GreenLand వెనుజులాపై గతవారం సైనిక చర్య చేపట్టిన అమెరికా.. ఆదేశ అధ్యక్షుడ్ని అదుపులోకి తీసుకుంది. ఆ తర్వాత నుంచి డెన్మార్క్ సమీపంలోని గ్రీన్లాండ్పై ట్రంప్ యంత్రాంగం ఫోకస్ పెట్టింది. ఈ దీవిని స్వాధీనం చేసుకునే విషయంలో అమెరికా అధ్యక్షుడు డొనాల్డ్ ట్రంప్ తన వైఖరిని పునరుద్ఘాటించారు. రష్యా, చైనా ఆధిపత్యాన్ని నిరోధించడానికి సులభమైన లేదా కష్టమైన మార్గాల్లో చర్యలు తీసుకుంటామని ఆయన హెచ్చరించారు. గ్రీన్లాండ్ వాసులకు నగదు ఆఫర్తో పాటు, కాంపాక్ట్ ఆఫ్ ఫ్రీ అసోసియేషన్ (COFA)ను పరిశీలిస్తున్నట్లు నివేదికలు సూచిస్తున్నాయి.
- గ్రీన్లాండ్ను చేజిక్కించుకునే ప్రయత్నాల్లో అమెరికా
- దీవిలో కాలుపెడితే కాల్చిపరేస్తామంటోన్న డెన్మార్క్
- చైనా, రష్యాలను అడ్డుకోడానికే అంటోన్న ట్రంప్
గ్రీన్లాండ్ స్వాధీనం చేసుకునే విషయంలో తగ్గేది లేదని అమెరికా అధ్యక్షుడు డొనాల్డ్ ట్రంప్ స్పష్టం చేశారు. అమెరికా చర్యలు తీసుకుంటుందని ఆయన హెచ్చరించారు. రష్యా లేదా చైనా ఆ ఆర్కిటిక్ ద్వీపంలో తమ ప్రభావాన్ని పెంచుకోకుండా నిరోధించడానికి ‘సులభమైన మార్గంలో లేదా కష్టమైన మార్గంలో వ్యవహరిస్తుందని ఆయన పేర్కొన్నారు. వైట్హౌస్లో జరిగిన ఒక సమావేశంలో ట్రంప్ మాట్లాడుతూ.. ‘గ్రీన్లాండ్పై మేము ఏదో ఒకటి చేయబోతున్నాం, వారు ఇష్టపడినా ఇష్టపడకపోయినా ఎందుకంటే మేము చేయకపోతే రష్యా లేదా చైనా స్వాధీనం చేసుకుంటాయి.. రష్యా లేదా చైనాను పొరుగువారిగా చూడలేం.. నేను సులభమైన మార్గంలో ఒక ఒప్పందం చేసుకోవాలనుకుంటున్నాను.. కానీ అలా కాకపోతే మేము దానిని కష్టమైన మార్గంలో చేస్తాం’ అని తెలిపారు. ఇటు, డెన్మార్క్ సైతం గ్రీన్లాండ్ విషయంలో తీవ్రంగానే స్పందించింది.
గ్రీన్లాండ్ వ్యూహాత్మక ప్రాముఖ్యతను నొక్కి చెబుతూ.. ‘మేము దానిని సొంతం చేసుకున్నప్పుడు, రక్షిస్తాం…. ఇరాన్తో ఒబామా చేసుకున్న భయంకరమైన ఒప్పందంతో ఏమి జరిగిందో చూడండి.. అది స్వల్పకాలిక ఒప్పందం… దేశాలకు యాజమాన్యం ఉండాలి… మేము గ్రీన్లాండ్ను రక్షించుకోవాలి, ఎందుకంటే మేము చేయకపోతే, చైనా లేదా రష్యా చేస్తాయి’ అని ఆయన అన్నారు.
డొనాల్డ్ ట్రంప్ యంత్రాంగం గ్రీన్ల్యాండ్ వాసులకు నగదు ఆఫర్ను పరిశీలిస్తున్నట్లు నివేదికలు సూచిస్తున్నాయి. ఒక్కొక్కరికి 10,000 నుంచి 100,000 డాలర్ల వరకు ఆఫర్ చేయాలని చర్చించినట్లు అధికారులను ఉటంకిస్తూ రాయిటర్స్ నివేదిక వెల్లడించింది. సహజ వనరులతో సమృద్ధిగా ఉండే డెన్మార్క్కు చెందిన గ్రీన్లాండ్లో సుమారు 57,000 మంది జనాభా ఉంటారు. ఈ మొత్తం చెల్లింపు కోసం 6 బిలియన్ డాలర్లు ఖర్చవుతుందని అంచనా వేస్తున్నారు.
అమెరికాకు అనేక పసిఫిక్ ద్వీప దేశాలతో ఉన్న ఒప్పందాల మాదిరిగానే కాంపాక్ట్ ఆఫ్ ఫ్రీ అసోసియేషన్ (COFA)ను పరిశీలిస్తున్నారు. ఇందులో అమెరికా సైనిక ప్రాప్యతకు బదులుగా ఆర్థిక సహాయం, రక్షణను అందిస్తుంది. అయితే, ఇందుకు గ్రీన్లాండ్ మొదట డెన్మార్క్ నుంచి స్వాతంత్ర్యం పొందాల్సి ఉంటుంది. ఈ చెల్లింపులు అటువంటి చర్యకు లేదా అమెరికాతో భవిష్యత్ ఒప్పందానికి ప్రజా మద్దతును ప్రోత్సహించడానికి ఉపయోగపడతాయి. అయితే, గ్రీన్లాండ్ ప్రజలు డెన్మార్క్ నుంచి స్వాతంత్ర్యం కోరుకుంటున్నా .. అమెరికాలో భాగం కావాలని కోరుకోవడం లేదు.
గ్రీన్లాండ్ విషయంలో అమెరికా ప్రకటనలపై డెన్మార్క్ ఆందోళన వ్యక్తం చేసింది. ఆ దీవిలో అడుగుపెడితే తమ సైనికులు ‘ముందు కాల్పులు జరిపి, తర్వాత ప్రశ్నలు అడగడానికి’ సిద్ధంగా ఉన్నారని హెచ్చరించింది. ఐరోపా సమాఖ్య నాయకులు కూడా ఆర్కిటిక్ భూభాగంలో అమెరికా సైనిక చర్యలను పరిశీలించడంపై ఆందోళన వ్యక్తం చేశారు.