Chiranjeevi Diwali Celebrations : మెగా సంబరాలకు బాలయ్యకు ఆహ్వానం అందలేదా..?

దేశవ్యాప్తంగా వెలుగుల పండుగ దీపావళి ఘనంగా జరుపుకుంటున్న వేళ, టాలీవుడ్‌లో మెగాస్టార్ చిరంజీవి ఇంట జరిగిన వేడుకలు ప్రత్యేక ఆకర్షణగా నిలిచాయి. ప్రతి ఏడాది చిరంజీవి తన కుటుంబ సభ్యులు, సినీ మిత్రులతో కలిసి ఈ పండుగను జరుపుకుంటారు. ఈసారి కూడా ఆయన తన సతీమణి సురేఖతో కలిసి అతిథులను ఆప్యాయంగా స్వాగతించారు. చిరంజీవి నివాసంలో వెలుగులు, పూలతో అలంకరించిన ప్రాంగణం పండుగ వాతావరణాన్ని మరింత అందంగా మార్చింది. ఈ వేడుకలకు హాజరైన సినీ ప్రముఖుల ఫోటోలు, వీడియోలు సోషల్ మీడియాలో వైరల్ అవుతున్నాయి. అభిమానులు తమ ఇష్టతారలు ఒకే చోట కనిపించడాన్ని ఆనందంగా స్వాగతిస్తున్నారు.

ఈ వేడుకలకు అక్కినేని నాగార్జున, విక్టరీ వెంకటేష్, లేడీ సూపర్ స్టార్ నయనతార వంటి పలువురు టాలీవుడ్ ప్రముఖులు హాజరై సందడి చేశారు. మెగాస్టార్ ఇంట జరిగిన ఈ వేడుకలు “సినీ కుటుంబ సమ్మేళనం”లా కనిపించాయి. చిరంజీవి తన సోషల్ మీడియా ఖాతాలో పంచుకున్న ఫోటోలు అభిమానులను ఉత్సాహపరిచాయి. ఆయన ట్వీట్‌లో “మన స్నేహితులు, ప్రియమైన వారు వచ్చి ఈ పండుగకు మరింత వెలుగు తీసుకువచ్చారు. ఇది నాకు కుటుంబం లాంటిది” అంటూ భావోద్వేగంగా పేర్కొన్నారు. అయితే ఈ పండుగ వేడుకల్లో చిరంజీవి, నాగార్జున, వెంకటేష్ ఒకే ఫ్రేమ్‌లో కనిపించగా, నందమూరి బాలకృష్ణ గైర్హాజరు కావడం మాత్రం సినీ వర్గాల్లో చర్చనీయాంశమైంది.

తాజాగా అసెంబ్లీలో చిరంజీవిపై బాలకృష్ణ చేసిన విమర్శలు ఇంకా చల్లారకముందే, ఈ వేడుకల్లో ఆయన దూరంగా ఉండడం అనేక ఊహాగానాలకు దారితీసింది. బాలకృష్ణకు ఆహ్వానం అందలేదా? లేక అందినా రావడాన్ని మానేశారా? అనే ప్రశ్నలు సోషల్ మీడియాలో చర్చనీయాంశంగా మారాయి. “మా బ్లడ్ వేరు, మా బ్రీడ్ వేరు” అని బాలకృష్ణ గతంలో చేసిన వ్యాఖ్యలు మళ్లీ నెటిజన్ల మధ్య వైరల్ అవుతున్నాయి. టాలీవుడ్ నాలుగు ప్రధాన స్తంభాలు — చిరంజీవి, నాగార్జున, వెంకటేష్, బాలకృష్ణ — ఒకే ఫ్రేమ్‌లో కనిపించకపోవడం అభిమానుల్లో నిరాశ కలిగించింది. అయినప్పటికీ, మెగాస్టార్ ఇంట జరిగిన ఈ దీపావళి వేడుకలు గ్లామర్, స్నేహం, ఆనందంతో నిండిన “స్టార్ ఫెస్టివల్”గా నిలిచిపోయాయి.