Vladimir Putin : చైనాలోని టియాంజిన్లో జరుగుతున్న షాంఘై సహకార సంస్థ (SCO) సదస్సులో రష్యా అధ్యక్షుడు వ్లాదిమిర్ పుతిన్ ఉక్రెయిన్ యుద్ధంపై కీలక వ్యాఖ్యలు చేశారు. ఉక్రెయిన్తో జరుగుతున్న యుద్ధానికి అసలు బాధ్యత పశ్చిమ దేశాలదేనని ఆయన స్పష్టంచేశారు. నాటో విస్తరణ విధానమే ఈ సంక్షోభానికి మూలమని పుతిన్ పేర్కొన్నారు. పుతిన్ అభిప్రాయపడుతూ, “రష్యా ఆక్రమణ వల్ల ఈ సమస్యలు రాలేదు. ఉక్రెయిన్ను నాటోలో చేర్చుకోవాలన్న పాశ్చాత్య దేశాల ప్రయత్నాలు, వారికి ఇచ్చిన సైనిక మద్దతే యుద్ధానికి దారితీసింది” అని అన్నారు. అంతేకాకుండా 2014లో రష్యా అనుకూల అధ్యక్షుడు విక్టర్ యానుకోవిచ్ను గద్దె దింపడం కూడా పశ్చిమ దేశాల ప్రేరేపణతో జరిగిందని తెలిపారు. అదే ఈ యుద్ధానికి మూల కారణంగా నిలిచిందని అన్నారు.
KTR : ఇప్పుడు మీ సీఎం ఏం చేస్తున్నారో మీకైనా తెలుస్తోందా.?
అంతర్జాతీయ శాంతి యత్నాలపై మాట్లాడిన పుతిన్, భారత్–చైనా చేసిన కృషిని ప్రత్యేకంగా ప్రశంసించారు. “రెండు దేశాలు శాంతి స్థాపన కోసం తీసుకున్న ప్రయత్నాలు అభినందనీయమైనవి” అని ఆయన వ్యాఖ్యానించారు. ఉక్రెయిన్ యుద్ధ పరిష్కారానికి అమెరికా మాజీ అధ్యక్షుడు డొనాల్డ్ ట్రంప్ చేసిన యత్నాలపై కూడా పుతిన్ ప్రస్తావించారు. ట్రంప్ రెండోసారి అధికారంలోకి వచ్చిన తర్వాత ఇరుపక్షాల మధ్య శాంతి చర్చలు జరిపేందుకు ముందుకొచ్చారని చెప్పారు. మొదట సౌదీ అరేబియాలో చర్చలు జరిగాయని, కానీ అవి ఫలితాలను ఇవ్వలేదని వెల్లడించారు.
తరువాత అలాస్కాలో తనతో ట్రంప్ ప్రత్యేకంగా సమావేశమయ్యారని, అనంతరం ఉక్రెయిన్ అధ్యక్షుడు వోలోడిమిర్ జెలెన్స్కీతో కూడా చర్చలు జరిపారని పుతిన్ తెలిపారు. అయితే, రష్యా ప్రతిపాదించిన షరతులను ఉక్రెయిన్ అంగీకరించకపోవడంతో ఆ చర్చలు పురోగతి సాధించలేదని చెప్పారు. ఈ విషయాలను ఆయన చైనా అధ్యక్షుడు జిన్పింగ్తో సహా ఇతర ప్రపంచ నాయకులతో పంచుకున్నట్లు తెలిపారు. 2022లో ప్రారంభమైన రష్యా–ఉక్రెయిన్ యుద్ధం ఇంకా కొనసాగుతూనే ఉంది. అంతర్జాతీయ వేదికలపై శాంతి చర్చలు జరగడానికి ప్రయత్నాలు జరుగుతున్నా, ఇప్పటికీ ఎటువంటి పురోగతి సాధించలేదని పుతిన్ వ్యాఖ్యలు సూచిస్తున్నాయి. ప్రస్తుతం శాంతి చర్చలపై ప్రతిష్టంభన నెలకొన్నదని ఆయన స్పష్టంచేశారు.