గంభీర్ రంజీ టీమ్‌కు కోచ్‌గా చెయ్.. అప్పుడే రెడ్ బాల్ క్రికెట్ గురించి తెలుసుకో ! టీమిండియా టెస్టు ఓటములపై ఇంగ్లండ్ మాజీ రియాక్షన్

Gautam Gambhir : భారత టెస్ట్ కోచింగ్ పై బీసీసీఐ, వీవీఎస్ లక్ష్మణ్ చర్చలు జరుగుతున్నాయనే వార్తల నేపథ్యంలో ఇంగ్లండ్ మాజీ స్పిన్నర్ మాంటీ పనేసర్ ఆసక్తికర వ్యాఖ్యలు చేశాడు. గౌతమ్ గంభీర్ వైట్ బాల్ ఫార్మాట్ లో సత్తా చాటినా, రెడ్ బాల్ క్రికెట్ లో ఇంకా నేర్చుకోవాలని, రంజీ ట్రోఫీ కోచ్ గా పనిచేసే వారి నుంచి సలహాలు, సూచనలు తీసుకుంటే బాగుంటుందని సూచించాడు. బీసీసీఐ మాత్రం కొత్త కోచ్ విషయంలో వస్తున్న వార్తలను ఖండించింది.

• గంభీర్ రంజీ టీమ్‌కు కోచ్‌గా పనిచేయాలి
• అప్పుడే రెడ్ బాల్ క్రికెట్ గురించి తెలుస్తుంది
• టీమిండియా టెస్టు ఓటములపై మాంటీ పనేసర్ రియాక్షన్

భారత టెస్ట్ జట్టు కోచింగ్ విషయంలో బీసీసీఐ – వీవీఎస్ లక్ష్మణ్ చర్చలు జరుగుతున్నాయనే వార్తలు వైరల్ అవుతున్న వేళ ఇంగ్లండ్ మాజీ స్పిన్నర్ మాంటీ పనేసర్ ఆసక్తికర వ్యాఖ్యలు చేశాడు. ప్రస్తుత హెడ్ కోచ్ గౌతమ్ గంభీర్‌ను నేరుగా తప్పించాల్సిన అవసరం లేదని, అయితే రెడ్ బాల్ క్రికెట్‌ను లోతుగా అర్థం చేసుకోవాలంటే రంజీ ట్రోఫీ జట్టుకు కోచ్‌గా పనిచేయాలి అని సూచించాడు.

గంభీర్ వైట్ బాల్ ఫార్మాట్‌లో తన సత్తా చాటుకున్నాడని పనేసర్ ప్రశంసించాడు. ఈ ఏడాది భారత్‌ను ఛాంపియన్స్ ట్రోఫీ అలాగే పురుషుల టీ20 ఆసియా కప్ విజేతగా నిలిపిన ఘనత గంభీర్‌దేనని గుర్తుచేశాడు. అయితే అదే స్థాయిలో టెస్ట్ క్రికెట్‌లో ఫలితాలు రాకపోవడంపై ప్రశ్నలు తలెత్తుతున్నాయని అన్నాడు.

గౌతమ్ గంభీర్ వైట్ బాల్ కోచ్‌గా విజయవంతం అయ్యాడు. కానీ రెడ్ బాల్ క్రికెట్ విషయంలో ఇంకా నేర్చుకోవాల్సిన అవసరం ఉంది. అతడు రంజీ ట్రోఫీ కోచ్‌గా పనిచేస్తే, దేశవాళీ కోచ్‌లతో మాట్లాడి, టెస్ట్ జట్టును ఎలా నిర్మించాలో అర్థం చేసుకోగలడు. ప్రస్తుతం భారత టెస్ట్ జట్టు బలంగా లేదు. ఇదే నిజం. ముగ్గురు సీనియర్ ఆటగాళ్లు రిటైర్ అయితే, మిగిలినవాళ్లను సిద్ధంగా ఉంచడం కష్టం అవుతుంది” అని పనేసర్ స్పష్టం చేశాడు.

ఇటీవల దక్షిణాఫ్రికాతో జరిగిన రెండు టెస్టుల సిరీస్‌లో భారత్ 0-2 తేడాతో వైట్‌వాష్ కావడంతో, టెస్ట్ జట్టు కోచింగ్‌పై చర్చలు మొదలయ్యాయి. ఈ నేపథ్యంలో బీసీసీఐ పెద్దలు వీవీఎస్ లక్ష్మణ్‌ను సంప్రదించారనే కథనాన్ని నేషనల్ మీడియా వెల్లడించింది.

ఇది తొలిసారి కాదని, రాహుల్ ద్రవిడ్ పదవీ కాలం ముగిసిన తర్వాత కూడా లక్ష్మణ్‌ను బోర్డు సంప్రదించిందని రిపోర్ట్ పేర్కొంది. అయితే, బెంగళూరులోని సెంటర్ ఆఫ్ ఎక్సలెన్స్‌లో హెడ్ ఆఫ్ క్రికెట్‌గా తన పాత్రతో సంతృప్తిగా ఉన్నానని చెప్పి, లక్ష్మణ్ రెండు సార్లు ఆ ఆఫర్‌ను తిరస్కరించినట్టు సమాచారం. ఈ వార్తలపై బీసీసీఐ కార్యదర్శి దేవజిత్ సైకియా స్పందిస్తూ, కోచింగ్ మార్పులపై జరుగుతున్న కథనాలను పూర్తిగా ఖండించారు.

ఇది పూర్తిగా అవాస్తవం. ఊహాగానాల ఆధారంగా వస్తున్న వార్తలివి. బీసీసీఐ ఎలాంటి నిర్ణయం తీసుకోలేదు. ఇది ఎవరో సృష్టించిన కథ మాత్రమే” అని సైకియా స్పష్టం చేశారు. ప్రస్తుతం గంభీర్‌కు బీసీసీఐలో మద్దతు కొనసాగుతూనే ఉన్నా, టెస్ట్ ఫార్మాట్‌లో ఫలితాలు రాకపోవడం వల్ల రాబోయే రోజుల్లో ఈ అంశం మరింత వేడెక్కే అవకాశముందని క్రికెట్ వర్గాలు భావిస్తున్నాయి.