H1B Visa Rules అమెరికా డాలర్ డ్రీమ్స్ ప్రపంచంలోనే లక్షలాది మంది యువత కల. అక్కడ ఉన్నత విద్య, ఆపై ఉద్యోగం సంపాదించి స్థిరపడాలనే ఉద్దేశంతో అమెరికాకు విమానం ఎక్కుతారు. ఇక, ప్రతిభావంతులైన విదేశీ వర్కర్ల కోసం ఎలాగూ హెచ్-1 బీ వీసా ప్రోగ్రామ్ ఉండనే ఉంది. కానీ, ఈ ప్రోగ్రామ్ కారణంగా అమెరికన్ల ఉద్యోగాలకు భారీగా గండి పడుతుందనే ఆరోపణలు ఉన్నాయి. ఇలాంటి తరుణంలో డొనాల్డ్ ట్రంప్ యంత్రాంగం మరో కీలక నిర్ణయం తీసుకునే దిశగా అడుగులు వేస్తోంది.
ఐటీ సంస్థల్లో విదేశీ వర్కర్లను తగ్గించి స్థానికులకు ఉద్యోగవకాశాలు కల్పించే దిశగా అమెరికా మరో ముఖ్యమైన నిర్ణయం తీసుకోనుంది. ఇందులో భాగంగానే హెచ్-1బీ వీసాదారుల వేతనాల పెంపునకు సంబంధించి కార్మిక శాఖ కీలక ప్రతిపాదనలు సిద్ధం చేసింది. ఈ ప్రతిపాదన అమల్లోకి వస్తే హెచ్-1బీ వీసాదారుల కనీస వార్షిక వేతనం 14వేల డాలర్లకు చేరుకునే అవకాశం ఉంది. అమెరికన్లతో పోలిస్తే విదేశీయులకు వేతనాల్లో భారీ వ్యత్యాసం ఉంటోందని, దీనివల్ల చౌకగా లభించే సిబ్బందివైపే సంస్థలు మొగ్గుచూపుతున్నాయని ఆందోళనలు నెలకొన్నాయి. ఈ తరుణంలోనే అమెరికా యంత్రాంగం తాజా ప్రతిపాదనలు తీసుకురావడం గమనార్హం. దీని వల్ల విదేశీ ఉద్యోగులకు గడ్డుకాలం తప్పదనే అభిప్రాయం వ్యక్తమవుతోంది.
ప్రస్తుతం స్థానిక ఉద్యోగులతో పోలిస్తే హెచ్-1బీ వీసాదారుల సగటు వార్షిక వేతనం 10,191 డాలర్లు తక్కువగానే ఉంది. కంప్యూటర్ ఆధారిత ఉద్యోగాల్లో ఈ తేడా మరింత ఎక్కువ కావడం గమనార్హం. వాస్తవానికి ప్రతిభావంతులైన విదేశీ వర్కర్లను నియమించుకోవడానికే హెచ్-1బీ వీసా విధానాన్ని అమెరికా తీసుకొచ్చింది. కానీ, అందుకు భిన్నంగా కొన్ని సంస్థలు ఈ విధానాన్ని దుర్వినియోగం చేస్తూ తక్కువ వేతనానికి వచ్చే విదేశీ ఉద్యోగుల నియమాకాలు జరుపుతున్నాయనే ఆరోపణలు ఉన్నాయి. 2024లో జారీ అయిన హెచ్-1బీ వీసాల్లో 63 శాతం మంది ఎంట్రీ లెవెల్ ఉద్యోగులే ఉన్నట్లు గణాంకాలు తెలిపాయి.
ఈ దుర్వినియోగానికి చెక్ పెట్టేలా వేతన పెంపు ప్రతిపాదనలు చేసినట్లు అధికారులు వెల్లడించారు. అధ్యక్షుడు సంతకం తర్వాత ఇవి అమల్లోకి వచ్చే సూచనలు ఉన్నాయి. ‘‘ప్రతిపాదిత నిబంధనల ప్రకారం నిర్దిష్ట వృత్తులు, స్థానిక ఉద్యోగ మార్కెట్ల ఆధారంగా వైట్-కాలర్ ఉద్యోగాలకు ప్రస్తుత వేతన స్థాయిలను సర్దుబాటు చేస్తారు’’ అని తెలిపింది. ఇప్పటికే హెచ్-1బీ వీసా ఫీజును లక్ష డాలర్లకు పెంచిన విషయం తెలిసిందే.
తాజా ప్రతిపాదనల ప్రకారం లెవెల్ 1 ఉద్యోగాలకు కనీస వేతనం 17 నుంచి 34 శాతం, లెవెల్-2 సిబ్బందికి 34 నుంచి 52 శాతం, లెవెల్-3 వర్కర్లకు 52 నుంచి 70 శాతం, లెవెల్- 4 ఉద్యోగులకు 70 నుంచి 88 శాతం మేర పెంచనున్నారు. ఈ ప్రతిపాదనలతో H-1B వీసాదారుల వార్షిక సగటు వేతనం 14,000 డాలర్లకు పెరిగే అవకాశం ఉంది. దీంతో విదేశీ వర్కర్లను నియమించుకునే సంస్థలు ఏటా 6.56 బిలియన్ డాలర్ల వేతనాలు చెల్లించాల్సి ఉంటుంది.
H-1B ఉద్యోగులు కీలకమైన నైపుణ్య లోపాలను భర్తీ చేస్తారని, మార్కెట్కు పోటీగా ఉండే వేతనాలను పొందుతారని వ్యాపార సంస్థలు వాదిస్తుండగా, ఔట్సోర్సింగ్, స్టాఫింగ్ సంస్థలు ఈ కార్యక్రమాన్ని ఉపయోగించుకుని, మార్కెట్ ధరల కంటే తక్కువ వేతనాలకు ఎంట్రీ లెవెల్ లేదా మధ్య స్థాయి ఉద్యోగాలను భర్తీ చేస్తున్న సందర్భాలను విమర్శకులు ఎత్తి చూపుతున్నారు. 2025 ఆర్థిక సంవత్సరంలో అమెజాన్, మైక్రోసాఫ్ట్, మెటా, గూగుల్ వంటి దిగ్గజ సంస్థలు, టీసీఎస్ వంటి ఐటీ సేవల కంపెనీలు ఈ విధానాన్ని ప్రధానంగా వినియోగించుకున్నాయి.