తెలంగాణ ముఖ్యమంత్రి రేవంత్ రెడ్డి చట్టపరమైన అంశాల్లో రాజీ పడకుండా వ్యవహరిస్తున్నారని కాంగ్రెస్ నాయకులు కార్యకర్తలు అభిప్రాయపడుతున్నారు. పదవి, పార్టీ, రాజకీయ హోదా ఏదైనా సరే.. చట్టాన్ని ఉల్లంఘించిన వారిపై చర్యలు తీసుకోవడంలో ప్రభుత్వం వెనుకాడటం లేదని వారు అంటున్నారు. నేరారోపణలు ఎదుర్కొంటున్న వ్యక్తుల విషయంలో ప్రభుత్వం చట్ట ప్రక్రియను అనుసరిస్తోందని, విచారణ సంస్థలు స్వతంత్రంగా పనిచేసేలా అవకాశాలు కల్పిస్తోందని పేర్కొంటున్నారు. ఇటీవల వివిధ రాజకీయ పార్టీలకు చెందిన నాయకులపై నమోదైన కేసులు, అరెస్టులను ఉదాహరణగా చూపిస్తూ, చట్టం ముందు అందరూ సమానమే అన్న సూత్రాన్ని ప్రభుత్వం అమలు చేస్తోందని కాంగ్రెస్ నేతలు చెబుతున్నారు.
మహిళల భద్రత, ప్రజల రక్షణ, ప్రభుత్వ ఆస్తుల సంరక్షణ వంటి అంశాల్లో ప్రభుత్వం కఠిన వైఖరిని అవలంబిస్తోంది. చట్టవ్యతిరేక కార్యకలాపాలు, హింసాత్మక ఘటనలు లేదా నేరారోపణలు ఎదుర్కొంటున్న వారిపై చట్టపరమైన చర్యలు తీసుకోవడం కొనసాగుతుందని పేర్కొంటున్నారు. అయితే ఏ వ్యక్తిపైనా నమోదైన కేసులు లేదా ఆరోపణలు కోర్టులో నిరూపితమయ్యే వరకు వారు నిందితులుగానే పరిగణించబడతారని, తుది నిర్ణయం న్యాయస్థానాలదేనని న్యాయ నిపుణులు గుర్తు చేస్తున్నారు. కాంగ్రెస్ వర్గాలు మాత్రం “చట్టం తన పని తాను చేసుకోవాలి, న్యాయం అందరికీ సమానంగా జరగాలి” అనే విధానాన్నే రేవంత్ రెడ్డి ప్రభుత్వం అనుసరిస్తోందని చెబుతున్నాయి.