Nallamala : నల్లమల అడవులు, దక్షిణ భారతదేశంలోని విలువైన బయో డైవర్సిటీ ప్రాంతంగా పరిగణించబడుతున్న ఈ ప్రాంతం ఆంధ్రప్రదేశ్‌, తెలంగాణ రాష్ట్రాల్లో మొత్తం 3,040.74 చదరపు కిలోమీటర్ల విస్తీర్ణంలో విస్తరించి ఉంది. పులుల సంరక్షణకు ఇది ముఖ్య కేంద్రంగా మారింది. గతేడాది జాతీయ పులుల సంరక్షణ ప్రాధికార సంస్థ (NTCA) నిర్వహించిన గణన ప్రకారం, నల్లమల ప్రాంతంలో మొత్తం 87 పులులు ఉన్నట్లు గుర్తించబడింది. అయితే, ఈ ఏడాది నిర్వహించిన సాధారణ గణనలో పులుల సంఖ్య 90కి పెరిగిందని అటవీ శాఖ అధికారిక లెక్కలు చెబుతున్నాయి. ఇది పులుల అభివృద్ధికి, సంరక్షణ చర్యల విజయానికి నిదర్శనంగా నిలిచింది.
Read Also: Financial Secrets : ఈ ఆర్థిక రహస్యాలను ఎవరితోనూ పంచుకోకండి
ఈ నేపథ్యంలో, పులుల రక్షణకు మరింత ఆధునిక టెక్నాలజీ వినియోగానికి అధికారులు రంగంలోకి దిగారు. తాజాగా డ్రోన్లు నల్లమల అడవుల్లో వినియోగంలోకి తీసుకువచ్చారు. పులులు సంచరించే ప్రాంతాలను గుర్తించి, నిరంతర పర్యవేక్షణ చేస్తున్నట్లు ఆత్మకూరు డివిజన్ డిప్యూటీ డైరెక్టర్ సాయిబాబా తెలిపారు. మే 28వ తేదీన నాగలూటి రేంజ్ పరిధిలోని కెమెరా ట్రాప్ ద్వారా 132 నంబరు ఆడ పులి గుర్తించబడింది. ఈ పులి వేటగాళ్ల ఉచ్చులో చిక్కి తృటిలో ప్రాణాలతో బయటపడింది. ఈ ఘటన అనంతరం, అటవీ శాఖ అధికారులు రుద్రకోడూరు బీట్ ప్రాంతంలో రెస్క్యూ ఆపరేషన్‌ చేపట్టారు. చివరకు జూలై 6న పులిని పట్టుకుని వైద్యం అందించారు. ప్రస్తుతం తిరుపతి జూ పార్కులో చికిత్స పొందుతున్న ఈ పులిని పూర్తిగా కోలుకున్న తర్వాత తిరిగి నల్లమల అడవిలోకి వదిలే అవకాశముందని సమాచారం. ఇంకా, మే నెలలో శ్రీశైలం రేంజ్ పరిధిలో ఓ పెద్ద పులి జనావాసాల ప్రాంతాల్లో సంచరించినట్లు అధికారులు గుర్తించారు. దీనిని టి-82గా గుర్తించి, అది అనారోగ్యంతో బాధపడుతుందని తేల్చారు. ఈ పులి ఆచూకీ కోసం ప్రస్తుతం డ్రోన్ల సహాయంతో విస్తృతంగా గాలింపు చేపడుతున్నారు.
అటవీ శాఖ అధికారులు ప్రస్తుతం మూడు అధునాతన డ్రోన్లను నల్లమలలో ఉపయోగిస్తున్నారు. ఈ డ్రోన్లు 5-6 కిలోమీటర్ల పరిధిలో జంతువుల కదలికలను గుర్తించగలవు. పులుల ఆచూకీ తెలిసిన వెంటనే, రెస్క్యూ బృందం అక్కడికి చేరుకుని మత్తు మందులు ఇచ్చి చికిత్స అందిస్తుంది. డ్రోన్ల వినియోగం వల్ల ఎటువంటి మానవ జోక్యం లేకుండా వేగంగా స్పందించగలగటం అనేది ప్రధాన ప్రయోజనం. పులులు సంచరించే ప్రాంతాల్లో ప్రత్యేక కెమెరా ట్రాప్‌లు రహదారుల ఇరువైపులా చెట్లకు 40 సెం.మీ.ల ఎత్తులో అమర్చుతున్నారు. ఈ కెమెరాలు 15 సెకన్ల వ్యవధిలో మళ్లీ రీ-సెట్‌ అవుతూ, సంచారంలో ఉన్న జంతువుల ఫొటోలు తీయగలవు. ఇది సంరక్షణ చర్యలకు సహాయపడుతోంది. నల్లమల అడవుల్లో పులుల సంఖ్య పెరుగుతున్న నేపథ్యంలో అటవీ శాఖ మరింత పకడ్బందీ చర్యలు తీసుకుంటోంది. గాయపడిన, అనారోగ్యంతో ఉన్న పులులను గుర్తించి చికిత్స చేయడం, వేటగాళ్ల ఉచ్చులను తొలగించడం, ప్రజలకు అవగాహన కల్పించడం వంటి కార్యక్రమాలు వేగంగా కొనసాగుతున్నాయి. ఇలాంటివి పులుల భవిష్యత్‌ ప్రణాళికకు నాంది పడుతున్నాయని, త్వరలో మరిన్ని పులులు ఈ అడవుల్లో సంచరించే రోజులు త్వరలోనే వస్తాయని అధికారులు నమ్మకం వ్యక్తం చేస్తున్నారు.
Read Also: Hyderabad : కల్తీ కల్లు తాగి 11 మందికి అస్వస్థత