Uganda Army Chief: ఉగాండా సైన్యాధిపతి జనరల్ ముహూజీ కైనరుగాబా టర్కీ దేశం ముందు రెండు వింత డిమాండ్లను ఉంచారు. సోమాలియాలో ఇస్లామిక్ ఉగ్రవాదులతో పోరాడటంలో ఉగాండా సైన్యం అందించిన సుదీర్ఘ సహకారానికి ప్రతిఫలంగా 1 బిలియన్ డాలర్లు (సుమారు రూ. 8,300 కోట్లు) చెల్లించాలని ఆయన డిమాండ్ చేశారు.
అంతటితో ఆగకుండా ఆ దేశంలోని ‘అత్యంత అందమైన మహిళ’ను తనకు అప్పగించాలని, ఆమెను తన భార్యగా చేసుకుంటానని రెండవ డిమాండ్ పెట్టారు. ఈ డిమాండ్లు నెరవేర్చకపోతే టర్కీ, ఉగాండా మధ్య సంబంధాలు దెబ్బతింటాయని ఆయన హెచ్చరించారు. కైనరుగాబా ఇలాంటి విడ్డూరమైన వ్యాఖ్యలు చేయడం ఇదే మొదటిసారి కాదు. 2022లో ఇటలీ ప్రధాని జార్జియా మెలోనిని వివాహం చేసుకునేందుకు ప్రతిఫలంగా ఇటలీకి 100 ఆవులను ఇస్తానని ఆయన గతంలో ఆఫర్ ఇచ్చి వార్తల్లో నిలిచారు.
Also Read: ప్రముఖ సింగర్ మృతికి కారణమైన ఛాతీ ఇన్ఫెక్షన్.. లక్షణాలివే!
అధ్యక్షుడి కుమారుడిగా కైనరుగాబా
ముహూజీ కైనరుగాబా కేవలం సాధారణ సైనిక అధికారి మాత్రమే కాదు. ఆయన ఉగాండా అధ్యక్షుడు యోవేరి ముసెవెని కుమారుడు. దేశ సైన్యంలో అత్యంత కీలకమైన పదవిలో ఉన్న ఆయన, భవిష్యత్తులో ఉగాండా అధ్యక్ష బాధ్యతలు చేపడతారని భావిస్తున్నారు.
అయితే ఆయన తరచుగా సోషల్ మీడియాలో చేసే ఇటువంటి రెచ్చగొట్టే వ్యాఖ్యల వల్ల ఉగాండా ప్రభుత్వం అనేకసార్లు అంతర్జాతీయ వేదికలపై సంజాయిషీ ఇచ్చుకోవాల్సి వస్తోంది. ఈ తాజా వ్యాఖ్యలు ఉగాండా దౌత్య సంబంధాలపై ఎలాంటి ప్రభావం చూపుతాయోనని రాజకీయ విశ్లేషకులు ఆందోళన వ్యక్తం చేస్తున్నారు.