అమెరికా అధ్యక్షుడు డొనాల్డ్ ట్రంప్కు అంతర్జాతీయ వేదికపై ఊహించని పరాభవం ఎదురైంది. ఇరాన్ దేశంతో నెలకొన్న ఉద్రిక్తతల నేపథ్యంలో, ప్రపంచ చమురు రవాణాకు అత్యంత కీలకమైన హోర్ముజ్ జలసంధి వద్ద భద్రతను పర్యవేక్షించేందుకు ఒక సైనిక కూటమిని ఏర్పాటు చేయాలని ట్రంప్ భావించారు. ఈ క్రమంలో చైనా, జపాన్, బ్రిటన్, ఫ్రాన్స్ వంటి దేశాలు తమ సొంత యుద్ధనౌకలను అక్కడ మోహరించాలని ఆయన సోషల్ మీడియా వేదికగా పిలుపునిచ్చారు. “ఇన్నాళ్లు అమెరికా రక్షణ ఇచ్చింది, ఇకపై మీ నౌకలను మీరే రక్షించుకోవాలి” అంటూ ఆయన చేసిన వ్యాఖ్యలపై మిత్రదేశాల నుంచి ప్రతికూల స్పందన వచ్చింది. అమెరికా నేతృత్వంలోని ఈ సైనిక కూటమిలో చేరడానికి జపాన్, ఆస్ట్రేలియా వంటి కీలక దేశాలు నిరాకరించడం గమనార్హం.
డొనాల్డ్ ట్రంప్కు అత్యంత సన్నిహిత దేశంగా భావించే జపాన్ నుంచి వచ్చిన సమాధానం వైట్ హౌస్ను విస్మయానికి గురిచేసింది. తమ ఇంధన అవసరాల కోసం గల్ఫ్ దేశాలపై ఆధారపడిన జపాన్, అమెరికా కోసం ఇరాన్తో నేరుగా శతృత్వాన్ని కొనితెచ్చుకోవడానికి సిద్ధంగా లేమని స్పష్టం చేసింది. అటు ఆస్ట్రేలియా కూడా యుద్ధనౌకలను పంపలేమని చేతులెత్తేయగా, దక్షిణ కొరియా సైతం ప్రస్తుతానికి అటువంటి ప్రణాళికలు ఏవీ లేవని తేల్చి చెప్పింది. బ్రిటన్, ఫ్రాన్స్ వంటి ఐరోపా దేశాలు సైతం ఈ వివాదంలో చిక్కుకుంటే ప్రాంతీయ యుద్ధానికి దారితీసే ప్రమాదం ఉందని భావించి దూరంగా ఉన్నాయి. ప్రపంచ చమురులో 20 శాతం వాటా ఈ మార్గం గుండానే ప్రయాణిస్తున్నప్పటికీ, అమెరికా అభ్యర్థనను మిత్రదేశాలు తోసిపుచ్చడం చర్చనీయాంశమైంది.
ట్రంప్ మొదటి నుంచి అనుసరిస్తున్న ‘అమెరికా ఫస్ట్’ నినాదం ఇప్పుడు ఆయనకే ప్రతిబంధకంగా మారిందని రాజకీయ విశ్లేషకులు అభిప్రాయపడుతున్నారు. అంతర్జాతీయ బాధ్యతల నుంచి అమెరికా తప్పుకోవాలని చూడటం వల్ల, మిత్రదేశాలు కూడా తమ స్వప్రయోజనాలకే ప్రాధాన్యత ఇస్తున్నాయి. హోర్ముజ్ సంక్షోభంలో అమెరికా ఒంటరి కావడాన్ని గమనిస్తే, ప్రపంచ రాజకీయాల్లో ఆ దేశాధిపత్యం క్రమంగా తగ్గుతోందనే సంకేతాలు అందుతున్నాయి. భద్రత పేరుతో తమ ఆర్థిక వ్యవస్థలను, సైనిక సంపత్తిని రిస్క్లో పెట్టడానికి ఏ దేశం కూడా ముందుకు రాకపోవడం ట్రంప్ దౌత్య వ్యూహానికి గట్టి దెబ్బగా మారింది.