నవంబర్ 29, 2009న కె.చంద్రశేఖర్ రావు (కేసీఆర్) కరీంనగర్‌లో చేపట్టిన ఆమరణ నిరాహార దీక్షకు గుర్తుగా బీఆర్‌ఎస్ పార్టీ ఈ రోజును ‘దీక్షా దివస్’గా జరుపుకుంటోంది. తెలంగాణ రాష్ట్ర సాధన ఉద్యమంలో ఈ దీక్ష ఒక ముఖ్యమైన మలుపుగా పరిగణించబడుతున్న నేపథ్యంలో 16 సంవత్సరాల తర్వాత బీఆర్‌ఎస్ దీనిని ఘనంగా ఆచరిస్తోంది. ముఖ్యంగా ఈసారి ‘విద్యార్థి రణభేరి’ అనే కార్యాచరణతో కాంగ్రెస్ ప్రభుత్వంపై విద్యార్థులు, యువతను ఆందోళనకు పిలుపునివ్వడం రాజకీయంగా చర్చనీయాంశమైంది. బీఆర్‌ఎస్ వర్కింగ్ ప్రెసిడెంట్ కేటీఆర్ ఈ దీక్షను “తెలంగాణ చరిత్రలో అతి ముఖ్యమైన అధ్యాయం”గా అభివర్ణించారు. “‘తెలంగాణ వచ్చుడో, కేసీఆర్ సచ్చుడో’ అనే నినాదంతో కేసీఆర్ చేసిన దీక్షే రాష్ట్ర ఆవిర్భావానికి ముఖ్య శక్తిగా మారిందని” ఆయన ప్రకటించారు. తెలంగాణ తల్లికి నివాళులు, అమర వీరుల స్థూపానికి గౌరవ వందనం, కేసీఆర్ ఫొటోలకు పాలాభిషేకం వంటి కార్యక్రమాలను పార్టీ శ్రేణులు రాష్ట్రవ్యాప్తంగా పెద్ద ఎత్తున నిర్వహిస్తూ, కేటీఆర్ పిలుపునకు తమ మద్దతు తెలియజేస్తున్నాయి.
Sleeper Coach Buses: దేశంలోని స్లీపర్ బస్సులకు కీల‌క ఆదేశాలు.. ఇక‌పై అలాంటి బ‌స్సులు తొల‌గింపు!
అయితే, బీఆర్‌ఎస్ ఆచరణపై కాంగ్రెస్ నాయకులు, శ్రేణులు తీవ్ర విమర్శలు గుప్పిస్తున్నారు. దాదాపు పదేళ్ల పాటు అధికారంలో ఉన్నప్పుడు బీఆర్‌ఎస్ ఈ రోజును అధికారికంగా ఎందుకు పాటించలేదని ప్రశ్నిస్తున్నారు. గత పది సంవత్సరాలలో అమరులకు, వారి కుటుంబాలకు ఇవ్వాల్సిన నిజమైన గౌరవం ఎక్కడ పోయిందని, వారి త్యాగాలను కేవలం రాజకీయ ప్రసంగాలకు మాత్రమే వాడుకున్నారని కాంగ్రెస్ ఆరోపిస్తోంది. రాష్ట్ర హక్కు కోసం పోరాడిన ఉద్యమాన్ని బీఆర్‌ఎస్ పార్టీ వంచించిందని, నిజమైన కార్యకర్తలను పక్కన పెట్టి, ఉద్యమానికి ద్రోహం చేసిన వారికి పెద్ద పదవులు కట్టబెట్టారని విమర్శిస్తోంది. అంతేకాక, తెలంగాణ రాష్ట్రాన్ని వాస్తవం చేసింది అన్ని రాజకీయ ఒత్తిడులను తట్టుకుని భారత జాతీయ కాంగ్రెస్, ముఖ్యంగా సోనియా గాంధీ నేతృత్వమని చరిత్రను గుర్తుచేస్తున్నారు.
ఈ నేపథ్యంలో కాంగ్రెస్ నాయకులు కేటీఆర్‌ను లక్ష్యంగా చేసుకుని, ఆయన వ్యక్తిగత రాజకీయ గుర్తింపుపై, ఉద్యమానికి ఆయన చేసిన స్పష్టమైన సహకారంపై సమాధానం చెప్పాలని డిమాండ్ చేస్తున్నారు. పది సంవత్సరాలు అధికారాన్ని అనుభవించి, ఇప్పుడు త్యాగాల గురించి ఉపన్యాసాలు చేసే అర్హత కేటీఆర్‌కు లేదని ప్రశ్నిస్తున్నారు. బీఆర్‌ఎస్ ప్రస్తుతం చేపడుతున్న ఈ ‘దీక్షా దివస్’ కార్యక్రమాన్ని “రాజకీయంగా కనుమరుగయ్యే భయంతో చేస్తున్న చివరి యత్నంగా, “డెస్పరేట్ డ్రామా”గా కాంగ్రెస్ అభివర్ణిస్తోంది. రాబోయే పంచాయతీ ఎన్నికల ముందు ప్రజలను మరోసారి మోసం చేయాలని చూస్తున్నారని, బీఆర్‌ఎస్‌కు నేల స్థాయిలో నిజమైన రాజకీయ బలం లేదని, కేవలం సోషల్ మీడియా, దూషణల మీద ఆధారపడే నకిలీ బలం మాత్రమే ఉందని విమర్శిస్తున్నారు. అమరులను నటనతో కాదు, చర్యలతో గౌరవించాలని, తెలంగాణ ప్రజలు నాటకాల్ని కాకుండా నిజమైన సమాధానాలను కోరుకుంటున్నారని కాంగ్రెస్ నాయకులు తమ వాదనను బలంగా వినిపిస్తున్నారు.