BJP : సువేందు అధికారి కేబినెట్‌లో 35 కొత్త ముఖాలు.. 41కి చేరిన మంత్రివర్గ బలం

పశ్చిమ బెంగాల్ రాజకీయాల్లో కీలక పరిణామం చోటుచేసుకుంది. రాష్ట్రంలో భారీ మంత్రివర్గ విస్తరణ చేపట్టగా, సోమవారం 35 మంది కొత్త మంత్రులు ప్రమాణ స్వీకారం చేశారు. లోక్‌భవన్‌లో జరిగిన ఈ కార్యక్రమంలో గవర్నర్ ఆర్.ఎన్. రవి నూతన మంత్రులతో ప్రమాణ స్వీకారం చేయించారు. ముఖ్యమంత్రి సువేందు అధికారి సమక్షంలో జరిగిన ఈ కార్యక్రమంతో రాష్ట్ర మంత్రివర్గ బలం 41కు చేరుకుంది. అవినీతి నిరోధం, మహిళలపై నేరాల నివారణ, పరిపాలనా సామర్థ్యాన్ని పెంపొందించే లక్ష్యంతో ఇటీవల ప్రభుత్వం తీసుకున్న నిర్ణయాల నేపథ్యంలో ఈ మంత్రివర్గ విస్తరణకు ప్రాధాన్యత ఏర్పడింది. ఇటీవలి కాలంలో జరిగిన అతిపెద్ద మంత్రివర్గ విస్తరణల్లో ఇది ఒక‌టి. కొత్తగా ప్రమాణ స్వీకారం చేసిన వారిలో అనుభవజ్ఞులైన నాయకులతో పాటు యువ నాయకులు కూడా ఉన్నారు. ప్రభుత్వం కొనసాగింపు, కొత్త ఆలోచనల సమన్వయంతో ముందుకు సాగాలనే ఉద్దేశంతో ఈ విస్తరణ చేపట్టినట్లు తెలుస్తోంది. ప్రమాణ స్వీకారం అనంతరం కేబినెట్ మంత్రి అర్జున్ సింగ్ మాట్లాడుతూ.. ప్రజలు, పార్టీ, ప్రభుత్వం అప్పగించే ఏ బాధ్యతనైనా సమర్థంగా నిర్వర్తించేందుకు సిద్ధంగా ఉన్నానని తెలిపారు. ప్రజల ఆశయాలకు అనుగుణంగా పనిచేయడం మా ప్రాధాన్యత. కొత్త బాధ్యతలను స్వీకరించి వాటిని విజయవంతంగా పూర్తి చేయడానికి కృషి చేస్తాన‌ని ఆయ‌న తెలిపారు. మంత్రివర్గ విస్తరణకు ముందు ఎక్స్‌లో స్పందించిన ముఖ్యమంత్రి సువేందు అధికారి.. ఇది ప్రజాస్వామ్యబద్ధంగా ఎన్నికైన పశ్చిమ బెంగాల్ ప్రభుత్వ పూర్తి స్థాయి మంత్రివర్గ ఏర్పాటుగా అభివర్ణించారు. పారదర్శకత, ప్రజా సంక్షేమం, సమర్థ పరిపాలనకు తమ ప్రభుత్వం కట్టుబడి ఉందని ఆయన స్పష్టం చేశారు. కొత్తగా ప్రమాణ స్వీకారం చేసిన మంత్రులకు త్వరలో శాఖల కేటాయింపులు జరిగే అవకాశం ఉంది. రాష్ట్ర అభివృద్ధి, పరిపాలనా సంస్కరణలు, ప్రజా సమస్యల పరిష్కారంలో ఈ విస్తరించిన మంత్రివర్గం కీలక పాత్ర పోషించనుందని రాజకీయ విశ్లేషకులు భావిస్తున్నారు.