Ajit Pawar మహారాష్ట్ర రాజకీయాల్లో కీలక నేత, ఉప ముఖ్యమంత్రి అజిత్ పవార్ (Ajit Pawar) బారామతి సమీపంలో జరిగిన విమాన ప్రమాదంలో మృతి చెందిన విషయం తెలిసిందే. ఈ విషాద ఘటన చోటుచేసుకోవడానికి కొన్ని గంటల ముందు, ఆయన తన ‘ఎక్స్’ (ట్విట్టర్) ఖాతా ద్వారా ప్రజలకు ఒక సందేశం పంపారు. ‘మీ నమ్మకమైన ప్రభుత్వం’ తీసుకున్న పలు నిర్ణయాలను వివరిస్తూ ఆయన చేసిన ఈ పోస్ట్, ఆయన చివరి సందేశంగా మిగిలిపోయింది.
వృత్తి విద్యా శిక్షణా సంస్థల ఏర్పాటు, పబ్లిక్ వర్క్స్ డిపార్ట్మెంట్ కాంట్రాక్టర్ల చెల్లింపుల వ్యవస్థలో మార్పులు, ప్రభుత్వ భూముల లీజుల పొడిగింపు వంటి అంశాలను ఆయన తన పోస్ట్లో ప్రస్తావించారు. పైకి ఇది సాధారణ ప్రభుత్వ కార్యకలాపాల సమాచారంగా కనిపించినప్పటికీ, దీని వెనుక ఇటీవలి రాజకీయ పరిణామాలు ముడిపడి ఉన్నాయి. ముఖ్యమంత్రి దేవేంద్ర ఫడ్నవీస్ నేతృత్వంలోని ‘మహాయుతి’ కూటమిలో అంతర్గత విభేదాల తర్వాత, అంతా సవ్యంగా ఉందని చెప్పే ప్రయత్నంగా ఈ పోస్ట్ను విశ్లేషకులు భావించారు.
Ajit Pawar Tweet
ఇటీవల జరిగిన ముంబై, పూణె, పింప్రి-చించ్వాడ్ సహా 28 నగరాల మున్సిపల్ ఎన్నికల సమయంలో బీజేపీతో అజిత్ పవార్కు తీవ్ర విభేదాలు తలెత్తాయి. సీట్ల పంపకాల విషయంలో బీజేపీ ఆయన్ను పక్కనపెట్టడంతో అజిత్ తన బాబాయ్, ఎన్సీపీ అధినేత శరద్ పవార్తో తాత్కాలికంగా చేతులు కలిపారు. కుటుంబ కలహాలను పక్కనపెట్టి పూణె, పింప్రి-చించ్వాడ్ ఎన్నికల్లో కలిసి పోటీ చేశారు. ఈ ప్రచారంలో ఆయన తన మిత్రపక్షమైన బీజేపీపైనే అవినీతి ఆరోపణలు చేస్తూ తీవ్ర విమర్శలు చేశారు.
అయితే, ఈ ఎన్నికల్లో బీజేపీ చేతిలో పవార్ కుటుంబం ఓటమి చవిచూసింది. దీంతో కూటమిలో అజిత్ పవార్ రాజకీయ ప్రాబల్యం గణనీయంగా తగ్గినట్లయింది. ఎన్నికల తర్వాత మారిన రాజకీయ సమీకరణాల మధ్య ఆయన తిరిగి డిప్యూటీ సీఎంగా బాధ్యతలు చేపట్టారు. కానీ, ఇంతలోనే విమాన ప్రమాదం రూపంలో మృత్యువు ఆయన్ను కబళించడంతో అజిత్ రాజకీయ ప్రస్థానం విషాదాంతంగా ముగిసింది.