ఐదు రాష్ట్రాల ఎన్నికల లెక్కింపు తుది దశకు చేరుకుంటున్న వేళ, జాతీయ పార్టీ అయిన కాంగ్రెస్కు మిశ్రమ ఫలితాలు ఎదురవుతున్నాయి. ముఖ్యంగా పశ్చిమ బెంగాల్లో ఆ పార్టీ పరిస్థితి అత్యంత దయనీయంగా మారింది. పశ్చిమ బెంగాల్ అసెంబ్లీలోని మొత్తం 294 స్థానాలకు గాను, ప్రస్తుత ట్రెండ్స్ ప్రకారం కాంగ్రెస్ పార్టీ ఒక్క చోట కూడా ఆధిక్యంలో లేదు. గతంలో కంచుకోటలుగా ఉన్న నియోజకవర్గాల్లో కూడా ‘గ్రాండ్ ఓల్డ్ పార్టీ’ ఖాతా తెరవకపోవడం రాజకీయ వర్గాలను ఆశ్చర్యానికి గురిచేస్తోంది. బెంగాల్ ఓటర్లు కేవలం బీజేపీ మరియు టీఎంసీ మధ్యే పోటీని చూశారు తప్ప, కాంగ్రెస్ను ప్రత్యామ్నాయంగా భావించలేదని ఈ ‘బిగ్ జీరో’ స్పష్టం చేస్తోంది. మమతా బెనర్జీ నేతృత్వంలోని టీఎంసీ హవా ముందు కాంగ్రెస్ ఉనికి పూర్తిగా కనుమరుగైపోయింది.
దక్షిణాదిలో దెబ్బ.. అస్సాంలో నామమాత్రం
తమిళనాడులో డీఎంకేతో పొత్తు పెట్టుకుని 28 స్థానాల్లో పోటీ చేసిన కాంగ్రెస్, కేవలం ఐదు చోట్ల మాత్రమే లీడింగులో ఉండటం ఆ పార్టీ బలహీనతను సూచిస్తోంది. ఇక్కడ విజయ్ (TVK) ప్రభంజనం వల్ల పొత్తుల లెక్కలు తారుమారయ్యాయి. అస్సాంలో కూడా కాంగ్రెస్ పరిస్థితి ఆశాజనకంగా లేదు. గౌరవ్ గొగోయ్ నేతృత్వంలో 100కు పైగా స్థానాల్లో పోటీ చేసినప్పటికీ, కేవలం 24 సీట్లకే పరిమితం కావడం గమనార్హం. అక్కడ హిమంత బిశ్వ శర్మ నేతృత్వంలోని బీజేపీ వరుసగా మూడోసారి అధికారాన్ని కైవసం చేసుకునే దిశగా వెళ్తుండటంతో కాంగ్రెస్కు నిరాశే మిగిలింది.
కేరళలో మాత్రమే కాంగ్రెస్ ‘హస్త’లాఘవం
ఐదు రాష్ట్రాల్లో కేరళ ఒక్కటే కాంగ్రెస్ పార్టీకి ఊరటనిస్తోంది. అక్కడ పినరయి విజయన్ నేతృత్వంలోని ఎల్డీఎఫ్ (LDF)పై ప్రజల్లో ఉన్న వ్యతిరేకత కాంగ్రెస్కు వరంగా మారింది. యూడీఎఫ్ (UDF) కూటమి ఏకంగా 99 స్థానాల్లో ఆధిక్యత కనబరుస్తుండగా, అందులో కాంగ్రెస్ పార్టీ స్వతహాగా 60కి పైగా స్థానాల్లో ముందంజలో ఉంది. కేరళలో లభించిన ఈ విజయం రాహుల్ గాంధీ నాయకత్వానికి కొంత ఊపిరి పోసినట్లయినా, జాతీయ స్థాయిలో మాత్రం పార్టీ పునరుజ్జీవనంపై పెద్ద ప్రశ్నార్థకాన్నే మిగిల్చింది.