నమో భారత్ రైలు, మీరట్ మెట్రోను ప్రారంభించనున్న ప్రధాని మోదీ!

PM Modi: దేశంలోని పట్టణ రవాణా ముఖచిత్రాన్ని మార్చే దిశగా ఉత్తరప్రదేశ్‌లోని మీరట్‌లో ఫిబ్రవరి 22న ఒక చారిత్రాత్మక ఆరంభం జరగబోతోంది. ప్రధానమంత్రి నరేంద్ర మోదీ ఫిబ్రవరి 22న మీరట్‌లో పర్యటించనున్నారు. ఈ సందర్భంగా సుమారు 12,930 కోట్ల రూపాయల విలువైన ప్రాజెక్టులకు ఆయన ప్రారంభోత్సవం, శంకుస్థాపన చేస్తారు. ఇందులో భారత్ మొట్టమొదటి ‘నమో భారత్ రీజినల్ రాపిడ్ ట్రాన్సిట్ సిస్టమ్’ (RRTS), మీరట్ మెట్రో ప్రధానమైనవి. ఈ పర్యటనలో అత్యంత కీలకమైన ఘట్టం.. 82 కిలోమీటర్ల పొడవైన ఢిల్లీ-మీరట్ నమో భారత్ కారిడార్‌ను జాతికి అంకితం చేయడం. నిర్ణీత షెడ్యూల్ ప్రకారం.. ప్రధానమంత్రి మధ్యాహ్నం 12:30 గంటలకు శతాబ్ది నగర్ నమో భారత్ స్టేషన్‌కు చేరుకుంటారు.

శతాబ్ది నగర్ నుండి ప్రారంభం.. మెట్రోలో ప్రయాణించనున్న ప్రధాని

ప్రధానమంత్రి శతాబ్ది నగర్ నమో భారత్ స్టేషన్ వద్ద దేశంలోనే మొట్టమొదటి RRTS (నమో భారత్ రైలు), మీరట్ మెట్రోలను అధికారికంగా ప్రారంభిస్తారు. ప్రారంభోత్సవం అనంతరం పీఎం మోదీ స్వయంగా శతాబ్ది నగర్ నుండి మీరట్ సౌత్ స్టేషన్ వరకు మెట్రోలో ప్రయాణించి అక్కడి సౌకర్యాలను పరిశీలిస్తారు. ఆ తర్వాత మధ్యాహ్నం 1 గంటకు వివిధ అభివృద్ధి పనులను ప్రారంభించి, అనంతరం భారీ బహిరంగ సభను ఉద్దేశించి ప్రసంగిస్తారు.

Also Read: కారు వాడుతున్నారా? అయితే ఈ వార్త చ‌ద‌వాల్సిందే!

దేశంలోనే మొదటి ‘హైబ్రిడ్’ మోడల్, ఒకే పట్టాలపై రెండు రైళ్లు

ఈ ప్రాజెక్టులో అత్యంత విశేషమైన అంశం ఏమిటంటే.. నమో భారత్ RRTS, మీరట్ మెట్రోలు రెండూ ఒకే మౌలిక సదుపాయాలపై నడుస్తాయి. భారతదేశంలో ఇలాంటి ప్రయోగం జరగడం ఇదే మొదటిసారి. ఈ మోడల్ ద్వారా నగరాల మధ్య హై-స్పీడ్ ప్రయాణం, నగరం లోపల వేగవంతమైన ప్రయాణం కలిసిపోయి ఒకే సమీకృత రవాణా వ్యవస్థగా కొత్త ప్రమాణాలను నెలకొల్పుతుంది.

ఈ ప్రాజెక్టులో భాగంగా సరాయ్ కాలే ఖాన్, శతాబ్ది నగర్, బేగంపూర్, మోదీపురం అనే నాలుగు కొత్త స్టేషన్లు కూడా అందుబాటులోకి రానున్నాయి. ముఖ్యంగా సరాయ్ కాలే ఖాన్ స్టేషన్‌ను ‘మల్టీ-మోడల్ హబ్’గా అభివృద్ధి చేశారు. ఇది హజ్రత్ నిజాముద్దీన్ రైల్వే స్టేషన్, ఢిల్లీ మెట్రో, బస్సు సర్వీసులు, రింగ్ రోడ్డుతో అనుసంధానించబడి ఉంటుంది. ఈ ప్రాజెక్టు వల్ల ఢిల్లీ-NCR ప్రాంతంలో ట్రాఫిక్ ఒత్తిడి తగ్గడమే కాకుండా ప్రయాణ సమయం ఆదా అవుతుంది. కాలుష్యం కూడా గణనీయంగా తగ్గుతుంది.