ఖమ్మంలో దారుణం.. బీమా డబ్బు లు వస్తాయని కట్టుకున్న భర్తనే చంపేసిన భార్య

ఖమ్మం జిల్లాలో మానవ సంబంధాలకు మచ్చ తెచ్చేలాంటి ఒక హృదయవిదారక ఘటన వెలుగుచూసింది. కట్టుకున్న భర్త అనారోగ్యం పాలైతే కంటికి రెప్పలా కాపాడుకోవాల్సిన భార్య, భీమా సొమ్ము కోసం అతడినే కడతేర్చిన వైనం స్థానికంగా పెను సంచలనం సృష్టించింది. వివరాల్లోకి వెళితే.. ఖమ్మంకు చెందిన రవి అనే వ్యక్తి గత కొంతకాలంగా అనారోగ్యంతో బాధపడుతున్నాడు. అయితే, తన భర్త ఎలాగూ చనిపోతాడన్న అంచనాతో అతని భార్య ప్రశాంతి ఏకంగా రూ. 66 లక్షల విలువైన ఇన్సూరెన్స్ పాలసీ చేయించింది. కానీ, నెలలు గడుస్తున్నా భర్త ఆరోగ్య పరిస్థితిలో మార్పు రాకపోవడంతో, ఆ భీమా డబ్బులను త్వరగా పొందేందుకు ఆమె దారుణమైన నేరానికి పథకం రచించింది.

ఈ పథకంలో భాగంగా ప్రశాంతి మరో నలుగురు వ్యక్తులతో కలిసి ఒక కిరాతక ప్లాన్ వేసింది. తొలుత తన భర్త రవికి మద్యం తాగించి మత్తులోకి జారుకునేలా చేసింది. అనంతరం అతడిని బయటకు తీసుకెళ్లి, ముందుగా అనుకున్న ప్రకారం కారుతో వేగంగా ఢీకొట్టి ప్రాణాలు తీసింది. తొలుత ఇది ఒక సాధారణ రోడ్డు ప్రమాదంగా అందరినీ నమ్మించే ప్రయత్నం చేసింది. కారు ప్రమాదంలో చనిపోతే ఇన్సూరెన్స్ డబ్బులు సులభంగా వస్తాయని ఆమె భావించినట్లు తెలుస్తోంది. ప్రమాదం జరిగిన తీరుపై అనుమానం రావడంతో బంధువులు పోలీసులకు ఫిర్యాదు చేయగా, అసలు నిజం బయటపడింది.

పోలీసుల లోతైన దర్యాప్తులో భార్య ప్రశాంతి అసలు రంగు బయటపడింది. ప్రమాదం జరిగిన సమయంలో పరిసరాల్లోని సీసీటీవీ ఫుటేజ్ మరియు ప్రశాంతి కాల్ డేటాను విశ్లేషించిన అధికారులు, ఇది ప్రమాదం కాదని.. పక్కా ప్లాన్ ప్రకారం జరిగిన హత్య అని నిర్ధారించారు. భీమా డబ్బులపై ఉన్న అతి ఆశే ఆమెను ఈ దారుణానికి పురిగొల్పినట్లు పోలీసులు గుర్తించారు. ప్రస్తుతం నిందితురాలు ప్రశాంతితో పాటు ఈ హత్యలో సహకరించిన మరో నలుగురిని పోలీసులు అరెస్టు చేసి జైలుకు తరలించారు. సమాజంలో నమ్మకానికి అర్థం మార్చేలా జరిగిన ఈ ఘటన ఖమ్మం వాసులను విస్మయానికి గురిచేసింది.