ప్రధాని మోదీకి ఎఫ్‌ఎస్‌యుఐ అత్యవసర లేఖ.. భార‌త్ యుద్ధంలోకి ఎంట‌ర్ అవుతుందా?

Iran-Israel War: ఇరాన్-ఇజ్రాయెల్- అమెరికా మధ్య కొనసాగుతున్న భీకర పోరాటం 14వ రోజుకు చేరుకుంది. ఈ నేపథ్యంలో సముద్రంలో చిక్కుకున్న భారతీయ నావికుల భద్రతపై తీవ్ర ఆందోళన నెలకొంది. ఇరాన్ నౌకాశ్రయాలలో చిక్కుకున్న భారతీయ నావికుల ప్రాణాలను కాపాడాలని కోరుతూ ఫార్వర్డ్ సీమెన్స్ యూనియన్ ఆఫ్ ఇండియా (FSUI) ప్రధాని నరేంద్ర మోదీకి లేఖ రాసింది. యుద్ధం కారణంగా నౌకల్లో ఇంధనం, తాగునీరు, ఆహారానికి తీవ్ర కొరత ఏర్పడిందని, రాబోయే రోజుల్లో అక్కడ పూర్తి స్థాయిలో ‘బ్లాక్‌అవుట్’ వంటి పరిస్థితులు తలెత్తే ప్రమాదం ఉందని యూనియన్ హెచ్చరించింది.

యూనియన్ ప్రధాన కార్యదర్శి మనోజ్ యాదవ్ ఈ తీవ్రమైన అంశంపై ప్రత్యేకంగా మాట్లాడారు. ఆయన తెలిపిన ముఖ్యాంశాలు ఇవే..

రికార్డుల్లో లేని వేలమంది: ప్రభుత్వం వద్ద ఉన్న 778 మంది నావికుల గణాంకాలు కేవలం అధికారికంగా నమోదైన వారివి మాత్రమే. కానీ వాస్తవ పరిస్థితి చాలా భయంకరంగా ఉంది. వేల సంఖ్యలో భారతీయ నావికులు వివిధ విదేశీ మరియు ఇరానియన్ నౌకల్లో చిక్కుకున్నారు. వీరి గురించి ఎటువంటి ప్రభుత్వ రికార్డులు లేవు.

అక్రమ ఎంపిక: ఈ నావికుల నియామకాలు అక్రమ పద్ధతుల్లో జరగడం వల్లే వీరి పేర్లు ప్రభుత్వ జాబితాలో చేరలేదని మనోజ్ యాదవ్ వివరించారు. ఇప్పుడు ఈ క్లిష్ట సమయంలో వారిని గుర్తించడం ఒక పెద్ద సవాలుగా మారింది.

Also Read: గుడ్లను ఉడ‌క‌బెడుతున్నారా? అయితే నీటిలో నిమ్మ ముక్క‌ వేయాల్సిందే!

డిజి షిప్పింగ్ విజ్ఞప్తి: అటువంటి నావికుల సమాచారం ఏమైనా ఉంటే వెంటనే తమకు అందజేయాలని డిజి షిప్పింగ్, ఎఫ్‌ఎస్‌యుఐ, ఇతర యూనియన్లను కోరింది.

70 మంది నావికుల జాబితా అందజేత

యూనియన్ ప్రస్తుతం యుద్ధ ప్రాతిపదికన పనిచేస్తోందని మనోజ్ యాదవ్ తెలిపారు. గత 24 గంటల్లో ఎక్కడా రికార్డుల్లో లేని సుమారు 70 మంది నావికుల జాబితాను యూనియన్ ప్రభుత్వానికి సమర్పించింది. వీరు ప్రస్తుతం బందర్ అబ్బాస్, బిఐకె (BIK) ఇరాన్, సిరి ద్వీపం, లావన్ ద్వీపం వంటి అత్యంత సున్నితమైన ప్రాంతాల్లో చిక్కుకున్నారు. అక్కడ కమ్యూనికేషన్ వ్యవస్థలు నిలిచిపోవడంతో వారు సహాయం కోసం ఎదురుచూస్తున్నారు.

ప్రధాని మోదీకి విజ్ఞప్తి

ఎఫ్‌ఎస్‌యుఐ అధ్యక్షుడు బంకిమ్ భారతి, ప్రధాన కార్యదర్శి మనోజ్ యాదవ్ ప్రధాని మోదీకి ఒక విన్నపం చేశారు. ఇరాన్ నౌకాశ్రయాలలో చిక్కుకున్న వేలాది మంది భారతీయులకు ఆహారం, నీరు వంటి కనీస అవసరాలను అందించడానికి వెంటనే దౌత్యపరమైన చర్యలు తీసుకోవాలని వారు కోరారు. రాబోయే కొద్ది రోజుల్లో కఠినమైన చర్యలు తీసుకోకపోతే పరిస్థితి చేయి దాటిపోయే ప్రమాదం ఉందని వారు హెచ్చరించారు.