బెంగళూరులో సాంబార్ విషయంలో మొదలైన చిన్నపాటి ఘర్షణ ఒక నిండు ప్రాణాన్ని బలితీసుకుంది. కేవలం వంటకం విషయంలో తలెత్తిన వివాదం చిలికి చిలికి గాలివానలా మారి, ఒక కుటుంబాన్ని తీవ్ర విషాదంలోకి నెట్టేసింది.
బెంగళూరుకు చెందిన 27 ఏళ్ల కావ్యకు, రంగస్వామితో ఐదేళ్ల క్రితం వివాహమైంది. వీరికి నాలుగేళ్ల కుమారుడు ఉన్నాడు. పచ్చని సంసారంలో సాంబార్ రూపంలో చిచ్చు రేగింది. కావ్య మూడు రోజుల క్రితం వండిన సాంబార్నే ఫ్రిజ్లో పెట్టి, వరుసగా రెండు రోజుల పాటు భర్తకు వడ్డించడమే ఈ గొడవకు మూలకారణం. “ప్రతిరోజూ అదే పాత సాంబార్ పెడుతున్నావు” అంటూ రంగస్వామి ఆగ్రహం వ్యక్తం చేయడం, దానికి కావ్య బదులివ్వడంతో ఇద్దరి మధ్య మాట మాట పెరిగి అది కాస్తా తీవ్ర వాగ్వాదానికి దారితీసింది.
భర్త తన వంటను తక్కువ చేసి మాట్లాడటం, అదే విషయమై పదే పదే నిలదీయడంతో కావ్య తీవ్ర మనస్తాపానికి గురైంది. క్షణికావేశంలో ఆమె విచక్షణ కోల్పోయింది. ఇంట్లో పొలాల కోసం సిద్ధంగా ఉంచిన పురుగుల మందును తీసుకుని బాత్రూమ్లోకి వెళ్లి తాగేసింది. ఎంతసేపటికీ ఆమె బయటకు రాకపోవడంతో ఆందోళన చెందిన రంగస్వామి, తలుపులు బద్దలుకొట్టి చూడగా ఆమె అపస్మారక స్థితిలో పడి ఉంది. వెనువెంటనే ఆమెను ఆస్పత్రికి తరలించినప్పటికీ, చికిత్స పొందుతూ ప్రాణాలు కోల్పోవడం స్థానికంగా కలకలం రేపింది.
ఈ ఘటన సమాజంలో మారుతున్న మానవ సంబంధాల సున్నితత్వాన్ని ప్రశ్నిస్తోంది. ఉరుకుల పరుగుల జీవితంలో చిన్నపాటి అసహనం ఎంతటి అనర్థాలకు దారితీస్తుందో ఈ ఉదంతం నిదర్శనం. భార్యాభర్తల మధ్య ఉండాల్సిన సమన్వయం లోపించడం, కోపాన్ని నియంత్రించుకోలేకపోవడం వల్ల ఒక చిన్నారి తల్లిని కోల్పోయాడు. వంట రుచి లేదా నాణ్యత కంటే మనిషి ప్రాణం విలువైనదనే స్పృహ కోల్పోవడం వల్లే ఇలాంటి విషాదాలు చోటుచేసుకుంటున్నాయి. పోలీసులు ఈ ఘటనపై కేసు నమోదు చేసి దర్యాప్తు చేస్తున్నారు.