ప్రకృతి వైపరీత్యాలు, ఇతర అత్యవసర పరిస్థితుల్లో పౌరులను తక్షణమే అప్రమత్తం చేసేందుకు కేంద్ర ప్రభుత్వం శనివారం దేశవ్యాప్తంగా ఒక కీలక వ్యవస్థను పరీక్షించింది. ఇందులో భాగంగా దేశంలోని పలువురి మొబైల్ ఫోన్లకు ఉదయం 11.46 నిమిషాలకు భారీ శబ్దంతో, వైబ్రేషన్తో కూడిన ఒక ఎమర్జెన్సీ అలర్ట్ మెసేజ్ వచ్చింది. దీంతో చాలామంది ఒక్కసారిగా ఉలిక్కిపడ్డారు. అయితే, ఆందోళన చెందాల్సిన అవసరం లేదని, ఇది కేవలం ఒక పరీక్ష మాత్రమేనని ప్రభుత్వం స్పష్టం చేసింది. ‘సెల్ బ్రాడ్కాస్ట్ అలర్ట్’ పేరుతో రూపొందించిన ఈ వ్యవస్థ పనితీరును అంచనా వేయడానికే ఈ పరీక్ష నిర్వహించారు.
జాతీయ విపత్తు నిర్వహణ సంస్థ (ఎన్డీఎంఏ) ఈ దేశవ్యాప్త పరీక్షను చేపట్టింది. “మే 2న మీ ప్రాంతంలో ఎన్డీఎంఏ సెల్ బ్రాడ్కాస్ట్ అలర్ట్లను పరీక్షిస్తుంది. మీ మొబైల్ ఫోన్కు సందేశం అందిన తర్వాత ఎలాంటి చర్యలు తీసుకోవాల్సిన అవసరం లేదు. దయచేసి భయపడకండి” అని ఈ సందేశంలో పేర్కొన్నారు. భూకంపాలు, సునామీలు, పిడుగుపాట్లు వంటి ప్రకృతి విపత్తులతో పాటు, గ్యాస్ లీక్లు లేదా రసాయన ప్రమాదాల వంటి మానవ తప్పిదాల సమయంలోనూ నిర్దిష్ట భౌగోళిక ప్రాంతంలోని మొబైల్ వినియోగదారులకు తక్షణమే హెచ్చరికలు పంపడం ఈ వ్యవస్థ యొక్క ముఖ్య ఉద్దేశం.
ఈ ఇంటిగ్రేటెడ్ అలర్ట్ సిస్టమ్ (SACHET)ను పూర్తిగా దేశీయ పరిజ్ఞానంతో సెంటర్ ఫర్ డెవలప్మెంట్ ఆఫ్ టెలిమాటిక్స్ (C-DOT) అభివృద్ధి చేసింది. ఇది అంతర్జాతీయ టెలికమ్యూనికేషన్ యూనియన్ (ఐటీయూ) సిఫార్సు చేసిన కామన్ అలర్టింగ్ ప్రోటోకాల్ (సీఏపీ) ఆధారంగా పనిచేస్తుంది. గతంలో కూడా ప్రభుత్వం ఈ వ్యవస్థను కొన్నిసార్లు పరీక్షించినప్పటికీ, దేశవ్యాప్తంగా పూర్తిస్థాయిలో దీన్ని అందుబాటులోకి తీసుకురావడానికి ముందు వ్యవస్థ పనితీరును, విశ్వసనీయతను అంచనా వేయడంలో భాగంగానే తాజా పరీక్షలు నిర్వహిస్తున్నారు.
ఈ పరీక్షా సందేశాలు సెల్ బ్రాడ్కాస్ట్ టెస్ట్ ఛానెల్స్ ఎనేబుల్ చేసుకున్న మొబైల్ ఫోన్లకు అందాయి. దేశవ్యాప్తంగా పరీక్షలు పూర్తయిన తర్వాత ఈ మొబైల్ అలర్ట్ సిస్టమ్ను పూర్తిస్థాయిలో అమలు చేయనున్నారు. అప్పుడు అన్ని మొబైల్ హ్యాండ్సెట్లకు బహుళ భారతీయ భాషలలో హెచ్చరికలు పంపేందుకు ఏర్పాట్లు చేస్తున్నారు. విపత్తుల సమయంలో నష్టాన్ని తగ్గించి, పౌరుల ప్రాణాలను కాపాడటంలో ఈ వ్యవస్థ అత్యంత కీలక పాత్ర పోషిస్తుందని అధికారులు భావిస్తున్నారు.