MLA MLC sports ఆంధ్రప్రదేశ్ రాజకీయాల్లో నిత్యం బిజీగా ఉండే ప్రజాప్రతినిధులు ఇప్పుడు కాసేపు రాజకీయాలకు విరామం ఇచ్చి క్రీడా మైదానంలోకి అడుగుపెట్టబోతున్నారు. రాష్ట్రంలోని ఎమ్మెల్యేలు, ఎమ్మెల్సీల కోసం రేపటి నుంచి మూడు రోజుల పాటు ప్రత్యేకంగా క్రీడా పోటీలు నిర్వహించనున్నారు. ప్రతిరోజూ అసెంబ్లీ సమావేశాలు ముగిసిన అనంతరం, విజయవాడలోని ఇందిరాగాంధీ మున్సిపల్ స్టేడియం వేదికగా ఈ పోటీలు జరగనున్నాయి. ఇందుకు సంబంధించి అసెంబ్లీ శాసనసభా పక్ష కార్యాలయాల్లో ఇప్పటికే దరఖాస్తుల ప్రక్రియ ప్రారంభమైంది.
సభ్యుల ఆసక్తిని బట్టి క్రికెట్, క్యారమ్స్, చెస్, టెన్నిస్ వంటి పలు రకాల క్రీడలను ఈ పోటీల జాబితాలో చేర్చారు. తమకు నచ్చిన ఆటలో పాల్గొనేందుకు సభ్యులకు వెసులుబాటు కల్పించడమే కాకుండా, పోటీల్లో పాల్గొనే వారందరికీ ప్రభుత్వం తరపున ఉచితంగా టీ-షర్టులు, ట్రాకర్లను అందజేయనున్నారు. చట్టసభల్లో ప్రజా సమస్యలపై వాదోపవాదాలు చేసుకునే నేతలు, ఇప్పుడు మైదానంలో క్రీడాస్ఫూర్తిని చాటుకునేందుకు సిద్ధమవుతుండటం ఆసక్తిని కలిగిస్తోంది.
ముఖ్యంగా ఈ క్రీడల్లో ‘క్రికెట్’ ప్రధాన ఆకర్షణగా నిలవనుంది. క్రికెట్ పోటీల కోసం ప్రస్తుతం రెండు జట్లను సిద్ధం చేయగా, ఒక జట్టుకు విద్యాశాఖ మంత్రి నారా లోకేశ్ సారథ్యం వహించనున్నారు. మరో జట్టుకు పౌరసరఫరాల శాఖ మంత్రి నాదెండ్ల మనోహర్ కెప్టెన్గా వ్యవహరించనున్నారు. అయితే, క్రికెట్ ఆడేందుకు ఎక్కువ మంది సభ్యులు ఆసక్తి చూపిస్తే మాత్రం మూడో జట్టును కూడా రంగంలోకి దించే అవకాశం ఉంది. అలా మూడో జట్టు ఏర్పాటైతే, దానికి ఉప ముఖ్యమంత్రి కొణిదెల పవన్ కళ్యాణ్ కెప్టెన్గా వ్యవహరించే అవకాశం ఉందని సమాచారం. రాజకీయ క్షేత్రంలో ప్రత్యర్థులను ఢీకొనే నేతలు, ఇప్పుడు మైదానంలో బ్యాట్, బాల్తో ఎలా అలరిస్తారో చూడాలని ప్రజలు ఆసక్తిగా ఎదురుచూస్తున్నారు.