18 ఏళ్లు నిండిన బాలికలందరికీ శుభవార్త. మొట్టమొదటిసారిగా ఓ విశ్వవిద్యాలయం చదువుతున్న బాలికలకు ప్రసూతి సెలవులు (Maternity Leaves) ఇవ్వాలని ప్రకటించింది. ఇప్పటి వరకు చాలా కార్యాలయాలు, సంస్థలలో పనిచేసే మహిళా ఉద్యోగులకు మాత్రమే ప్రసూతి సెలవులు అనే నిబంధన ఉంది. కేరళలో మొట్టమొదటిసారిగా మహాత్మా గాంధీ విశ్వవిద్యాలయం (MGU) అండర్ గ్రాడ్యుయేట్ డిగ్రీ,పోస్ట్ గ్రాడ్యుయేట్ డిగ్రీ కోర్సులలో 18 సంవత్సరాలు, అంతకంటే ఎక్కువ వయస్సు ఉన్న బాలికలకు 60 రోజుల ప్రసూతి సెలవులను అందించాలని నిర్ణయించింది. తద్వారా వారు ఎటువంటి అంతరాయం లేకుండా చదువు కొనసాగించవచ్చు.
కేరళలోని మహాత్మాగాంధీ విశ్వవిద్యాలయం (ఎంజీయూ) ఇటీవల విడుదల చేసిన అధికారిక నోటిఫికేషన్లో ప్రో వైస్ ఛాన్సలర్ అరవింద్ కుమార్ అధ్యక్షతన జరిగిన సిండికేట్ సమావేశంలో ఈ నిర్ణయం తీసుకున్నట్లు తెలిపింది. ఈ అంశంపై అధ్యయనం చేసేందుకు ఏర్పాటైన కమిటీ సిఫార్సులను సిండికేట్ ఆమోదించిందని యూనివర్సిటీ తెలిపింది. విశ్వవిద్యాలయం ప్రకారం.. ప్రసవానికి ముందు లేదా తర్వాత 60 రోజుల ప్రసూతి సెలవులు తీసుకోవచ్చు. కానీ మొదటి లేదా రెండవ గర్భధారణకు మాత్రమే కోర్సు వ్యవధిలో ఒకసారి మాత్రమే ఇవ్వబడుతుంది. ప్రసూతి సెలవు కాలం పబ్లిక్, సాధారణ సెలవులను కలిగి ఉంటుంది. ఇతర సెలవులతో కలిపి ఉండకూడదు.
Also Read: Merry Christmas 2023 : క్రిస్మస్ సంథింగ్ స్పెషల్..!
అదే సమయంలో అబార్షన్, స్టెరిలైజేషన్ మొదలైన సందర్భాల్లో 14 రోజుల సెలవు ఇవ్వబడుతుంది. గర్భం కారణంగా విద్యార్థుల చదువులు ప్రభావితం కాకుండా చూసేందుకు, ఒక సెమిస్టర్లో ప్రసూతి సెలవులో ఉన్నవారు ఆ సెమిస్టర్ పరీక్ష కోసం నమోదు చేసుకోవడానికి అనుమతించబడతారు. అయితే తదుపరి సెమిస్టర్లో రెగ్యులర్ విద్యార్థులతో కలిసి పరీక్షలు రాయొచ్చు. అయితే ప్రసూతి సెలవు ముగిసిన తర్వాత తన బ్యాచ్తో కలిసి ప్రస్తుత సెమిస్టర్లో తన చదువును కొనసాగించవచ్చు కాబట్టి ఒక సెమిస్టర్ను కోల్పోవలసిన అవసరం లేదు. ప్రసూతి సెలవులో ఉన్న విద్యార్థుల ప్రాక్టికల్, ల్యాబ్, వైవా పరీక్షల విషయంలో సంస్థ లేదా విభాగాధిపతి అందుకు అవసరమైన ఏర్పాట్లు చేయాలని సిండికేట్ నిర్ణయించింది. ప్రసూతి సెలవుల కోసం దరఖాస్తుతో పాటు సెలవు ప్రారంభానికి మూడు రోజుల ముందు రిజిస్టర్డ్ డాక్టర్ నుండి మెడికల్ సర్టిఫికేట్ ఉండాలని ప్రకటనలో పేర్కొంది.