు కొంటె రూ.2 లక్షల భీమా