America : అమెరికాలో ఒక భయానక ఘటన చోటుచేసుకుంది. గాల్లో ఉన్న సమయంలో ఓ విమాన ఇంజిన్‌లో మంటలు చెలరేగడంతో ప్రయాణికులు తీవ్ర భయానక అనుభవాన్ని ఎదుర్కొన్నారు. అయితే పైలట్ల సకాలిక స్పందనతో పెను ప్రమాదం తప్పింది. ఈ ఘటన బుధవారం ఉదయం అమెరికా కాలమానం ప్రకారం చోటుచేసుకుంది. లాస్‌వేగాస్ ఎయిర్‌పోర్టు నుంచి నార్త్ కరోలినాలోని ఛార్లట్‌కు బయలుదేరిన అమెరికన్ ఎయిర్లైన్స్ విమానం టేకాఫ్‌ అయిన కొద్ది నిమిషాల్లోనే సాంకేతిక సమస్యను ఎదుర్కొంది. విమానం గగనతలంలో ఉన్న సమయంలో ఒక్కసారిగా ఒక ఇంజిన్ నుంచి మంటలు, పొగలు వచ్చాయి. ఈ దృశ్యాలను కొంతమంది ప్రయాణికులు వీడియోలుగా తీశారు. ఆ క్లిప్పులు ప్రస్తుతం సోషల్‌మీడియాలో వైరల్‌గా మారాయి.
Read Also: Maoist Party Letter: ఆదివాసీ రైతులకు రైతు భరోసా ఇవ్వాలి.. మావోయిస్టు పార్టీ లేఖ విడుదల!
ఈ ఘటన జరిగిన సమయంలో విమానంలో 153 మంది ప్రయాణికులు, ఆరుగురు సిబ్బంది ఉన్నారు. ఇంజిన్ నుంచి మంటలు రావడాన్ని గమనించిన వెంటనే పైలట్లు అప్రమత్తమై అత్యవసర ప్రక్రియలు ప్రారంభించారు. విమానాన్ని తిరిగి లాస్‌వేగాస్‌కు మళ్లించి, కేవలం 9 నిమిషాల్లోనే ఉదయం 8.20 గంటలకు ఎయిర్‌పోర్టులో సురక్షితంగా ల్యాండ్ చేశారు. ప్రయాణికులందరూ క్షేమంగా ఉండటంతో పెను ప్రమాదం తప్పినట్లయింది. ఈ సంఘటనపై ఫెడరల్ ఏవియేషన్ అడ్మినిస్ట్రేషన్ (FAA) స్పందించింది. ఘటనపై పూర్తిస్థాయి దర్యాప్తు ప్రారంభించామని, విమానాన్ని పరీక్షిస్తున్నామని వెల్లడించింది. ఇదే సమయంలో ఎయిర్‌లైన్ మెకానిక్స్ కూడా స్పందించారు. విమానం ల్యాండ్ అయిన తర్వాత జరిగిన తనిఖీల్లో ఇంజిన్‌లో మంటల ఆధారాలు లభించలేదని వారు పేర్కొన్నారు. మంటలు ఎలా వచ్చాయన్న దానిపై సమగ్ర విచారణ అవసరమని FAA స్పష్టం చేసింది.
విమానం లోపల మంటలు కనిపించడం, ప్రయాణికుల భయకంపితులవడం, విమానాన్ని అత్యవసరంగా మళ్లించడం ఇవన్నీ కలిపి ఒక్కసారిగా గగనతలంలో ఉద్రిక్తత వాతావరణాన్ని సృష్టించాయి. అయితే పైలట్ల సాహసంతో పాటు సిబ్బంది శీఘ్ర స్పందన వల్ల ప్రాణాపాయం చోటుచేసుకోకుండా తప్పించగలిగారు. ఈ సంఘటన అనంతరం విమానాన్ని పూర్తిగా తనిఖీ చేసి, ఇంజిన్ పనితీరును పరిశీలిస్తున్నారు. విమానంలో ప్రయాణించిన ప్రయాణికులకు ప్రత్యామ్నాయ వాహనాల ద్వారా గమ్యస్థానాలకు చేర్చే చర్యలు తీసుకున్నట్టు అమెరికన్ ఎయిర్లైన్స్ ప్రకటించింది. ఈ సంఘటన గగనతలంలో ఎప్పుడైనా కలగవచ్చే సాంకేతిక లోపాలపైన, విమానయాన భద్రతపైన మరోసారి దృష్టి ఆకర్షిస్తోంది. అధికార యంత్రాంగం ఈ ఘటనపై మరింత లోతుగా దర్యాప్తు చేసి తదుపరి ప్రమాదాలు నివారించేందుకు చర్యలు తీసుకోవాల్సిన అవసరం స్పష్టమవుతోంది.
Read Also: Rajnath Singh: చైనా వేదిక‌గా పాక్‌కు వార్నింగ్ ఇచ్చిన భార‌త్‌!