US-Iran Talks: అమెరికా- ఇరాన్ మధ్య కొనసాగుతున్న యుద్ధ వాతావరణం మధ్య ఒక కీలక పరిణామం చోటుచేసుకుంది. పాకిస్థానీ వర్గాల సమాచారం ప్రకారం.. ఇరు దేశాల మధ్య రెండో రౌండ్ చర్చలు బుధవారం (22 ఏప్రిల్ 2026) ప్రారంభం కానున్నాయి. చర్చలు సరైన దిశలోనే సాగుతున్నాయని, నిర్ణీత షెడ్యూల్ ప్రకారమే తదుపరి రౌండ్ జరుగుతుందని పేరు వెల్లడించడానికి ఇష్టపడని ఒక పాకిస్థానీ అధికారి రాయిటర్స్ సంస్థకు తెలిపారు.
ట్రంప్ భాగస్వామ్యంపై ఉత్కంఠ
ఒకవేళ ఈ చర్చల్లో ఏదైనా ఒప్పందం కుదిరితే అందులో అమెరికా అధ్యక్షుడు డోనాల్డ్ ట్రంప్ కూడా పాల్గొనే అవకాశం ఉందని సదరు వర్గాలు సూచించాయి. ఆయన నేరుగా లేదా వర్చువల్ (ఆన్లైన్) మాధ్యమం ద్వారా ఈ చర్చల్లో భాగస్వామి కావచ్చు. మొదటి రౌండ్ చర్చల్లో ఎటువంటి స్పష్టమైన ఫలితం రాకపోవడంతో ఇప్పుడు అందరి దృష్టి ఈ రెండో రౌండ్ చర్చలపైనే నెలకొంది. ఈ దౌత్యపరమైన ప్రయత్నాలు సఫలమై శాంతి దిశగా అడుగులు పడతాయా లేదా అన్నది వేచి చూడాలి.
Also Read: సీఎస్కేకు గుడ్ న్యూస్.. స్టార్ ప్లేయర్ ఎంట్రీ!
హోర్ముజ్ జలసంధి వద్ద తీవ్ర ఉద్రిక్తత
మరోవైపు అంతర్జాతీయంగా అత్యంత కీలకమైన ‘స్ట్రెయిట్ ఆఫ్ హోర్ముజ్’ ప్రాంతంలో పరిస్థితులు ఆందోళనకరంగా ఉన్నాయి. ఇటీవల అమెరికా ఒక ఇరాన్ నౌకను స్వాధీనం చేసుకోవడంపై ఇరాన్ తీవ్రంగా స్పందించింది. ఇది అత్యంత దూకుడు చర్య అని ఇరాన్ అభివర్ణించడంతో ఇరు దేశాల మధ్య సంబంధాలు మరింత క్షీణించాయి.
ప్రపంచ చమురు సరఫరాలో దాదాపు 20 శాతం వాటా ఈ హోర్ముజ్ జలసంధి గుండానే జరుగుతుంది. అమెరికా గనుక తన దిగ్బంధనాన్ని కొనసాగిస్తే ఈ సముద్ర మార్గాన్ని పూర్తిగా మూసివేస్తామని ఇరాన్ హెచ్చరించింది. ఒకవేళ ఇరాన్ ఈ మార్గాన్ని మూసివేస్తే దాని ప్రభావం కేవలం ఆ ప్రాంతానికే పరిమితం కాకుండా ప్రపంచవ్యాప్తంగా చమురు సరఫరా, ధరలపై తీవ్ర ప్రభావం చూపే అవకాశం ఉంది.