మధ్యప్రాచ్యంలో నెలకొన్న అంతర్జాతీయ ఉద్రిక్తతల ప్రభావం తెలంగాణలోని రవాణా రంగంపై స్పష్టంగా కనిపిస్తోంది. రాష్ట్రంలో సుమారు ఒక లక్షకు పైగా ఆటో రిక్షాలు ఎల్పీజీ (LPG) ఇంధనంపై ఆధారపడి నడుస్తుండగా, ప్రస్తుతం సరఫరాలో ఏర్పడిన అంతరాయం ఆటో డ్రైవర్ల జీవనోపాధిని దెబ్బతీస్తోంది. ఈ నేపథ్యంలో రాష్ట్ర పౌరసరఫరాల శాఖ మంత్రి ఉత్తమ్ కుమార్ రెడ్డి కేంద్ర మంత్రి హర్దీప్ సింగ్ పూరీకి అత్యవసర లేఖ రాశారు. గృహ అవసరాలకు వినియోగించే గ్యాస్ సరఫరా 100 శాతం కొనసాగుతున్నప్పటికీ, ఆటో రంగానికి అవసరమైన గ్యాస్ లభ్యత గణనీయంగా తగ్గిందని ఆయన పేర్కొన్నారు. ముఖ్యంగా ప్రైవేట్ అవుట్లెట్లలో గ్యాస్ నిల్వలు నిండుకోవడంతో బహిరంగ మార్కెట్లో కొరత ఏర్పడి, ప్రజా రవాణా వ్యవస్థకు ఆటంకం కలుగుతోందని వివరించారు.
ప్రైవేట్ కంపెనీల ఆధిపత్యం.. సరఫరాలో భారీ లోటు
తెలంగాణలో ఆటో ఎల్పీజీ పంపిణీ నెట్వర్క్ను పరిశీలిస్తే, ప్రభుత్వ రంగ సంస్థల (IOCL, HPCL, BPCL) వాటా కేవలం 20 శాతమే ఉంది. రాష్ట్రవ్యాప్తంగా ప్రభుత్వ సంస్థలకు చెందిన 33 అవుట్లెట్లు మాత్రమే ఉండగా, సూపర్ గ్యాస్, టోటల్ ఎనర్జీస్ వంటి ప్రైవేట్ సంస్థలు 110 అవుట్లెట్లతో 80 శాతం మార్కెట్ను శాసిస్తున్నాయి. ప్రస్తుతం రాష్ట్రంలో రోజుకు సుమారు 55 మెట్రిక్ టన్నుల ఆటో గ్యాస్ కొరత ఉంది. ప్రభుత్వ రంగ సంస్థల నుంచి సరఫరా నిలిచిపోవడంతో ప్రైవేట్ బంకులు ‘డ్రై అవుట్’ (నిల్వలు లేని) స్థితికి చేరుకున్నాయి. దీనివల్ల వేలాది మంది ఆటో డ్రైవర్లు గ్యాస్ కోసం గంటల తరబడి వేచి చూడాల్సిన పరిస్థితి ఏర్పడిందని, ఇది శాంతిభద్రతల సమస్యలకు కూడా దారితీసే ప్రమాదం ఉందని మంత్రి తన లేఖలో ఆందోళన వ్యక్తం చేశారు.
ధరల వ్యత్యాసంపై నియంత్రణ.. కేంద్రానికి విజ్ఞప్తి
సరఫరా కొరతతో పాటు ధరల విషయంలోనూ ఆటో డ్రైవర్లు తీవ్ర దోపిడీకి గురవుతున్నారని మంత్రి ఉత్తమ్ కుమార్ రెడ్డి కేంద్రం దృష్టికి తీసుకెళ్లారు. ప్రస్తుతం ప్రభుత్వ రంగ సంస్థల అవుట్లెట్లలో లీటర్ గ్యాస్ ధర రూ. 75 ఉండగా, ప్రైవేట్ కంపెనీలు దీనిని రూ. 93 కు విక్రయిస్తున్నాయి. ఈ భారీ వ్యత్యాసాన్ని అరికట్టేందుకు క్రమబద్ధీకరణ చర్యలు చేపట్టాలని ఆయన కోరారు. అలాగే, ప్రైవేట్ మార్కెటింగ్ కంపెనీలకు ప్రభుత్వ రంగ సంస్థల నుంచి అవసరమైన మేరకు గ్యాస్ సరఫరా చేసేలా ఆదేశాలు ఇవ్వాలని, తద్వారా కృత్రిమ కొరతను నివారించవచ్చని సూచించారు. కేంద్రం తక్షణమే స్పందించి గ్యాస్ లభ్యతను పెంచితేనే లక్షలాది మంది ఆటో డ్రైవర్ల కుటుంబాలకు భరోసా కలుగుతుందని ఆయన విజ్ఞప్తి చేశారు.