అంతర్జాతీయ పరిణామాల నేపథ్యంలో బంగారం ధరలు మళ్లీ పెరిగాయి. గత వారంలో ఒక్కరోజు మాత్రమే అది కూడా స్వల్పంగా తగ్గింది. ఇప్పుడు ఇరాన్- అమెరికా చర్చలపై ఆశలతో క్రూడాయిల్ ధరలు భారీగా పతనం అయ్యాయి. 10 శాతానికి పైగా దిగొచ్చాయి. దీంతో బంగారం ధరలు అదే స్థాయిలో పెరిగాయి. 22 క్యారెట్ల గోల్డ్ రేటు హైదరాబాద్ నగరంలో రూ. 1300 పెరిగి తులం రూ. 1,42,400కు చేరింది.
బంగారం కొనుగోలు చేయాలనుకునే వారికి అలర్ట్. గోల్డ్ రేట్లు మళ్లీ వరుసగా పెరుగుతున్నాయి. అంతర్జాతీయ పరిణామాలే ఇందుకు దోహదం చేస్తున్నాయి. ఇప్పుడు ఇరాన్- అమెరికా మధ్య రెండో దశ చర్చలు మరో 2 రోజుల్లో జరగనున్నట్లు అమెరికా అధ్యక్షుడు డొనాల్డ్ ట్రంప్ ప్రకటించారు. ఇస్లామాబాద్ వేదికగానే జరుగుతాయని చెప్పగా.. ఇరాన్ కూడా దీనికి అంగీకరించినట్లు సమాచారం. ఈ ప్రకటన నేపథ్యంలో క్రూడాయిల్ ధరలు ఒక్కసారిగా పతనం అయ్యాయి. క్రూడాయిల్ ధరలు పతనం అయితే సాధారణంగానే బంగారం ధరలు పెరుగుతుంటాయి. కొద్ది రోజులుగా యుద్ధం జరుగుతున్నప్పటి నుంచి ఇదే జరుగుతోంది. ఇప్పుడదే జరిగింది. బంగారం ధరలు మళ్లీ ఏప్రిల్ 15న ఉదయం 10 గంటల తర్వాత భారీగా పెరిగాయి.
హైదరాబాద్ నగరంలో చూస్తే 22 క్యారెట్ల గోల్డ్ రేటు రూ. 1300 పెరగగా.. తులం ఇప్పుడు రూ. 1,42,400 వద్ద కొనసాగుతోంది. ముందటి రోజు రూ. 1350 పెరిగింది. దానికి ముందు మాత్రం స్వల్పంగా రూ. 350 తగ్గింది. ఇక 24 క్యారెట్ల బంగారం ధర ఇప్పుడు రూ. 1420 పెరగడంతో 10 గ్రాములకు హైదరాబాద్ మార్కెట్లో రూ. 1,55,350 వద్ద ఉంది. ఇది ముందటి రోజు రూ. 1470 మేర పెరిగింది.
బంగారం ధర పరిస్థితి ఇలా ఉండగా.. వెండి ధర ఒక్కరోజులోనే మరో రూ. 10 వేలు పెరిగింది. దీంతో ఇప్పుడు ఏప్రిల్ 15న కేజీ సిల్వర్ రేటు రూ. 2.75 లక్షల వద్ద ట్రేడ్ అవుతోంది. ముందటి రోజు రూ. 5 వేల మేర పెరగ్గా.. దానికి ముందు రూ. 5 వేలు తగ్గింది. అయినప్పటికీ వెండి ధర ఇప్పటికీ ఆల్ టైమ్ హైకి చాలా దూరంలోనే ఉంది. జనవరి 29న కిలో వెండి ధర రూ. 4.25 లక్షలు పలికింది. అక్కడి నుంచి చూస్తే రూ. 1.50 లక్షలు తగ్గిందని చెప్పొచ్చు.
ఇక అంతర్జాతీయ మార్కెట్లో కూడా బంగారం ధరల్లో భారీ మార్పు కనిపించింది. కిందటి రోజు ఉదయం స్పాట్ గోల్డ్ రేటు ఔన్సుకు 4750 డాలర్ల స్థాయిలో ఉండగా.. ఇప్పుడు ఏప్రిల్ 15న ఉదయం 10 గంటల సమయంలో ఇది 4,820 డాలర్ల మార్కుపైకి చేరింది. ఇంకా సిల్వర్ రేటు 74 డాలర్ల స్థాయి నుంచి ఇప్పుడు 80 డాలర్ల మార్కుకు ఎగబాకింది. ఇక డాలరుతో పోలిస్తే రూపాయి మారకం విలువ రూ. 93.17 వద్ద కొనసాగుతోంది. ఇది కిందటి రోజుతో పోలిస్తే పుంజుకుందని చెప్పొచ్చు.