Praful Hinge: విదర్భకు చెందిన 24 ఏళ్ల కుడిచేతి వాటం ఫాస్ట్ బౌలర్ ప్రఫుల్ హింగే ఐపీఎల్ మైదానంలో అడుగుపెట్టకముందు తన కెరీర్లో ఆడింది కేవలం ఒకే ఒక్క ప్రొఫెషనల్ టీ20 మ్యాచ్. సన్రైజర్స్ హైదరాబాద్ అతడిని కనీస ధర 30 లక్షల రూపాయలకే కొనుగోలు చేసింది. వేలంలో మరే ఇతర ఫ్రాంచైజీ కూడా అతని కోసం బిడ్ వేయడానికి ఆసక్తి చూపలేదు.
సోషల్ మీడియాలో ఫాలోవర్ల వెల్లువ
ఏప్రిల్ 13న రాజస్థాన్ రాయల్స్తో మ్యాచ్కు ముందు ప్రఫుల్ హింగే ఇన్స్టాగ్రామ్ ఖాతాకు కేవలం 3,000 మంది ఫాలోవర్లు మాత్రమే ఉన్నారు. సామాన్య క్రికెట్ అభిమానులకు అసలు అతని పేరే తెలియదు. కానీ సోమవారం సాయంత్రం వేసిన ఆ 6 బంతులు అతని జీవితాన్నే మార్చేశాయి. ఈ వార్త రాసే సమయానికి అతని ఫాలోవర్ల సంఖ్య 4 లక్షల 60 వేల మార్కును దాటేసింది.
Also Read: ఐపీఎల్ 2026.. పేలవ ప్రదర్శన చేస్తున్న ఆటగాళ్లు వీరే!
తొలి మ్యాచ్లోనే సంచలనం
రాజస్థాన్ రాయల్స్తో జరిగిన మ్యాచ్లో సన్రైజర్స్ హైదరాబాద్ యాజమాన్యం హింగేకు కొత్త బంతితో బౌలింగ్ చేసే అవకాశం ఇచ్చింది. కాగితంపై చూస్తే ఇది ఒక రిస్క్ లాగా అనిపించినప్పటికీ మైదానంలో అది మాస్టర్ ప్లాన్గా మారింది. క్రీజులో ఐపీఎల్ 2026 అత్యంత ప్రమాదకర ఓపెనింగ్ జోడీ వైభవ్ సూర్యవంశీ, యశస్వి జైస్వాల్లు ఉన్నారు. హింగే తన మొదటి బంతికి ఒక పరుగు ఇచ్చాడు. కానీ రెండో బంతికే సూర్యవంశీని ‘గోల్డెన్ డక్’గా అవుట్ చేయడంతో స్టేడియం హోరెత్తిపోయింది.
అక్కడితో ఈ పేసర్ ఆగలేదు. అదే ఓవర్లో ధ్రువ్ జురెల్ను క్లీన్ బౌల్డ్ చేశాడు. ఓవర్ ముగిసే సమయానికి లౌన్-డ్రే ప్రిటోరియస్ను కూడా పెవిలియన్కు పంపాడు. అంటే 6 బంతుల్లో 3 వికెట్లు! అదీ ఇన్నింగ్స్ మొదటి ఓవర్లోనే. ఐపీఎల్ చరిత్రలో ఇలా జరగడం ఇదే తొలిసారి. మ్యాచ్ ముగిసిన తర్వాత ప్రఫుల్ మాట్లాడుతూ.. “నేను దీనిని ముందే ఊహించాను. నేను ఆడే మొదటి మ్యాచ్లోనే 4 లేదా 5 వికెట్లు తీస్తానని గత ఏడాదే ఎక్కడో రాసుకున్నాను” అని తెలిపాడు.
తర్వాతి ఓవర్లో రాజస్థాన్ రాయల్స్ కెప్టెన్ రియాన్ పరాగ్ను కూడా అవుట్ చేశాడు. అతని బౌలింగ్ గణాంకాలు ఇలా ఉన్నాయి. 3 ఓవర్లు, 18 పరుగులు, 4 వికెట్లు. ఇందులో 13 డాట్ బాల్స్ ఉండటం విశేషం. అద్భుత ప్రదర్శనతో ‘ప్లేయర్ ఆఫ్ ది మ్యాచ్’ అవార్డును అందుకున్నాడు. ఈ మ్యాచ్లో SRH 57 పరుగుల తేడాతో ఘనవిజయం సాధించింది.