కరోనా కష్టకాలంలో వేలాది మందికి అండగా నిలిచి ‘రియల్ హీరో’గా గుర్తింపు తెచ్చుకున్న నటుడు సోనూసూద్, మరోసారి తన ఉదారతను చాటుకున్నారు. ప్రస్తుతం ఇరాన్-ఇజ్రాయెల్ యుద్ధ మేఘాలు కమ్ముకున్న నేపథ్యంలో మిడిల్ ఈస్ట్లో నెలకొన్న ఉద్రిక్తతలతో దుబాయ్లో చిక్కుకుపోయిన పర్యాటకులకు ఆయన భరోసా ఇచ్చారు. యుద్ధం కారణంగా విమాన సర్వీసులు రద్దు కావడంతో పాటు, అనిశ్చితి నెలకొన్న తరుణంలో పర్యాటకులు ఇబ్బంది పడకూడదనే ఉద్దేశంతో సోనూసూద్ తన వంతు సాయం ప్రకటించారు.
యుద్ధ పరిస్థితులు సద్దుమణిగి, పరిస్థితులు సాధారణ స్థితికి చేరుకుని పర్యాటకులు తమ స్వదేశాలకు తిరిగి వెళ్లే వరకు ఉచితంగా వసతి, భోజన సౌకర్యాలు కల్పిస్తామని సోనూసూద్ హామీ ఇచ్చారు. ఈ మేరకు ఆయన సోషల్ మీడియాలో ఒక వీడియోను విడుదల చేస్తూ, కేవలం భారతీయులే కాకుండా ఇతర దేశాలకు చెందిన పర్యాటకులు కూడా తమ సేఫ్ హౌస్లలో ఉండొచ్చని స్పష్టం చేశారు. ఎవరైనా ఇబ్బందుల్లో ఉంటే లేదా సురక్షితమైన ఆశ్రయం కావాలంటే తన ఇన్స్టాగ్రామ్ ఖాతాకు నేరుగా మెసేజ్ పంపాలని ఆయన సూచించారు.
సోనూసూద్ తీసుకున్న ఈ నిర్ణయంపై సోషల్ మీడియాలో ప్రశంసలు వెల్లువెత్తుతున్నాయి. “ప్రభుత్వాలు ఆలోచించకముందే సోనూసూద్ స్పందిస్తారు” అంటూ నెటిజన్లు కొనియాడుతున్నారు. క్లిష్ట పరిస్థితుల్లో విదేశీ గడ్డపై ఉన్న వారికి కొండంత అండగా నిలుస్తున్న ఆయన తీరు మరోసారి మానవత్వాన్ని చాటిచెప్పింది. ఇప్పటికే తన టీమ్ దుబాయ్లో సమన్వయం చేసుకుంటోందని, బాధితులకు అవసరమైన అన్ని రకాల సహాయ సహకారాలు అందిస్తామని ఆయన పేర్కొన్నారు.