జగన్ తో బ్రహ్మి..పార్టీ శ్రేణుల్లో ఆనందం

Jagan & Brahmanandam Meet : విజయవాడ గన్నవరం విమానాశ్రయం లో ఒక అరుదైన మరియు ఆసక్తికరమైన సన్నివేశానికి వేదికైంది. మాజీ ముఖ్యమంత్రి, వైసీపీ అధినేత వైఎస్ జగన్మోహన్ రెడ్డి, లెజెండరీ హాస్య నటుడు పద్మశ్రీ బ్రహ్మానందం యాదృచ్ఛికంగా ఒకరికొకరు ఎదురుపడటం రాజకీయ, సినీ వర్గాల్లో చర్చనీయాంశంగా మారింది.

వైఎస్ జగన్ బెంగళూరు వెళ్లేందుకు గన్నవరం ఎయిర్‌పోర్టుకు చేరుకోగా, అదే సమయంలో బ్రహ్మానందం కూడా అక్కడ ఉన్నారు. ఇద్దరు నేతలు ఎదురుపడగానే చాలా ఆత్మీయంగా పలకరించుకున్నారు. జగన్ ఎంతో చిరునవ్వుతో బ్రహ్మానందాన్ని పలకరించడం, ఇద్దరూ కాసేపు కుశలప్రశ్నలు వేసుకోవడం అక్కడున్న వారిని ఆకట్టుకుంది. ఈ క్రమంలో వీరిద్దరూ కలిసి దిగిన ఫోటో సోషల్ మీడియాలో నిమిషాల్లోనే వైరల్ అయింది. ముఖ్యంగా వైసీపీ శ్రేణులు ఈ ఫోటోను నెట్టింట షేర్ చేస్తూ.. “టూ లెజెండ్స్ ఇన్ వన్ ఫ్రేమ్” అంటూ సందడి చేస్తున్నారు. గతంలో జగన్ చేసిన సుదీర్ఘ పాదయాత్రను, ఆయన పట్టుదలను బ్రహ్మానందం ప్రశంసించిన సందర్భాలను ఈ సందర్భంగా నెటిజన్లు గుర్తు చేసుకుంటున్నారు.

బ్రహ్మానందం రాజకీయాల్లోకి వస్తారంటూ గతంలో చాలాసార్లు ప్రచారం జరిగింది. అయితే, ఈ భేటీ నేపథ్యంలో ఆయన పాత వ్యాఖ్యలు మళ్ళీ తెరపైకి వచ్చాయి. తనకు రాజకీయ నేపథ్యం లేదని, రాజకీయాల్లోకి వచ్చే ఉద్దేశం అస్సలు లేదని ఆయన గతంలోనే తేల్చి చెప్పారు. తన జీవితం సినిమా పరిశ్రమకే అంకితమని, తన పదవికి రిటైర్మెంట్ ఉన్నా తన పెదవికి (నవ్వించడానికి) మాత్రం రిటైర్మెంట్ లేదని ఆయన ఛలోక్తులు విసిరారు. రాజకీయాల్లో తాను మాజీ ఉపరాష్ట్రపతి వెంకయ్య నాయుడు జీవితాన్ని ఆదర్శంగా తీసుకుంటానని, ఒక సామాన్య స్థాయి నుంచి అత్యున్నత స్థాయికి ఎదిగిన ఆయన ప్రస్థానం తనకు స్ఫూర్తినిస్తుందని బ్రహ్మానందం పలు సందర్భాల్లో పేర్కొన్నారు.

ఒక సాధారణ అధ్యాపకుడిగా కెరీర్ ప్రారంభించి, నటనపై ఆసక్తితో చిత్ర పరిశ్రమలోకి అడుగుపెట్టిన బ్రహ్మానందం.. నేడు 1200కు పైగా సినిమాల్లో నటించి గిన్నిస్ బుక్ రికార్డు సృష్టించారు. కొంతకాలం ఆరోగ్య కారణాల రీత్యా సినిమాలకు దూరంగా ఉన్నా, ఇటీవల మళ్లీ సెకండ్ ఇన్నింగ్స్ ప్రారంభించి ప్రేక్షకులను అలరిస్తున్నారు. నేటి తరం తనను ‘మీమ్స్ బాయ్’గా మార్చి నిత్యం గుర్తుంచుకోవడం పట్ల ఆయన ఆనందం వ్యక్తం చేస్తున్నారు. కేంద్ర ప్రభుత్వం నుంచి ‘పద్మశ్రీ’ అందుకున్న బ్రహ్మానందం వంటి మహానటుడిని, ఒక రాజకీయ నాయకుడు అంతలా గౌరవించి పలకరించడం అటు సినిమా అభిమానులను, ఇటు రాజకీయ కార్యకర్తలను సంతోషానికి గురిచేస్తోంది.