Global GDP Rankings: భారత ఆర్థిక వ్యవస్థ ప్రపంచంలో నాలుగో అతిపెద్ద శక్తిగా అవతరించిందన్న వాదనలకు గట్టి విఘాతం కలిగింది. అంతర్జాతీయ ద్రవ్య నిధి ఏప్రిల్ 2026లో విడుదల చేసిన తాజా గణాంకాల ప్రకారం.. ప్రపంచ జీడీపీ ర్యాంకింగ్స్లో భారత్ ఆరో స్థానానికి పడిపోయింది. భారత్ గత ఏడాదిలోనే నాలుగో స్థానానికి చేరుకుందన్న ప్రభుత్వ ప్రకటనలకు భిన్నంగా ఈ నివేదిక ఉంది.
నాలుగో అతిపెద్ద ఆర్థిక వ్యవస్థ వాదన ఏమిటి?
మే 2025లో IMF విడుదల చేసిన అంచనాల ఆధారంగా భారత్ 2025-26 నాటికి జపాన్ను అధిగమించి ప్రపంచంలోనే నాలుగో అతిపెద్ద ఆర్థిక వ్యవస్థగా మారుతుందని కేంద్ర ప్రభుత్వం సూచించింది. ఆ సమయ నాటి అంచనాల ప్రకారం.. భారత జీడీపీ సుమారు $3.9 ట్రిలియన్లుగా ఉంటుందని అంచనా వేశారు. జపాన్ జీడీపీ దాదాపు $4 ట్రిలియన్ల వద్ద ఉంటుందని లెక్కించారు. అయితే తాజా గణాంకాల ప్రకారం ప్రాథమిక అంచనాలకు, వాస్తవ డేటాకు మధ్య భారీ వ్యత్యాసం ఉన్నట్లు స్పష్టమైంది. దీని ఫలితంగా భారత్ టాప్-5 జాబితా నుండి తప్పుకుని ఆరో స్థానానికి చేరుకుంది.
Also Read: రాత్రిపూట సరిగ్గా నిద్ర పట్టడం లేదా? సమస్యను తగ్గించే యోగాసనాలు ఇవే!
జపాన్, జర్మనీ కంటే వెనుకబడిన భారత్
గత ఏడాది ప్రభుత్వం చేసిన ప్రకటనలు తుది గణాంకాల కంటే కూడా కేవలం అంచనాలపైనే ఆధారపడి ఉన్నాయని నిపుణులు అభిప్రాయపడుతున్నారు. ప్రస్తుత ర్యాంకింగ్ల ప్రకారం అమెరికా, చైనా, జర్మనీ, జపాన్ వంటి దేశాలు ఇప్పటికీ భారత్ కంటే ముందున్నాయి. కరెన్సీ హెచ్చుతగ్గులు, ప్రపంచ ఆర్థిక మందగమనం కారణంగా భారత్ ర్యాంకింగ్లో ఈ క్షీణత చోటు చేసుకుందని తెలుస్తోంది.
మార్కెట్ నిపుణుల అభిప్రాయం
భారత వృద్ధి రేటు అనేక అభివృద్ధి చెందిన దేశాల కంటే మెరుగ్గా ఉన్నప్పటికీ $5 ట్రిలియన్ల లక్ష్యాన్ని చేరుకోవడం, టాప్-4లో చోటు సంపాదించడం ఇంకా దూరంలోనే ఉందని ఆర్థిక విశ్లేషకులు భావిస్తున్నారు. ఈ లక్ష్యాలను సాధించాలంటే దేశీయ డిమాండ్ను పెంచడంతో పాటు ఎగుమతుల రంగంలో భారీ సంస్కరణలు అవసరమని వారు పేర్కొంటున్నారు.