భారత్ – దక్షిణాఫ్రికా రెండో టెస్టులో టీమిండియాకు విజయం కష్టతరమైంది. సౌతాఫ్రికా తొలి ఇన్నింగ్స్‌లో భారీ స్కోరు సాధించింది. టెయిలెండర్స్ కూడా రాణించడంతో సఫారీలు 489 పరుగులు చేశారు. గువాహటి పిచ్ బౌలర్లకు సహకరించలేదని, ఇది బ్యాటింగ్‌కు అనుకూలంగా ఉందని కుల్దీప్ యాదవ్ వ్యాఖ్యానించాడు. బౌలర్లు నిరాశ చెందారని, అయితే నేర్చుకోవాలని కూడా చెప్పడం విశేషం. టెస్టు క్రికెట్‌లో సవాళ్లు ఎదుర్కోవాలంటే ఇలాంటి పిచ్‌ల మీదే సాధ్యమని కుల్దీప్ పేర్కొన్నాడు.
భారత్ – దక్షిణాఫ్రికా రెండో టెస్టులో టీమిండియాకు విజయం దాదాపు దూరమైనట్టే అని చెప్పొచ్చు. టాస్ గెలిచి బ్యాటింగ్‌కి వచ్చిన సౌతాఫ్రికా తొలి ఇన్నింగ్స్‌ను రెండు రోజుల పాటు ఆడింది. భారత బౌలర్లు ఎంత కష్టపడినా వికెట్లు దొరకనే దొరకలేదు. బుమ్రాతో పాటు స్పిన్నర్లు సైతం ఎంతో చమటోడ్చారు. అయినా కూడా ఫలితం లభించలేదు. ఈ టెస్టులో టెయిలెండర్స్ కూడా సెంచరీలు చేయడం విశేషం.
తొలి రోజు ఆట ముగిసే సమయానికి దక్షిణాఫ్రికా స్కోర్ 247/6. దాంతో రెండో రోజు ఆట ప్రారంభమైన కొద్దిసేపటికే ఆలౌట్ అవుతుందని అందరూ అనుకున్నారు. 300లోపే సఫారీలను కట్టడి చేస్తారని అందరూ భావించారు. అయితే లోయర్ ఆర్డర్ తీవ్ర ప్రతిఘటించడంతో సఫారీలు 489 పరుగుల భారీ స్కోర్ నమోదు చేశారు. సెనురాన్ ముత్తుసామీ సెంచరీ చేయగా, మార్కో యాన్సన్ 93 పరుగులతో సెంచరీ మిస్ చేసుకున్నాడు.
తొలి ఇన్నింగ్స్‌లో నాలుగు వికెట్లు తీసుకున్న చైనామన్ స్పిన్నర్ కుల్దీప్ యాదవ్ గువాహటి పిచ్‌పై సెటైర్లు విసిరాడు. అయితే ఈడెన్ గార్డెన్స్ పిచ్ కంటే గువాహటి టెస్టు క్రికెట్‌కు కొంత అనుకూలంగా ఉంటుందని చెప్పుకొచ్చాడు. మొత్తానికి గువాహటి పిచ్ బౌలర్లను తీవ్ర నిరాశ పరిచిందని చెప్పాడు.
కోల్‌కతా పిచ్ వేరేలా ఉంది.. ఇది అయితే పూర్తిగా బ్యాటింగ్ రోడ్డు లాంటింది అంటూ గువాహటి పిచ్‌పై కుల్దీప్ యాదవ్ కామెంట్స్ చేశాడు. ప్రతిసారీ ఆధిపత్యం చూయించాలని ఉండదు. మంచి బ్యాటింగ్ పిచ్‌పై తిరిగి మళ్లీ ఎలా బౌలింగ్ ఆధిపత్యంలోకి వస్తామన్నదే ముఖ్యమైన విషయం. ఈ పిచ్‌లో బౌలర్లకు ఏ మాత్రం సహాయం దొరకలేదు. ఫాస్ట్ బౌలర్లకూ పెద్దగా సహాయం కనిపించలేదు. కానీ ఇదే టెస్ట్ క్రికెట్. ఇందులో ఎంజాయ్ చేయాలి, నేర్చుకోవాలి. పిచ్ గురించి ఎక్కువగా ఆలోచించాల్సిన అవసరం లేదు. తర్వాతి టెస్ట్‌కు మంచి పిచ్ దొరకొచ్చు అని అన్నాడు.
నిన్న మొదటి సెషన్‌లో కొద్దిగా తేమ ఉండడంతో కొంత టర్న్ దొరికింది. ఆ తర్వాత బ్యాటింగ్‌కు అద్భుతంగా మారింది. నిన్నా, ఇవాళా పెద్దగా టర్న్ లేదు. ఇవాళ అయితే పూర్తిగా బ్యాటింగ్ డే లాగా అనిపించింది. నేనూ, జడేజా కూడా ఇదే విషయంపై మాట్లాడుకున్నాం అని కుల్దీప్ యాదవ్ తొలి ఇన్నింగ్స్ అనంతరం చెప్పాడు.