Ranveer Singh Threat Case : బాలీవుడ్ స్టార్ హీరో రణ్వీర్ సింగ్ను లక్ష్యంగా చేసుకుని లారెన్స్ బిష్ణోయ్ గ్యాంగ్ నుంచి వచ్చిన బెదిరింపులు సినీ పరిశ్రమలో తీవ్ర కలకలం రేపుతున్నాయి. గతంలో సల్మాన్ ఖాన్ను బెదిరించిన ఈ ముఠా, ఇప్పుడు రణ్వీర్ సింగ్ నుంచి భారీగా డబ్బు డిమాండ్ చేస్తూ హెచ్చరికలు జారీ చేసింది.
రూ. 10 కోట్ల డిమాండ్
రణ్వీర్ సింగ్ మేనేజర్ వాట్సాప్ నంబర్కు లారెన్స్ బిష్ణోయ్ గ్యాంగ్ కీలక సభ్యుడైన హ్యారీ బాక్సర్ నుంచి ఒక వాయిస్ నోట్ వచ్చినట్లు సమాచారం. అందులో రణ్వీర్ సింగ్ రూ. 10 కోట్లు ఇవ్వాలని, లేనిపక్షంలో తీవ్ర పరిణామాలు ఎదుర్కోవాల్సి ఉంటుందని బెదిరించారు. కేవలం డబ్బు కోసమే కాకుండా, తన మాట వినకపోతే రణ్వీర్ వద్ద పనిచేసే సిబ్బందిని (Staff) కూడా టార్గెట్ చేస్తామంటూ ఈ ముఠా హెచ్చరించింది. తన డిమాండ్లను పట్టించుకోకుండా పోలీసులకు ఫిర్యాదు చేస్తే “నీ ఏడు తరాలు గుర్తుపెట్టుకునేలా బుద్ధి చెబుతాం” అంటూ హ్యారీ బాక్సర్ ఆ ఆడియోలో పేర్కొన్నట్లు తెలుస్తోంది.
అంతర్జాతీయ కోణంలో దర్యాప్తు
ముంబై క్రైమ్ బ్రాంచ్ పోలీసులు ఈ కేసును అత్యంత ప్రతిష్టాత్మకంగా తీసుకున్నారు. ఆ బెదిరింపు సందేశం వచ్చిన ఫోన్ నంబర్ అమెరికాలో రిజిస్టర్ అయినట్లు ప్రాథమిక విచారణలో తేలింది. వీపీఎన్ (VPN) టెక్నాలజీ ఉపయోగించి ఈ సందేశాన్ని పంపినట్లు పోలీసులు అనుమానిస్తున్నారు. ఈ నేపథ్యంలో నిందితులను గుర్తించేందుకు ముంబై పోలీసులు ఇప్పటికే అమెరికా భద్రతా సంస్థలతో పాటు ఇంటర్పోల్ సహాయాన్ని కూడా కోరారు. హ్యారీ బాక్సర్ ప్రస్తుతం విదేశాల్లో ఉంటూ బిష్ణోయ్ గ్యాంగ్ కార్యకలాపాలను నడిపిస్తున్నట్లు పోలీసులు భావిస్తున్నారు.
బాలీవుడ్లో ఆందోళన
తాజా బెదిరింపుల నేపథ్యంలో రణ్వీర్ సింగ్ నివాసం వద్ద ముంబై పోలీసులు భద్రతను కట్టుదిట్టం చేశారు. ఆయన వ్యక్తిగత సెక్యూరిటీని కూడా పెంచారు. ఇటీవల దర్శకుడు రోహిత్ శెట్టి నివాసం వద్ద జరిగిన కాల్పుల ఘటనలో కూడా ఈ గ్యాంగ్ ప్రమేయం ఉందని వార్తలు రావడం, ఇప్పుడు రణ్వీర్ను లక్ష్యంగా చేసుకోవడంతో బాలీవుడ్ ప్రముఖుల్లో ఆందోళన నెలకొంది. ఈ ఏడాది మార్చిలో విడుదల కానున్న రణ్వీర్ కొత్త సినిమా ‘ధురంధర్’ (Dhurandhar) పనుల్లో ఆయన నిమగ్నమై ఉండగా, ఈ పరిణామాలు సినిమా వర్గాల్లో చర్చనీయాంశంగా మారాయి.