IND vs NZ: 2026 టీ20 వరల్డ్ కప్ ఫైనల్. భారత్- న్యూజిలాండ్ జట్ల మధ్య టైటిల్ పోరు జరగనుంది. ఈ ఫైనల్ మ్యాచ్ అహ్మదాబాద్లోని నరేంద్ర మోదీ స్టేడియంలో నిర్వహించనున్నారు. ఫైనల్లో కూడా టీమ్ ఇండియానే ఫేవరెట్గా కనిపిస్తోంది. డిఫెండింగ్ ఛాంపియన్ అయిన భారత్ వరుసగా రెండోసారి టీ20 ప్రపంచ కప్ టైటిల్ను గెలవాలని పట్టుదలతో ఉంది. గతంలో 2007లో ఎంఎస్ ధోనీ నాయకత్వంలో ఆ తర్వాత 2024లో రోహిత్ శర్మ సారథ్యంలో భారత్ ఛాంపియన్గా నిలిచింది. ఇప్పుడు సూర్యకుమార్ యాదవ్ కూడా అదే ఘనతను పునరావృతం చేయాలని చూస్తున్నారు. మరోవైపు న్యూజిలాండ్ జట్టు తొలిసారి టీ20 ప్రపంచ కప్ టైటిల్ను కైవసం చేసుకోవాలని లక్ష్యంగా పెట్టుకుంది.
భారత్ నాలుగోసారి, న్యూజిలాండ్ రెండోసారి ఐసీసీ టీ20 వరల్డ్ కప్ ఫైనల్కు చేరుకున్నాయి. భారత్ గతంలో రెండుసార్లు ఛాంపియన్గా నిలవగా ఒకసారి ఫైనల్లో శ్రీలంక చేతిలో ఓడిపోయింది. న్యూజిలాండ్ ఇప్పటివరకు ఒకే ఒక్కసారి ఫైనల్ ఆడి, ఆ మ్యాచ్లో ఓటమి పాలైంది. ఇప్పుడు కివీస్ జట్టు రెండోసారి ఫైనల్ ఆడబోతోంది. సెమీఫైనల్లో భారత్ ఇంగ్లాండ్ను ఓడించగా, న్యూజిలాండ్ దక్షిణాఫ్రికా వంటి బలమైన జట్టును మట్టికరిపించి ఫైనల్కు దూసుకొచ్చింది.
Also Read: ఫైనల్ మ్యాచ్ పిచ్ ఎలా ఉండబోతోంది?
నరేంద్ర మోదీ స్టేడియం పిచ్ రిపోర్ట్
అహ్మదాబాద్లోని నరేంద్ర మోదీ స్టేడియం పిచ్ బ్యాటర్లకు బాగా అనుకూలిస్తుంది. ఈరోజు కూడా ఇక్కడ హై-స్కోరింగ్ మ్యాచ్ జరిగే అవకాశం ఉంది. ఇది ఎర్ర మట్టి పిచ్, దీనిపై స్వల్పంగా గడ్డి ఉంటుంది. టీ20 ప్రపంచ కప్లో న్యూజిలాండ్పై ఉన్న ఓటముల పరంపరను తుడిచిపెట్టడానికి భారత్కు ఇది మంచి అవకాశం. ఫైనల్ మ్యాచ్ ఒత్తిడి, మంచు (Dew) ప్రభావం ఉండదు కాబట్టి టాస్ గెలిచిన జట్టు ముందుగా బ్యాటింగ్ ఎంచుకునే అవకాశం ఉంది.
లైవ్ స్ట్రీమింగ్ వివరాలు
భారత్- న్యూజిలాండ్ మధ్య జరిగే ఈ ఫైనల్ మ్యాచ్ను మీరు టీవీలో స్టార్ స్పోర్ట్స్ నెట్వర్క్ ఛానళ్లలో ప్రత్యక్షంగా చూడవచ్చు. మొబైల్లో అయితే జియోస్టార్ యాప్లో లైవ్ స్ట్రీమింగ్ అందుబాటులో ఉంటుంది. మీరు వివిధ భాషల్లో ఈ ఉత్కంఠభరిత పోరును ఆస్వాదించవచ్చు.