సినిమాలు పైరసీ చేసి వెబ్‌సైట్లలో అప్‌లోడ్ చేసిన ఐబొమ్మ కేసులో నాంపల్లి కోర్టు కీలక ఆదేశాలు జారీ చేసింది. ఈ కేసులో అరెస్ట్ అయిన ఇమ్మడి రవిని.. పోలీస్ కస్టడీకి అప్పగిస్తూ ఉత్తర్వులు ఇచ్చింది. అయితే పోలీసులు ఏడు రోజుల కస్టడీకి ఇవ్వాలని కోరగా.. కోర్టు 5 రోజులకు మాత్రమే అనుమతి ఇచ్చింది. ఈ క్రమంలోనే ఇప్పటికే ఈ కేసులో చాలా వివరాలను రాబట్టిన పోలీసులు.. అతడిని కస్టడీలోకి తీసుకుని మరిన్ని వివరాలు రాబట్టాలని చూస్తున్నారు.
తెలుగు రాష్ట్రాల్లో పెను సంచలనం రేపిన ఐబొమ్మ ఇమ్మడి రవి కేసులో.. కీలక పరిణామం చోటు చేసుకుంది. కొత్త సినిమాలు విడుదల కాగానే, ఓటీటీ ప్లాట్‌ఫామ్‌లలో రిలీజ్ కాగానే.. పైరసీ చేసి.. ఐబొమ్మ, బప్పం టీవీ సహా పలు వెబ్‌సైట్లలో అప్‌లోడ్ చేస్తూ.. డబ్బులు సంపాదిస్తున్న ఇమ్మడి రవిని ఇప్పటికే పోలీసులు అరెస్ట్ చేసిన సంగతి తెలిసిందే. భారత పౌరసత్వం వదులుకుని.. కబీరియన్ దీవుల్లో అక్కడి పౌరసత్వం తీసుకుని.. అక్కడే లగ్జరీ లైఫ్ అనుభవిస్తున్న ఇమ్మడి రవి .. ఇటీవలె భారత్‌కు రావడంతో.. అతడ్ని ట్రాక్ చేసి.. పట్టుకుని అరెస్ట్ చేశారు. ఈ క్రమంలోనే తాజాగా అతడిని హైదరాబాద్‌‍లోని నాంపల్లి కోర్టులో హాజరు పరిచారు.
ఈ క్రమంలోనే ఐబొమ్మ కేసులో అరెస్ట్ అయిన ఇమ్మడి రవిని పోలీస్ కస్టడీకి అనుమతిస్తూ నాంపల్లి కోర్టు ఆదేశాలు జారీ చేసింది. రెండు తెలుగు రాష్ట్రాల్లో సంచలనం రేపిన ఈ పైరసీ మూవీ రాకెట్‌‌లో కీలక సూత్రధారిగా ఉన్న ఇమ్మడి రైవిని సైబర్‌ క్రైమ్‌ పోలీసులు అరెస్ట్ చేశారు. అయితే ఈ కేసులో మరింత లోతైన విచారణ జరిపేందుకు ఇమ్మడి రవిని.. 7 రోజుల పాటు కస్టడీకి ఇవ్వాలని పోలీసులు నాంపల్లి కోర్టులో పిటిషన్‌ దాఖలు చేశారు. పోలీసుల విజ్ఞప్తిపై విచారణ జరిపిన నాంపల్లి కోర్టు.. 5 రోజుల కస్టడీకి అనుమతిస్తున్నట్లు ఉత్తర్వులు జారీ చేసింది.
ఇక కోర్టు ఆదేశాలతో ఇమ్మడి రవిని అదుపులోకి తీసుకోనున్న పోలీసులు.. మరిన్ని విషయాలను రాబట్టనున్నారు. కస్టడీలోకి తీసుకుని విచారణలో మరికొన్ని కీలక అంశాలు వెలుగు చూసే అవకాశమున్నట్లు చెప్పారు. మరోవైపు.. ఇప్పటికే ఇమ్మడి రవి కేసులో ఎన్‌ఫోర్స్‌మెంట్ డైరెక్టరేట్ ఈడీ ఎంటర్ అయిన సంగతి తెలిసిందే. అతడు మనీ లాండరింగ్‌కు పాల్పడ్డాడా లేదా అనేది గుర్తించనున్నారు.
కొత్తగా విడుదలైన సినిమాలు, ఓటీటీ వేదికల్లోని కంటెంట్‌ను పైరసీ చేసి.. సినిమా ఇండస్ట్రీకి తీవ్ర నష్టం కలిగిస్తున్న నిందితుడు ఇమ్మడి రవిని ఎట్టకేలకు హైదరాబాద్‌ సైబర్‌క్రైమ్‌ పోలీసులు పట్టుకున్న సంగతి తెలిసిందే. ఐ బొమ్మ, బప్పం, ఐ విన్, ఐ రాధ టీవీ పేర్లతో అనేక వెబ్‌సైట్లను రూపొందించి.. గత 7 ఏళ్లుగా పైరసీ సినిమాలు, వెబ్‌ సిరీస్‌లకు వేదికగా మార్చిన ఇమ్మడి రవి 40ని పోలీసులు కూకట్‌పల్లిలో శనివారం అరెస్ట్ చేశారు. ఇక కూకట్‌పల్లిలో అతడు నివసిస్తున్న అపార్ట్‌మెంట్‌లో రూ.3 కోట్ల నగదు.. వందల కొద్దీ హార్డ్‌ డిస్క్‌లు.. సెల్‌ఫోన్లు, కంప్యూటర్లను కూడా గుర్తించి వాటిని స్వాధీనం చేసుకున్నారు. అతడిని బషీర్‌బాగ్‌ సెంట్రల్‌ క్రైమ్‌ స్టేషన్‌ సీసీఎస్‌కు తరలించి అనేక విషయాలు తెలుసుకున్నారు.