ఆస్ట్రేలియాకు భారీ షాక్..తమ సెమీస్ అవకాశాలు దేవుడి దయపైనే ఆధారపడి ఉన్నాయన్న మార్ష్

ICC T20 World Cup 2026  ఈ టీ – 20 వరల్డ్‌కప్ టోర్నీలో ఆస్ట్రేలియా దారుణంగా విఫలమయింది. ఇప్పటి వరకు మూడు మ్యాచ్‌లు ఆడిన ఆసీస్ జట్టు కేవలం ఒక్క మ్యాచ్ మాత్రమే గెలిచి, రెండు మ్యాచ్‌లలో ఓటమిపాలయింది. ముఖ్యంగా శ్రీలంకతో జరిగిన డూ ఆర్ డై మ్యాచ్‌లో ఆస్ట్రేలియా 8 వికెట్ల తేడాతో ఓడిపోయింది. అదే సమయంలో ఆడిన రెండు మ్యాచ్‌లలో గెలిచిన జింబాబ్వే జట్టు సూపర్ 8కు వెళ్లే అవకాశాలు ఎక్కువగా కనిపిస్తున్నాయి.

• పాయింట్ల పట్టికలో మూడో స్థానంలో ఆస్ట్రేలియా
• వరుసగా రెండు మ్యాచ్‌లు గెలిచిన జింబాబ్వే
• ఐర్లాండ్‌-జింబాబ్వే మ్యాచ్‌తో తేలనున్న ఆసీస్ భవితవ్యం

ఐసీసీ టీ 20 వరల్డ్‌కప్ 2026లో ఆస్ట్రేలియా దారుణ ఓటములను మూటగట్టుకుంటోంది. సీనియర్ ఆటగాళ్లు దూరమవ్వడం, జట్టులో ఉన్న ప్లేయర్లు ఫామ్ కోల్పోవడంతో వరుస ఓటములు తప్పడం లేదు. జింబాబ్వే‌పై ఓటమితో కుదేలైన కంగారులకు.. ఇప్పుడు లంక షాక్ ఇచ్చింది. దాంతో ఈ టీ20 వరల్డ్‌కప్ నుంచి దాదాపు గ్రూప్ స్టేజ్ నుంచి బయటకెళ్లే పరిస్థితి వచ్చింది.

ఆస్ట్రేలియాకు అత్యంత బలమైన బౌలింగ్ త్రయం ఈ టీ20 వరల్డ్‌కప్‌కు దూరమైంది. టోర్నీ ప్రారంభానికి ముందే మిచెల్ స్టార్క్ రిటైర్మెంట్ ప్రకటించగా.. జోష్ హేజిల్‌వుడ్, ప్యాట్ కమిన్స్‌ల పేర్లను క్రికెట్ ఆస్ట్రేలియా స్క్వాడ్‌లో చేర్చింది. స్క్వాడ్ అనౌన్స్‌మెంట్ ఆఖరి రోజున ఫిట్‌నెస్ కారణంగా ప్యాట్ కమిన్స్ ఈ టోర్నీకి దూరమవ్వగా.. ఆ వెంటనే జోష్ హేజిల్‌వుడ్ కూడా రూలుడ్ అవుట్ అయ్యాడు.

గ్రూప్ బీలో ఆడుతున్న ఆస్ట్రేలియా ఐర్లాండ్‌పై తొలి మ్యాచ్‌లో 67 పరుగుల తేడాతో ఘన విజయం సాధించింది. ఐసీసీ టీ20 వరల్డ్‌కప్ 2007లో ఆసీస్‌కు షాకిచ్చిన జింబాబ్వే.. మళ్లీ ఇప్పుడు కూడా ఓడించింది. జింబాబ్వేపై ఆస్ట్రేలియా దారుణంగా 23 పరుగుల తేడాతో ఓటమిపాలయింది. ఇక డూ ఆర్ డై మ్యాచ్ అయిన శ్రీలంకపై ఆస్ట్రేలియా ఘనమైన ఆరంభం ఇచ్చినా.. మిడిలార్డర్ విఫలమవ్వడంతో 181 పరుగులు చేసింది. భారీ స్కోర్‌ను శ్రీలంక బ్యాటర్లు 18 ఓవర్లలోనే ఊదేసి ఆసీస్‌కు నిద్రలేకుండా చేశారు.

పాయింట్ల పట్టికను ఒకసారి పరిశీలిస్తే గ్రూప్ బీ నుంచి శ్రీలంక వరుసగా మూడు మ్యాచ్‌లు గెలిచి సూపర్ 8కు క్వాలిఫై అయింది. జింబాబ్వే నాలుగు పాయింట్లతో రెండో స్థానంలో ఉండగా.. ఆస్ట్రేలియా రెండు పాయింట్లతో మూడో స్థానంలో ఉంది. జింబాబ్వే రెండు మ్యాచ్‌లలో ఒకటి గెలిస్తే సూపర్ 8లో అడుగుపెడుతుంది. రన్‌రేట్ ప్రకారం చూసుకున్నా ఆస్ట్రేలియా కంటే జింబాబ్వే రన్‌రేట్ చాలా ఎక్కువగా ఉంది. ఆసీస్‌ తన చివరి మ్యాచ్‌ను ఒమన్‌తో ఆడనుంది. ఈ పరిస్థితులన్నింటి ఆధారంగా ఆస్ట్రేలియా ఈ టోర్నీ నుంచి దాదాపు ఎలిమినేట్ అయినట్టే అని చెప్పొచ్చు.

ఒకవేళ జింబాబ్వే జట్టు ఐర్లాండ్, శ్రీలంక మీద దారుణంగా ఓడిపోయి.. ఆస్ట్రేలియా ఒమన్‌పై భారీ విజయం సాధిస్తే సీన్ రివర్స్ అయ్యే పరిస్థితి ఉంటుంది. అప్పుడు జింబాబ్వే ఇంటి దారి పట్టనుండగా.. ఆస్ట్రేలియా సూపర్ 8కు వెళ్తుంది. జింబాబ్వే – ఐర్లాండ్ మ్యాచ్ ఫిబ్రవరి 17న జరగనుంది. దాంతో ఆసీస్ భవిష్యత్ జింబాబ్వే – ఐర్లాండ్ మ్యాచ్ మీదే ఆధారపడి ఉంది.