Supreme Court: సుప్రీంకోర్టు (Supreme Court) ఒక కీలకమైన తీర్పును వెలువరించింది. 16 ఏళ్ల ముస్లిం బాలిక వివాహం చట్టబద్ధమేనని తీర్పు ఇచ్చింది. అలాగే పంజాబ్-హర్యానా హైకోర్టు ఇచ్చిన తీర్పులో జోక్యం చేసుకోవడానికి నిరాకరించింది. 2022లో పంజాబ్-హర్యానా హైకోర్టు ఒక ముస్లిం యువకుడు (21), ఒక ముస్లిం బాలిక (16) ప్రేమ వివాహాన్ని ముస్లిం పర్సనల్ లా నిబంధనల ప్రకారం చట్టబద్ధమైనదిగా పరిగణించింది. ఈ వివాహిత జంటకు భద్రత కల్పించాలని కూడా హైకోర్టు ఆదేశించింది. హైకోర్టు ఇచ్చిన ఈ తీర్పును జాతీయ బాలల హక్కుల పరిరక్షణ కమిషన్ (NCPCR) సుప్రీంకోర్టులో సవాలు చేసింది.
సుప్రీంకోర్టు పిటిషన్పై ప్రశ్నలు లేవనెత్తింది
సుప్రీంకోర్టులో దాఖలైన పిటిషన్పై విచారణ సందర్భంగా జస్టిస్ బి.వి.నాగరత్న నేతృత్వంలోని బెంచ్, NCPCRకు ఈ విషయంతో సంబంధం ఏమిటని ప్రశ్నించింది. ఈ కేసులో కమిషన్ కక్షిదారు కానప్పుడు, అప్పీల్ దాఖలు చేయడం వెనుక ఉద్దేశ్యం ఏమిటని అడిగింది. యువకుడు, యువతి వివాహం వారి ఇద్దరి సమ్మతితోనే జరిగిందని కోర్టు పేర్కొంది. హైకోర్టు ఆదేశాన్ని సవాలు చేసే అధికారం NCPCR కు లేదని జస్టిస్ నాగరత్న వ్యాఖ్యానించారు. పిల్లల హక్కులను పరిరక్షించాల్సిన సంస్థ (NCPCR), ఇద్దరు పిల్లలకు రక్షణ కల్పించకూడదని ఎలా చెప్పగలదని ఆమె ప్రశ్నించారు.
Also Read: Sitting on Chair : కుర్చీలో కంటిన్యూగా కూర్చుంటున్నారా? ఈ వ్యాధుల బారిన పడే చాన్స్
తీర్పుపై కమిషన్ స్పందన
సుప్రీంకోర్టు తీర్పుపై జాతీయ మానవ హక్కుల కమిషన్ సభ్యుడు ప్రియాంక్ కనుంగో స్పందించారు. హైకోర్టు మైనర్ ముస్లిం బాలిక వివాహాన్ని చట్టబద్ధం చేసిందని ఆయన అన్నారు. ఒక హైకోర్టు ఇలాంటి తీర్పు ఇస్తే, ఇతర హైకోర్టులు కూడా ఇలాంటి తీర్పులు ఇవ్వవచ్చని సుప్రీంకోర్టులో వాదించారు. అలా జరిగితే బాలికల భద్రతకు ప్రమాదం ఏర్పడుతుందని, అత్యాచార కేసులను అరికట్టడం కష్టమవుతుందని ఆయన అన్నారు.
దేశ ప్రయోజనాల కోసమే తాము సుప్రీంకోర్టుకు వెళ్ళామని, కానీ సీనియర్ న్యాయవాదులు లేని సమయంలో ఏకపక్షంగా విచారణ జరిపి తీర్పు ఇచ్చారని ఆయన ఆరోపించారు. దీని వల్ల భవిష్యత్తులో పిల్లల భద్రత కష్టం అవుతుందని, ఎందుకంటే భారత పార్లమెంట్ చేసిన చట్టం ప్రకారం లైంగిక సంబంధాల వయస్సు 18 సంవత్సరాలుగా ఉండాలని ఆయన అన్నారు. ఇప్పుడు ఆ వయస్సును 16 సంవత్సరాలకు తగ్గించడం యువకులకు లైంగిక సంబంధాలకు స్వేచ్ఛ ఇవ్వడం కాదు, దోపిడీదారులకు దోపిడీ చేయడానికి స్వేచ్ఛ ఇవ్వడమే అని ఆయన వ్యాఖ్యానించారు.