Flu: కొవిడ్ భయాలు ఇప్పుడిప్పుడే తొలగిపోతున్నాయి. ఈ తరుణంలోనే దేశవ్యాప్తంగా భారీగా ఫ్లూ కేసులు నమోదవుతున్నాయి. దీంతో ఆందోళనలు రేకెత్తిస్తున్నాయి. కొవిడ్ తరహా లక్షణాలతో వస్తున్న ఈ ఇన్ఫ్లుయెంజా దీర్ఘకాలం బాధిస్తున్నది. ఇన్ఫ్లుయెంజా ఏ సబ్ టైప్ హెచ్3ఎన్2 వైరస్ కారణంగా ఈ ఫ్లూ వేగంగా వ్యాప్తి చెందుతున్నదని ఐసీఎంఆర్ తెలిపింది.
రెండు నెలలుగా దేశవ్యాప్తంగా ఫ్లూ కేసులు భారీగా రిపోర్ట్ అవుతున్నాయి. సాధారణంగా జలుబు దాదాపు ఒక వారంపాటు ఉంటుంది. కానీ, ఈ ఫ్లూ సోకిన పేషెంట్లలో రెండు, మూడు వారాలపాటు జలుబు ఉంటున్నది. అలాగే, విపరీతమైన దగ్గు ఉంటున్నది. ఫలితంగా గొంతు నొప్పి కూడా తీవ్రంగా ఉంటున్నది. వీటికితోడు జ్వరం కూడా వస్తున్నది. ఆ జ్వరమూ దీర్ఘకాలం వీడట్లేదు. కొవిడ్ తరహా లక్షణాలతో ఈ ఫ్లూ దేశవ్యాప్తంగా చాలా చోట్ల కనిపిస్తున్నది. ఒక చోట నుంచి మరో చోటుకి వేగంగా వ్యాపిస్తున్నది. ఐసీఎంఆర్ దీనిపై స్పందించింది. ఇది ఇన్ఫ్లుయెంజా ఏ సబ్ టైప్ హెచ్3ఎన్2 వైరస్ అని పేర్కొంది. కరోనా తరహా లక్షణాలు ఉండటం, దేశవ్యాప్తంగా వ్యాప్తి చెందడంతో ఒకరకమైన ఆందోళనలు వ్యక్తమవుతున్నాయి.
హెచ్3ఎన్2 వైరస్ ఇతర సబ్ టైప్ల కంటే ఎక్కువ తీవ్రతను కలిగి ఉంటుందని, అందుకే ఈ వైరస్ సోకడంతో చాలా మంది హాస్పిటల్లో చేరాల్సి వస్తున్నది. గత రెండు మూడు నెలలుగా మన దేశంలో ఈ వైరస్ ఎక్కువగా వ్యాప్తిలో ఉన్నదని నిపుణులు చెబుతున్నారు. ఈ ఇన్ఫ్లుయెంజా సోకిన వారిలో దగ్గు, జ్వరం దీర్ఘకాలం కొనసాగుతున్నాయని వివరించారు. దీర్ఘకాలం ఈ లక్షణాలు ఉంటున్నాయని పేషెంట్లు చెబుతున్నారు.
ఇదిలా ఉండగా ఈ వైరస్ బారిన పడకుండా ఉండటానికి ఐసీఎంఆర్ కొన్ని సూచనలు చేసింది. కాగా, ఇండియన్ మెడికల్ అసోసియేషన్ మాత్రం ఇబ్బడిముబ్బడిగా యాంటీబయాటిక్స్ వాడొద్దని సూచించింది. లక్షణాలు చూసి సమస్యను గుర్తించి అందుకు సంబంధించిన ట్రీట్మెంట్ ఇవ్వాలని, అదేమీ లేకుండా విచక్షణారహితంగా యాంటీ బయాటిక్స్ రిఫర్ చేయడం సరికాదని, ఇది ఇతర సమస్యలకు దారి తీస్తుందని తెలిపింది.
అయితే ఫ్లూ సోకిన వ్యక్తి నుంచి ఇతర కుటుంబ సభ్యులకు, చుట్టుపక్కల వాళ్లకు సులభంగా అది వ్యాపించే ముప్పు ఉంటుంది. కాబట్టి, ఫ్లూ సోకిన పేషెంట్ను కనీసం ఒక వారంపాటు ఐసొలేషన్లో ఉంచడం మంచిదని వైద్యులు సూచిస్తున్నారు. అలాగే, వారు మాస్క్ ధరించడం మంచిదని వివరిస్తున్నారు.