Jofra Archer: రాజస్థాన్ రాయల్స్ స్టార్ ఫాస్ట్ బౌలర్ జోఫ్రా ఆర్చర్.. కోల్కతా నైట్ రైడర్స్ (KKR)తో జరిగిన మ్యాచ్లో నిప్పులు చెరిగే బౌలింగ్తో చరిత్ర సృష్టించాడు. ఒకే సీజన్లో మరోసారి ఇన్నింగ్స్ మొదటి బంతికే వికెట్ తీసి అందరినీ ఆశ్చర్యపరిచాడు. కేకేఆర్ తరపున బ్యాటింగ్కు వచ్చిన టిమ్ సీఫెర్ట్ను ఆర్చర్ తన తొలి బంతికే క్లీన్ బౌల్డ్ చేశాడు. ఈ సీజన్లో ఒక బ్యాటర్ను ఇన్నింగ్స్ మొదటి బంతికే అవుట్ చేయడం ఆర్చర్కు ఇది రెండోసారి. దీని ద్వారా అతను మహమ్మద్ షమీ పేరిట ఉన్న ఒక అరుదైన రికార్డును సమం చేశాడు.
షమీ రికార్డును సమం చేసిన ఆర్చర్
ఐపీఎల్ మ్యాచ్ రెండో ఇన్నింగ్స్లో బౌలింగ్ చేస్తూ ఇన్నింగ్స్ తొలి బంతికే వికెట్ తీసిన రెండో బౌలర్గా ఆర్చర్ నిలిచాడు. గతంలో రాజస్థాన్ రాయల్స్పై మహమ్మద్ షమీ ఈ ఘనత సాధించాడు. మొత్తంగా ఐపీఎల్లో ఇన్నింగ్స్ మొదటి బంతికే వికెట్ తీసిన జాబితాలో కూడా ఆర్చర్ ఇప్పుడు షమీ సరసన చేరాడు. వీరిద్దరూ ఇప్పటి వరకు 5 సార్లు ఈ ఘనత సాధించారు. ఈ సీజన్లో ఆర్చర్ ఇప్పటికే ఫిల్ సాల్ట్, అభిషేక్ శర్మలను కూడా తొలి బంతికే అవుట్ చేయడం గమనార్హం.
Also Read: గల్ఫ్ దేశాల్లో కొనసాగుతున్న ఉత్కంఠ.. హోర్ముజ్ జలసంధికి పొంచి ఉన్న ముప్పు!
కేకేఆర్ ఘన విజయం
జోఫ్రా ఆర్చర్ అద్భుతంగా రాణించినప్పటికీ ఈ మ్యాచ్లో రాజస్థాన్ రాయల్స్పై కోల్కతా నైట్ రైడర్స్ విజయం సాధించింది. కేకేఆర్ జట్టులో రింకూ సింగ్, అనుకుల్ రాయ్లు విజయంలో కీలక పాత్ర పోషించారు. ఈ సీజన్లో కోల్కతాకు ఇదే తొలి విజయం. రింకూ సింగ్ తిరిగి ఫామ్లోకి వస్తూ అద్భుత అర్ధ సెంచరీతో జట్టును గెలిపించాడు. అతను కేవలం 34 బంతుల్లో 53 పరుగులు చేసి అజేయంగా నిలిచాడు. మరోవైపు అనుకుల్ రాయ్ కూడా 16 బంతుల్లో 29 పరుగుల కీలక ఇన్నింగ్స్ ఆడాడు. వీరిద్దరి మధ్య 37 బంతుల్లో జరిగిన 76 పరుగుల మెరుపు భాగస్వామ్యం కేకేఆర్ విజయాన్ని ఖాయం చేసింది.