ICC Chairman Jay Shah: T20 ప్రపంచకప్ 2026 చివరి దశకు చేరుకుంది. ఇక కేవలం ఫైనల్ మ్యాచ్ మాత్రమే మిగిలి ఉంది. ఇందులో న్యూజిలాండ్- భారత జట్లు మార్చి 8న తలపడనున్నాయి. సూపర్ 8 రౌండ్లో భారత్ చేతిలో ఓడి టోర్నమెంట్ నుండి నిష్క్రమించిన వెస్టిండీస్ జట్టు క్రీడాకారులు ఇప్పటికీ భారతదేశంలోనే చిక్కుకుపోయారు. మధ్యప్రాచ్యంలో జరుగుతున్న యుద్ధం కారణంగా ఎయిర్స్పేస్ మూసివేయబడింది. దీనివల్ల టోర్నమెంట్లో పాల్గొన్న జట్లు స్వదేశానికి వెళ్లడంలో ఇబ్బందులు ఎదుర్కొంటున్నాయి. ఈ నేపథ్యంలో ఐసీసీ ఛైర్మన్ జై షా మరోసారి అందరి ప్రశంసలు పొందేలా ఒక మంచి పని చేశారు.
వెస్టిండీస్ ఆటగాళ్ల స్వదేశానికి తిరుగు ప్రయాణం
‘టైమ్స్ ఆఫ్ ఇండియా’ కథనం ప్రకారం.. వెస్టిండీస్ జట్టు స్వదేశానికి వెళ్లడానికి ఐసీసీ ప్రత్యేక ఏర్పాట్లు చేసింది. ఆ జట్టు శుక్రవారం చార్టర్డ్ విమానంలో తమ స్వదేశానికి బయలుదేరుతుంది. ఈ విషయంపై ఒక వర్గం మాట్లాడుతూ.. వెస్టిండీస్ జట్టు శుక్రవారం ప్రత్యేక విమానంలో బయలుదేరుతుందని ధృవీకరించింది. ఐసీసీ ఛైర్మన్ జై షా, సీఈఓ సంజోగ్ గుప్తా వెస్టిండీస్ జట్టుతో నిరంతరం సంప్రదింపులు జరుపుతూ, వారిని సురక్షితంగా స్వదేశానికి పంపేలా చూశారని మరో వర్గం తెలిపింది.
Also Read: ఇరాన్కు సాయం చేస్తున్న రష్యా?!
దీనికి ముందు 2024లో బీసీసీఐ కార్యదర్శిగా ఉన్నప్పుడు కూడా జై షా బాధ్యతాయుతమైన నాయకత్వానికి ఉదాహరణగా నిలిచారు. బార్బడోస్లో చిక్కుకుపోయిన భారతీయ జర్నలిస్టులను కూడా ఆయన భారత జట్టుతో పాటు విమానంలోనే సురక్షితంగా భారతదేశానికి తీసుకొచ్చారు. అప్పుడు కూడా ఆయనపై ప్రశంసల జల్లు కురిసింది.
విడతల వారీగా బయలుదేరుతున్న జింబాబ్వే జట్టు
వెస్టిండీస్తో పాటు జింబాబ్వే ఆటగాళ్లు కూడా మధ్యప్రాచ్యంలో నెలకొన్న పరిస్థితుల కారణంగా భారతదేశంలోనే చిక్కుకుపోయారు. ఆ జట్టు ఫ్లైట్ దుబాయ్ మీదుగా వెళ్లాల్సి ఉండగా, యుద్ధం కారణంగా అది రద్దయింది. దీంతో ఐసీసీ మరో మార్గం ద్వారా ఆటగాళ్లను స్వదేశానికి పంపే ఏర్పాట్లు చేసింది. టీమ్ ప్లేయర్లు వేర్వేరు బ్యాచ్లలో స్వదేశానికి చేరుకుంటున్నారు. కొంతమంది ఆటగాళ్ల బృందం ఇప్పటికే వెనక్కి వెళ్ళిపోగా, మరో బృందం బయలుదేరాల్సి ఉంది. అందుతున్న సమాచారం ప్రకారం.. ఐసీసీ ఇప్పుడు దక్షిణాఫ్రికా జట్టు కోసం కూడా ప్రయాణ ప్రణాళికను సిద్ధం చేస్తోంది. వారిని ఇథియోపియన్ ఎయిర్లైన్స్ ద్వారా పంపే అవకాశం ఉంది.