Ahmedabad : గుజరాత్‌లోని అహ్మదాబాద్ నగరంలో జూన్ 12న ఓ విషాదకర సంఘటన చోటు చేసుకుంది. అహ్మదాబాద్ అంతర్జాతీయ విమానాశ్రయం నుండి లండన్ గ్యాట్‌విక్ దిశగా బయలుదేరిన ఎయిర్ ఇండియా విమానం (ఫ్లైట్ AI171), టేకాఫ్ అయిన కొన్ని నిమిషాల్లోనే మేఘానగర్ ప్రాంతంలోని బీజే మెడికల్ కాలేజీ హాస్టల్ భవనంపై కూలిపోయింది. ఈ ప్రమాదంలో విమానంలో ఉన్న ప్రయాణికులు, సిబ్బంది తో పాటు భవనంలో ఉన్న మెడికల్ విద్యార్థులు, డాక్టర్లు కూడా ప్రాణాలు కోల్పోయారు. ఈ విమానంలో మొత్తం 242 మంది ప్రయాణికులు ఉన్నారు. అందులో 169 మంది భారతీయులు, 53 మంది బ్రిటిష్, 7 మంది పోర్చుగీస్, 1 కెనడియన్ పౌరులు ఉన్నారని ఎయిర్ ఇండియా ప్రకటించింది. విమాన సిబ్బంది సంఖ్య 12గా నిర్ధారించారు. ప్రమాదం జరిగిన వెంటనే భారీ మంటలు చెలరేగగా, ఆకాశాన్ని నల్లటి పొగలు కమ్మేసాయి. విమానం కూలిన శబ్దం మైళ్ల దూరం వరకు వినిపించిందని ప్రత్యక్షసాక్షులు తెలిపారు.
Read Also: Ahmedabad Plane Crash: కుప్ప‌కూలిన విమానం.. ఎయిర్ ఇండియా రియాక్ష‌న్ ఇదే!
ఈ ప్రమాదం అహ్మదాబాద్ హార్స్ క్యాంప్ సమీపంలో, సివిల్ హాస్పిటల్ దగ్గరలో జరిగింది. విమానం హాస్టల్ బ్లాక్‌పై కూలడంతో లోపల ఉన్న ఎంబీబీఎస్ విద్యార్థులు, ఇంటర్న్ డాక్టర్లు మంటల్లో చిక్కుకుని మరణించారు. ప్రాథమిక అంచనాల ప్రకారం, కనీసం 20 మంది వరకు విద్యార్థులు మృతిచెందినట్లు తెలుస్తోంది. ఇప్పటికీ మరణాలపై అధికారిక ధృవీకరణ రాలేదు. ప్రమాద సమాచారం తక్షణమే ఎయిర్ ఇండియా సోషల్ మీడియా ప్లాట్‌ఫారమ్ ‘ఎక్స్’ (మునుపటి ట్విట్టర్) ద్వారా వెల్లడించబడింది. ఫ్లైట్ AI171 అహ్మదాబాద్ నుండి లండన్ గ్యాట్‌విక్‌కు వెళ్తుండగా జూన్ 12న ప్రమాదానికి గురైంది. మేము వివరాలు సేకరిస్తున్నాము. తదుపరి సమాచారం మా వెబ్‌సైట్ మరియు సోషల్ మీడియా పేజ్‌లలో అందుబాటులో ఉంటుంది.
విమానం కూలిన వెంటనే, అగ్నిమాపక దళాలు, వైద్య బృందాలు, రెస్క్యూ టీములు ఘటనా స్థలానికి చేరుకున్నాయి. గాయపడిన వారిని సమీపంలోని ఆసుపత్రులకు తరలించారు. సహాయక చర్యలు ఇప్పటికీ కొనసాగుతున్నాయి. భవన శిథిలాల్లో చిక్కుకున్నవారిని వెలికితీసేందుకు గట్టిగా ప్రయత్నాలు కొనసాగుతున్నాయి. ఈ ఘటనపై కేంద్ర హోంమంత్రి అమిత్ షా, గుజరాత్ ముఖ్యమంత్రి భూపేంద్ర పటేల్‌తో మాట్లాడి వివరాలు తెలుసుకున్నారు. కేంద్ర ప్రభుత్వం తరఫున అన్ని రకాల సహాయ సహకారాలను అందిస్తామని హామీ ఇచ్చారు. ఈ ప్రమాదం దేశవ్యాప్తంగా విషాదాన్ని నింపింది. నిస్సహాయంగా ప్రాణాలు కోల్పోయినవారిలో మనకు ప్రాణం పోసే డాక్టర్లు ఉండటమే కాదు, మెడికల్ విద్యార్థుల భవిష్యత్తులు నాశనం కావడంతో వైద్య సోదరభావంలో తీవ్ర ఆవేదన వ్యక్తమవుతోంది. బాధితుల కుటుంబాలకు భారత ప్రభుత్వం, ఎయిర్ ఇండియా తగిన నష్టపరిహారం ప్రకటించే అవకాశం ఉంది.