Dilshan Madushanka: ఐపీఎల్ 2026 సీజన్లో సన్రైజర్స్ హైదరాబాద్ జట్టులోకి సరికొత్త బౌలింగ్ అస్త్రం వచ్చి చేరింది. శ్రీలంకకు చెందిన లెఫ్ట్ ఆర్మ్ ఫాస్ట్ బౌలర్ దిల్షాన్ మదుశంక మంగళవారం రాజస్థాన్ రాయల్స్తో జరిగిన మ్యాచ్లో తన ఐపీఎల్ ప్రయాణాన్ని ప్రారంభించాడు. ఈ మ్యాచ్లో ఇంపాక్ట్ ప్లేయర్గా బరిలోకి దిగిన మదుశంక తన తొలి ఐపీఎల్ వికెట్ను తన స్వదేశీ ఆటగాడైన పథుమ్ నిస్సంకను అవుట్ చేయడం ద్వారా దక్కించుకోవడం విశేషం. మొత్తం నాలుగు ఓవర్లు బౌలింగ్ చేసిన అతను 36 పరుగులు ఇచ్చి ఒక వికెట్ సాధించి, జట్టు భారీ విజయంలో తనవంతు పాత్ర పోషించాడు.
మదుశంక ఐపీఎల్ ప్రయాణం కాస్త ఆసక్తికరంగా సాగింది. నిజానికి ఇతనిని సన్రైజర్స్ మేనేజ్మెంట్ వేలంలో కొనుగోలు చేయలేదు. బ్రైడన్ కార్స్ స్థానంలో కేవలం 75 లక్షల రూపాయల ఒప్పందంతో రిప్లేస్మెంట్ ఆటగాడిగా జట్టులోకి తీసుకుంది. అయితే అంతకుముందు 2024 సీజన్ కోసం ముంబై ఇండియన్స్ ఇతనిని 4.60 కోట్ల భారీ ధరకు కొనుగోలు చేసినప్పటికీ గాయం కారణంగా ఆ సీజన్ మొత్తానికి దూరం కావాల్సి వచ్చింది. ఇప్పుడు సన్రైజర్స్ తరఫున లభించిన అవకాశాన్ని అతను చక్కగా వినియోగించుకుంటున్నాడు.
Also Read: ICC: ఐసీసీ కీలక పదవి నుంచి వైదొలిగిన పీసీబీ మాజీ సీఈవో వాసిమ్ ఖాన్
అంతర్జాతీయ స్థాయిలో మదుశంకకు భారత్పై అద్భుతమైన రికార్డు ఉంది. ముఖ్యంగా 2023 వన్డే ప్రపంచకప్లో వాంఖడే వేదికగా టీమ్ ఇండియాతో జరిగిన మ్యాచ్లో అతను సృష్టించిన విధ్వంసం ఎవరూ మర్చిపోలేరు. ఆ మ్యాచ్లో రోహిత్ శర్మ, విరాట్ కోహ్లీ, శుభ్మన్ గిల్, సూర్యకుమార్ యాదవ్ వంటి దిగ్గజ బ్యాటర్లను అవుట్ చేసి ఐదు వికెట్ల ప్రదర్శనతో ప్రపంచ క్రికెట్ దృష్టిని ఆకర్షించాడు. తన కెరీర్లో ఇప్పటివరకు 28 వన్డేల్లో 50 వికెట్లు, 19 టీ20ల్లో 20 వికెట్లు తీసిన మదుశంక, ప్రపంచవ్యాప్తంగా వివిధ లీగ్లలో ఆడిన అనుభవాన్ని ఇప్పుడు సన్రైజర్స్ కోసం ఉపయోగిస్తున్నాడు. లెఫ్ట్ ఆర్మ్ పేసర్ కావడంతో మదుశంక రాక ఎస్ఆర్హెచ్ బౌలింగ్ విభాగానికి మరింత బలాన్ని ఇస్తోంది.