Racism : భారతీయుడిపై అమెరికన్‌ జాత్యహంకారం

Racism

లండన్‌: అమెరికన్లు తమ దేశంలోనే కాకుండా ఇతర దేశాల్లోని భారతీయులపై కూడా జాత్యహంకారాన్ని ప్రదర్శిస్తున్నారు. తాజాగా పోలండ్‌లో ఓ భారతీయ యువకుడిపై అమెరికాకు చెందిన ఓ వ్యక్తి దుర్భాషలాడాడు. ‘‘మీరు పరాన్నజీవులు, చొరబాటుదారులు. మీరు మీ దేశానికి వెళ్లిపోండి’’ అని హెచ్చరించాడు. ఈ ఘటన పోలండ్‌ రాజధాని వార్సాలో జరిగింది.‘‘అమెరికాలో కూడా మీవాళ్లు చాలా మంది ఉన్నారు. ఇక్కడ ఎందుకున్నారు? మీరు మీ దేశానికి ఎందుకు వెళ్లరు?’’ అని ఆ అమెరికన్‌ గట్టిగా గద్దించాడు. ‘మా దేశాల్లోకి చొరబడుతున్నారు. తెల్ల వాళ్ల దేశాలకు ఎందుకు వస్తున్నారు? మీరు యూరప్‌లో ఉండొద్దు, పోలండ్‌ పోలిష్‌లకు మాత్రమే’ అంటూ దురుసుగా మాట్లాడాడు.

ఐరోపా దేశంలో ఓ భారతీయుడిపై తెల్లజాతి వ్యక్తి జాతి వివక్షకు పాల్పడిన ఈ వీడియో ఇంటర్నెట్‌లో వైరల్ అవుతోంది. ప్రస్తుతం సోషల్ మీడియాలో విపరీతంగా వైరల్ అవుతున్న నాలుగు నిమిషాల ఈ వీడియోపై తేదీ లేదు. ఈ వీడియోను వార్సాలోని అట్రియమ్ రెడూట షాపింగ్ సెంటర్ (Atrium Reduta Shopping Centre) వెలుపల చిత్రీకరించినట్లు భావిస్తున్నారు. భారతీయుడి అనుమతిలేకుండా ఈ వీడియోను తీసినట్లు కనిపిస్తోంది.