బిహార్లోని బక్సర్ జిల్లాలో జరిగిన ఒక వివాహ వేడుక విషాదాంతంగా మారింది. పెళ్లి కుమార్తె తనను కాదని వేరొకరిని పెళ్లి చేసుకుంటోందన్న కక్షతో, ఒక యువకుడు అత్యంత కిరాతకానికి ఒడిగట్టాడు. బంధుమిత్రుల సందడి, మంగళవాయిద్యాల మధ్య వేడుకగా సాగుతున్న సమయంలో.. నిందితుడు ఒక్కసారిగా పెళ్లి వేదికపైకి దూసుకెళ్లాడు. అందరూ చూస్తుండగానే తన వెంట తెచ్చుకున్న తుపాకీతో వధువు ఛాతీపై నేరుగా కాల్పులు జరిపాడు. ఊహించని ఈ దాడితో పెళ్లి మండపం ఒక్కసారిగా హాహాకారాలతో నిండిపోయింది.
ఈ దాడి వెనుక ఉన్న నేపథ్యం ‘విఫల ప్రేమ’ అని ప్రాథమిక విచారణలో తెలుస్తోంది. నిందితుడు గత కొంతకాలంగా సదరు యువతిని ప్రేమిస్తున్నానని, ఆమె తననే పెళ్లి చేసుకోవాలని వేధించేవాడని సమాచారం. అయితే ఆమె కుటుంబ సభ్యులు వేరే సంబంధం ఖాయం చేసి వివాహం జరిపిస్తుండటంతో, “నేను దక్కనిది ఇంకెవరికీ దక్కకూడదు” అనే వికృత ఆలోచనతోనే నిందితుడు ఈ దారుణానికి పాల్పడ్డాడు. కాల్పుల అనంతరం నిందితుడు అక్కడి నుంచి పరారవ్వగా, ప్రస్తుతం దీనికి సంబంధించిన వీడియో సోషల్ మీడియాలో వైరల్ అవుతూ అందరినీ కలచివేస్తోంది.
గుండు దెబ్బ తగిలిన వధువు అక్కడికక్కడే కుప్పకూలిపోగా, హుటాహుటిన ఆమెను స్థానిక ఆసుపత్రికి తరలించారు. ప్రస్తుతం ఆమె పరిస్థితి అత్యంత విషమంగా ఉందని, వైద్యులు ప్రాణాలను కాపాడేందుకు తీవ్రంగా శ్రమిస్తున్నారని సమాచారం. పోలీసులు ఘటన స్థలానికి చేరుకుని కేసు నమోదు చేసి, పరారీలో ఉన్న నిందితుడి కోసం గాలింపు చర్యలు చేపట్టారు. బహిరంగంగా, అందరి ముందూ ఇలాంటి సాహసానికి పాల్పడటం ఆ ప్రాంతంలో శాంతి భద్రతల పరిస్థితిపై ఆందోళన కలిగిస్తోంది.