Cylinder Explosion: పాకిస్థాన్లోని పంజాబ్ ప్రావిన్స్లోని ఓ హోటల్లో ఆదివారం (జూలై 9) గ్యాస్ సిలిండర్ (Cylinder Explosion) పేలింది. ప్రమాదం తరువాత మూడు అంతస్తుల భవనం కూలిపోయి కనీసం ఆరుగురు మరణించారు. మరో 10 మంది గాయపడ్డారు. ఈ మేరకు అధికారులు సమాచారం అందించారు. పంజాబ్ ప్రావిన్స్లోని జీలంలోని గ్రాండ్ ట్రంక్ (జిటి) రోడ్డులో ఉన్న మూడు అంతస్తుల హోటల్ భవనం వంటగదిలో సిలిండర్ పేలడంతో కూలిపోయిందని స్థానిక అధికారులు తెలిపారు.
జీలం డిప్యూటీ కమిషనర్ సమీవుల్లా ఫరూఖ్ను ఉటంకిస్తూ.. ఆరుగురు మరణించినట్లు నిర్ధారించారని, 10 మంది గాయపడి చికిత్స కోసం ఆసుపత్రుల్లో చేరారని న్యూస్ ఛానెల్ జియో పేర్కొంది. రెస్క్యూ ఆపరేషన్ కొనసాగుతోందని, మా బృందం ఇక్కడ ఉందని సమీవుల్లా ఫరూక్ తెలిపారు. శిథిలాల కింద నలుగురైదుగురు చిక్కుకున్నట్లు భావిస్తున్నారు.
Also Read: Fire Accident: బాలానగర్ లోని ఓ అపార్టుమెంట్లో భారీ అగ్నిప్రమాదం
ప్రధాని షాబాజ్ షరీఫ్ సంతాపం వ్యక్తం చేశారు
భవనం కూలిన ఘటనలో ప్రాణాలు కోల్పోయిన ఘటనపై పాకిస్థాన్ ప్రధాని షెహబాజ్ షరీఫ్ తీవ్ర విచారం వ్యక్తం చేస్తూ, మృతుల కుటుంబాలకు సంతాపం తెలిపారు. అంతకుముందు డాన్ వార్తాపత్రిక ఆదివారం ఉదయం 9:45 గంటలకు పేలుడు సంభవించిందని, ఆ తర్వాత రెస్క్యూ బృందాలు త్వరగా స్పందించి సహాయక చర్యలు ప్రారంభించాయని నివేదించింది. క్షతగాత్రులు చికిత్స పొందుతున్న జీలం జిల్లా హెడ్ క్వార్టర్స్ ఆసుపత్రిలో సీనియర్ వైద్యులు, సిబ్బంది అందరూ ఉన్నారని అదనపు డిప్యూటీ కమిషనర్ (రెవెన్యూ) హసన్ తారిక్ తెలిపారు. అదే సమయంలో తీవ్రంగా గాయపడిన రోగిని రావల్పిండిలోని హోలీ ఫ్యామిలీ ఆసుపత్రికి తరలించారు.
గ్యాస్ పేలుడు కారణం
జీలం డిప్యూటీ కమిషనర్ సమీవుల్లా ఫరూక్ మాట్లాడుతూ.. మొత్తం శిథిలాలు తొలగించే వరకు రెస్క్యూ ఆపరేషన్ కొనసాగుతుందని చెప్పారు. శిథిలాల తొలగింపునకు భారీ యంత్రాలను వినియోగిస్తున్నట్లు జీలం పోలీసులు తెలిపారు. ఘటన అనంతరం జిల్లా కేంద్రాసుపత్రిలో ఎమర్జెన్సీ విధించి మొత్తం సిబ్బందిని, వైద్యులను విధుల్లోకి చేర్చారు.