Trump : మాస్కో నుంచి ముడి చమురు కొనుగోలు చేస్తున్న దేశాలపై అమెరికా అధ్యక్షుడు డొనాల్డ్ ట్రంప్ మరోసారి తీవ్రంగా విరుచుకుపడ్డారు. రష్యాతో వాణిజ్యం కొనసాగిస్తే భారత్ సహా అన్ని దేశాలపై కఠిన చర్యలు తీసుకుంటామని, ముఖ్యంగా భారీ సుంకాలు విధిస్తామని ఆయన ఇప్పటికే ప్రకటించిన విషయం తెలిసిందే. తాజాగా వైట్ హౌస్‌లో జరిగిన మీడియా సమావేశంలో ఈ అంశంపై ట్రంప్ చేసిన వ్యాఖ్యలు ప్రపంచవ్యాప్తంగా చర్చనీయాంశంగా మారాయి.
ట్రంప్ మాట్లాడుతూ.. “రష్యా నుండి చమురు కొనుగోలు చేసే దేశాలపై 100 శాతం వరకు టారిఫ్‌లు విధిస్తామని అన్న మాటపై చాలా వార్తలు వస్తున్నాయి. కానీ నేను ఎప్పుడూ శాతం గురించి స్పష్టంగా ఏమీ చెప్పలేదు,” అని తెలిపారు. అయితే, ఈ అంశంపై సీరియస్‌గా కసరత్తు జరుగుతోందని, చాలా తక్కువ సమయంలోనే నిర్ణయం తీసుకునే అవకాశం ఉందని సూచించారు. అమెరికా కాలమానం ప్రకారం బుధవారం రష్యా అధికారులతో తన భేటీ జరగనుందని, ఆ సమావేశంలో చర్చల తర్వాత పరిస్థితి మరింత స్పష్టత వస్తుందని ట్రంప్ తెలిపారు.
Indian Fishermen : తమిళనాడుకు చెందిన 14 మంది జాలర్లను అరెస్ట్ చేసిన శ్రీలంక నేవీ
ఈ సందర్భంగా విలేకరులు ట్రంప్‌ను నేరుగా ప్రశ్నించారు. “భారత్ చెబుతున్నట్లు అమెరికా కూడా రష్యా నుండి యురేనియం, ఎరువులు దిగుమతి చేసుకుంటుందా?” అని అడిగారు. దీనికి ట్రంప్ సమాధానంగా, “ఈ విషయంపై నాకు ప్రస్తుతం సమాచారం లేదు. తెలుసుకుని త్వరలోనే మీకు సమాధానం ఇస్తాను,” అని చెప్పారు. ఆయన ఈ వ్యాఖ్యలు అమెరికా-రష్యా వాణిజ్య సంబంధాలపై కొత్త చర్చకు దారితీశాయి.
మరోవైపు, రష్యాతో వ్యాపారం కొనసాగిస్తూనే భారత్‌పై ట్రంప్ అక్కసు వ్యక్తం చేస్తున్నారు. ఇప్పటికే న్యూఢిల్లీపై 25 శాతం టారిఫ్‌లు విధించిన ఆయన, రాబోయే గంటల్లో ఇవి భారీగా పెంచుతామని హెచ్చరించారు. “భారత్ చౌకగా చమురు కొనుగోలు చేసి లాభాల కోసం మళ్లీ అమ్ముతూ యుద్ధ యంత్రాన్ని పెంచుతోంది,” అనే వ్యాఖ్యలు ఇటీవల ట్రంప్ చేసినవి అంతర్జాతీయ స్థాయిలో వివాదాస్పదమయ్యాయి.
ట్రంప్ తాజా వ్యాఖ్యలు వాణిజ్య రంగంలో అనిశ్చితిని మరింత పెంచాయి. రష్యా నుండి చమురు కొనుగోలు చేయడంపై భారత్ తన స్థితిని బలంగా సమర్థించుకుంటున్నప్పటికీ, అమెరికా తీసుకునే నిర్ణయాలు భారత ఆర్థిక వ్యవస్థపై ప్రభావం చూపే అవకాశం ఉందనే ఆందోళనలు వ్యక్తమవుతున్నాయి. ఈ పరిణామాలు రాబోయే రోజుల్లో భారత్-అమెరికా సంబంధాలపై కీలకమైన మలుపు తిప్పే అవకాశముందని విశ్లేషకులు భావిస్తున్నారు.
Renu Desai : స్టుపిడ్ పొలిటీషియన్స్..రేణు దేశాయ్ సంచలన ట్వీట్