Cameron Green: వాంఖడే స్టేడియంలో ముంబై ఇండియన్స్, కోల్కతా నైట్ రైడర్స్ మధ్య జరిగిన మ్యాచ్లో కామెరాన్ గ్రీన్ ఎందుకు బౌలింగ్ చేయలేదు? ఐపీఎల్ 2026లో కేకేఆర్ ఆడిన మొదటి మ్యాచ్లో ఈ ఆస్ట్రేలియన్ ఆల్ రౌండర్ ఒక్క ఓవర్ కూడా వేయకపోవడంతో అభిమానులు, నిపుణులలో అనేక సందేహాలు వ్యక్తమయ్యాయి.
రహానే సమాధానం దాటవేత
మ్యాచ్ అనంతరం జరిగిన ప్రెస్ కాన్ఫరెన్స్లో కోల్కతా నైట్ రైడర్స్ కెప్టెన్ అజింక్య రహానే.. గ్రీన్ వేగవంతమైన బౌలింగ్ను ఎందుకు ఉపయోగించుకోలేదని అడిగిన ప్రశ్నకు.. ‘క్రికెట్ ఆస్ట్రేలియాను అడగండి’ అంటూ క్లుప్తంగా సమాధానమిచ్చారు. రహానే చేసిన ఈ వ్యాఖ్య కేకేఆర్ మేనేజ్మెంట్, క్రికెట్ ఆస్ట్రేలియా (CA) మధ్య ఉన్న సమన్వయంపై మరిన్ని ప్రశ్నలకు దారితీసింది.
Also Read: Green S** : పర్యావరణ హిత శృంగారాన్ని కోరుకుంటున్న యువత ..ఏంటి పర్యావరణ హిత శృంగారం ?
క్రికెట్ ఆస్ట్రేలియా వివరణ
క్రికెట్ ఆస్ట్రేలియా ఈ విషయంపై స్పందిస్తూ గ్రీన్కు వీపు భాగంలో స్వల్ప గాయం అయినట్లు ధృవీకరించింది. ప్రాక్టీస్ సెషన్లలో అతని వర్క్లోడ్ను క్రమంగా పెంచుతామని, తద్వారా సరైన సమయంలో అతను మళ్లీ బౌలింగ్ ప్రారంభించేలా చూస్తామని కేకేఆర్ ఫ్రాంచైజీకి ముందే సమాచారం అందించినట్లు పేర్కొంది. గ్రీన్ ఇటీవల వెస్ట్రన్ ఆస్ట్రేలియా, న్యూ సౌత్ వేల్స్ మధ్య జరిగిన షెఫీల్డ్ షీల్డ్ మ్యాచ్లో కూడా కేవలం బ్యాటర్గా మాత్రమే ఆడాడు. పైగా, ఈ ఆల్ రౌండర్కు 2024లో వీపు శస్త్రచికిత్స కూడా జరిగింది.
బౌలింగ్లోకి ఎప్పుడు తిరిగి వస్తాడు?
క్రికెట్ ఆస్ట్రేలియా ప్రతినిధి మాట్లాడుతూ.. కామెరాన్ గ్రీన్కు వీపు కింది భాగంలో గాయం అయింది. దానికి చికిత్స జరుగుతోంది. దీని కారణంగా అతను కొంతకాలం బౌలింగ్కు దూరంగా ఉండాల్సి ఉంటుంది. ప్రస్తుతం అతను భారత్లో తన బౌలింగ్ ప్రాక్టీస్ను మళ్లీ ప్రారంభిస్తున్నాడు. సుమారు 10-12 రోజులలో అతను బౌలింగ్లోకి తిరిగి వచ్చే అవకాశం ఉంది. ఈ విషయంపై కేకేఆర్కు పూర్తి అవగాహన ఉంది అని తెలిపారు.
రూ. 25.20 కోట్లకు కొనుగోలు
గత ఏడాది డిసెంబర్లో జరిగిన ఐపీఎల్ వేలంలో కేకేఆర్ ఈ ఆల్ రౌండర్ను 25.20 కోట్ల రూపాయల భారీ ధరకు కొనుగోలు చేసింది. దురదృష్టవశాత్తు ఈ ఏడాది గ్రీన్ ప్రదర్శన అంత ఆశాజనకంగా లేదు. అతను టీ20 ఇంటర్నేషనల్స్లో కేవలం 117 పరుగులు చేసి, 2 వికెట్లు మాత్రమే తీశాడు. అయితే 2025-26 యాషెస్ సిరీస్లో ఈ ఆల్ రౌండర్ 24 సగటుతో 4 వికెట్లు పడగొట్టాడు.