ఈ ఎన్నిక‌ల‌కు ప‌ర్పుల్ మార్క‌ర్‌ను ఉప‌యోగిస్తార‌ని మీకు తెలుసా?

Rajya Sabha Election: రాజ్యసభ ఎన్నికలు, రాష్ట్రపతి ఎన్నికలు, విధాన పరిషత్ (MLC) ఎన్నికలలో ఓటు వేయడానికి ఒక ప్రత్యేకమైన పెన్నును ఉపయోగిస్తారు. ఈ మూడు ఎన్నికలు బ్యాలెట్ పేపర్ ద్వారా జరుగుతాయి కాబట్టి ఆ పేపర్‌పై ఓటును మార్క్ చేయడానికి ఓటర్లకు ఎన్నికల సంఘం తరపున ఊదా రంగు మార్కర్ పెన్నును అందిస్తారు. ఈ పెన్ను కాకుండా వేరే ఏ పెన్నును ఉపయోగించడానికి అనుమతి ఉండదు. దీనిని ప్రిజైడింగ్ ఆఫీసర్ ఓటరుకు అందజేస్తారు. ఓటు వేసిన తర్వాత తిరిగి ఆయనకే అప్పగించాలి.

ఊదా రంగు మార్కర్ పెన్నునే ఎందుకు ఉపయోగిస్తారు?

రాజ్యసభ ఎన్నికలలో బ్యాలెట్ పేపర్ ద్వారా ప్రాధాన్యత క్రమంలో ఓటింగ్ జరుగుతుంది. ఎమ్మెల్యేలు బ్యాలెట్ పేపర్‌పై ఉన్న అభ్యర్థుల పేర్ల ఎదురుగా తమ ఇష్టాన్ని బట్టి 1, 2, 3… అని ప్రాధాన్యత సంఖ్యలను కేటాయించాలి. ఈ ఓటింగ్ విధానాన్ని ‘ఓపెన్ బ్యాలెట్ ఓటింగ్ సిస్టమ్’ అంటారు. తమకు నచ్చిన అభ్యర్థికి ప్రాధాన్యత సంఖ్యను కేటాయించిన తర్వాత ఎమ్మెల్యేలు తమ బ్యాలెట్ పేపర్‌ను తమ పార్టీ తరపున నియమించబడిన ఏజెంట్‌కు చూపించడం తప్పనిసరి. ఓటు ప్రామాణికతను, గోప్యతను కాపాడటమే ఈ ప్రత్యేక పెన్నును ఉపయోగించడం వెనుక ఉన్న ప్రధాన ఉద్దేశ్యం.

ఊదా రంగు మార్కర్ ప్రత్యేకత

ఈ మార్కర్ పెన్ను ప్రత్యేకత ఏమిటంటే.. దీని సిరా (Ink) అంత త్వరగా చెరిగిపోదు, పాడవదు. ఇది ఎక్కువ కాలం చెక్కుచెదరకుండా ఉంటుంది. ఒక్క పెన్నుతో సుమారు 1000 సార్లు ఓటు వేయడం సాధ్యమవుతుంది. ఈ పెన్నులను కర్ణాటకలోని మైసూర్ పెయింట్స్ అండ్ వార్నిష్ లిమిటెడ్ అనే సంస్థ తయారు చేస్తుంది. దీనికి ప్రభుత్వం యజమానిగా ఉంటుంది. ఈ సంస్థను 1937లో మైసూర్ అప్పటి మహారాజు నల్వాడి కృష్ణరాజ వడియార్ స్థాపించారు. 1962 నుండి ఓటర్ల వేలిపై వేసే సిరాను కూడా ఈ సంస్థే సరఫరా చేస్తోంది.

ఓటు ఎప్పుడు చెల్లదు (రద్దు అవుతుంది)?

రాజ్యసభ ఎన్నికల్లో వేసిన ఓటు కొన్ని సందర్భాల్లో రద్దు అయ్యే అవకాశం ఉంది.

• బ్యాలెట్ పేపర్‌పై ప్రాధాన్యత సంఖ్యలు (1, 2, 3…) కాకుండా మరేదైనా రాస్తే ఓటు రద్దు అవుతుంది.
• సంఖ్యను కేటాయించిన బాక్స్ వెలుపల రాసినా ఓటు చెల్లదు.
• బ్యాలెట్ పేపర్‌ను మడిచే ముందు పార్టీ అధీకృత ఏజెంట్‌కు చూపించకపోతే ఓటు రద్దు అవుతుంది.
• ఏజెంట్‌కు కాకుండా మరెవరికైనా బ్యాలెట్ పేపర్‌ను చూపించినా అది చెల్లదు.
• ఎన్నికల సంఘం ఇచ్చిన ఊదా రంగు మార్కర్ కాకుండా వేరే రంగు పెన్ను లేదా పెన్సిల్ ఉపయోగిస్తే ఓటు రద్దు అవుతుంది.
• బ్యాలెట్ పేపర్‌ను తప్పుగా మడతపెట్టినా లేదా దానిని పాడూ చేసినా ఓటు చెల్లదు.