Meta Layoffs: ప్రముఖ గ్లోబల్ టెక్ దిగ్గజం, ఫేస్బుక్, ఇన్స్టాగ్రామ్ మాతృ సంస్థ అయిన మెటా మరోసారి భారీ స్థాయిలో ఉద్యోగుల తొలగింపునకు సిద్ధమవుతోంది. రాయిటర్స్ నివేదిక ప్రకారం.. మెటా మే 20, 2026 నుండి తన గ్లోబల్ వర్క్ఫోర్స్లో దాదాపు 10 శాతం కోతను ప్రారంభించనుంది. మొదటి దశలో సుమారు 8,000 మంది ఉద్యోగులకు ఉద్వాసన పలకనున్నారు.
AI కోసం మారుతున్న కంపెనీ నిర్మాణం
మెటా సీఈఓ మార్క్ జుకర్బర్గ్ కంపెనీ కార్యకలాపాలన్నింటినీ ఆర్టిఫిషియల్ ఇంటెలిజెన్స్ చుట్టూ పునర్నిర్మిస్తున్నారు. జుకర్బర్గ్ AI కార్యక్రమాల కోసం బిలియన్ల డాలర్లను పెట్టుబడి పెడుతున్నారు. తన ఉత్పత్తులు, అంతర్గత పనితీరును పూర్తిగా AI-ఆధారితంగా మార్చడమే కంపెనీ లక్ష్యం. ఈ సాంకేతిక మార్పు, ఆటోమేషన్కు ప్రాధాన్యత ఇవ్వడం వల్ల కంపెనీ కొత్త వ్యూహానికి సరిపోని విభాగాల్లో కోతలు విధిస్తున్నారు.
Also Read: కొత్త జట్టుకు యజమానిగా క్రిస్ గేల్!
ఏడాది చివరి నాటికి మరిన్ని ఉద్యోగాల తొలగింపు
నివేదిక ప్రకారం.. మే 20 నుండి ప్రారంభమయ్యే తొలగింపులు మొదటి దశ మాత్రమే. 2026 ద్వితీయార్థంలో మరో రౌండ్ తొలగింపులు వచ్చే అవకాశం ఉందని వర్గాలు చెబుతున్నాయి. మెటా తన ప్రక్రియల్లో AIని ఎంత త్వరగా, సమర్థవంతంగా అనుసంధానిస్తుంది అనే దానిపై ఈ అదనపు కోతలు ఆధారపడి ఉంటాయి.
టెక్ పరిశ్రమలో ఆటోమేషన్ హవా
మెటా తీసుకున్న ఈ నిర్ణయం మొత్తం టెక్ పరిశ్రమలో కొనసాగుతున్న ఒక పెద్ద ట్రెండ్లో భాగం. కంపెనీలు ఇప్పుడు మ్యాన్పవర్ కంటే AI-ఆధారిత సామర్థ్యంపై దృష్టి సారిస్తున్నాయి. ఇటీవలి కాలంలో మెటా చేపట్టిన అతిపెద్ద ఉద్యోగ కోతల్లో ఇది ఒకటిగా పరిగణించబడుతోంది.