Telangana Municipal Election Results 2026 : ఖమ్మం జిల్లా రాజకీయాల్లో కీలకమైన సత్తుపల్లి మున్సిపాలిటీలో కాంగ్రెస్ పార్టీ చారిత్రాత్మక విజయాన్ని నమోదు చేసింది. రెండు దశాబ్దాల నిరీక్షణకు తెరదించుతూ హస్తం పార్టీ అక్కడ జైత్రయాత్రను కొనసాగించింది. ఖమ్మం జిల్లా సత్తుపల్లి మున్సిపాలిటీలో కాంగ్రెస్ పార్టీ అద్భుత విజయాన్ని అందుకుంది. సుమారు 20 ఏళ్ల సుదీర్ఘ నిరీక్షణ తర్వాత ఈ పట్టణంలో కాంగ్రెస్ జెండా రెపరెపలాడింది. గతంలో 2005లో సత్తుపల్లిని నగర పంచాయతీగా అప్గ్రేడ్ చేసిన సమయంలో కాంగ్రెస్ ప్యానెల్ విజయం సాధించింది. ఆ తర్వాత మారిన రాజకీయ సమీకరణాల వల్ల ఇక్కడ ఇతర పార్టీల హవా కొనసాగగా, తాజాగా జరిగిన 2026 మున్సిపల్ ఎన్నికల్లో కాంగ్రెస్ మళ్లీ పాత వైభవాన్ని సంతరించుకుంది. అధికారంలో ఉన్న జోష్తో పాటు క్షేత్రస్థాయిలో చేసిన పక్కా వ్యూహరచన కాంగ్రెస్కు ఈ అఖండ విజయాన్ని కట్టబెట్టిందని రాజకీయ విశ్లేషకులు భావిస్తున్నారు.
ఈ ఎన్నికల్లో సత్తుపల్లిలోని మొత్తం 23 వార్డులకు గాను కాంగ్రెస్ ఏకంగా 17 వార్డులను కైవసం చేసుకుని ఏకపక్ష విజయాన్ని నమోదు చేసింది. ప్రత్యర్థి పార్టీలైన బిఆర్ఎస్, బిజెపిలు కాంగ్రెస్ ధాటికి ఎక్కడా నిలవలేకపోయాయి. సత్తుపల్లి నియోజకవర్గంలో మొదటి నుండి పట్టున్న నేతలు కాంగ్రెస్ గూటికి చేరడం, అలాగే ప్రభుత్వ సంక్షేమ పథకాలపై ప్రజల్లో ఉన్న సానుకూలత ఈ గెలుపులో కీలక పాత్ర పోషించాయి. 17 మంది కౌన్సిలర్లతో పూర్తి మెజారిటీ సాధించడంతో మున్సిపల్ కార్యాలయం వద్ద కాంగ్రెస్ శ్రేణుల సంబరాలు మిన్నంటాయి.
విజయం ఖాయమైనప్పటికీ, ప్రస్తుతం సత్తుపల్లి మున్సిపల్ చైర్మన్ పీఠాన్ని అధిరోహించేది ఎవరనే అంశంపై ఉత్కంఠ నెలకొంది. ఈసారి చైర్మన్ పదవిని ‘జనరల్ మహిళ’ కు కేటాయించడంతో, గెలిచిన మహిళా కౌన్సిలర్లలో ఎవరికి ఆ అదృష్టం దక్కుతుందోనన్న చర్చ మొదలైంది. పోటీలో ఉన్న పలువురు సీనియర్ నాయకుల భార్యలు లేదా చురుకైన మహిళా నాయకురాళ్ల పేర్లను పార్టీ పరిశీలిస్తోంది. అధిష్టానం నిర్ణయం ఎటువైపు ఉంటుందోనని అటు నాయకుల్లో, ఇటు ప్రజల్లో ఆసక్తికరమైన చర్చ సాగుతోంది. త్వరలోనే ఈ సందిగ్ధానికి తెరపడనుంది.