KCR : సొంతంగా ఫ్లైట్ కొంటున్న గులాబీ బాస్…దేశవ్యాప్త పర్యటనకు రెడీ..!!

Kcr

తెలంగాణ సీఎం కేసీఆర్…జాతీయ పార్టీ ఏర్పాటుకు సన్నద్ధం అవుతున్న సంగతి తెలిసిందే. ఈ నేపథ్యంలో టీఆర్ఎస్ గురువారం ఓ కీలక నిర్ణయం తీసుకున్నట్లు మీడియాలో వార్తలు చక్కర్లు కొడుతున్నాయి. గులాబీ బాస్ కోసం ప్రత్యేకంగా ఒక చార్టెడ్ ఫ్లైట్ కొనుగోలు చేసే ఆలోచనలో ఉన్నట్లు తెలుస్తోంది. దీనికోసం రూ. 80కోట్లు వెచ్చించేందుకు కారు పార్టీ సిద్థమైంది. 12 సీట్లతో కూడిన ఈ ఫ్లైట్ కొనుగోలుకు సంబంధించి దసరా రోజున ఆర్డర్ ఇవ్వాలని పార్టీ నిర్ణయించిందట. అదే రోజు కొత్త పార్టీ ప్రకటన..తర్వాత స్పెషల్ ఫ్లైట్ కొనుగోలుకు పార్టీ ఆర్డర్ ఇస్తుందట.

ఇక పార్టీకి సంబంధించిన ఖజానాలో 865కోట్లు ఉన్నాయట. అయితే ఈ విమానం కొనుగోలు చేసేందుకు విరాళాలు సేకరించాలని నిర్ణయించారట. ఇప్పటికే పలువురు నేతలు తాము విరాళాలు ఇస్తామంటూ పోటీ పడుతున్నారని సమాచారం. ఈ ఫ్లైట్ కొనుగోలు చేసి దేశవ్యాప్తంగా సుడిగాలి పర్యటన చేయనున్నట్లు తెలుస్తోంది. ఈ విమానం కొనుగోలు చేసినట్లయితే…సొంత విమానం ఉన్న రాజకీయ పార్టీగా టీఆర్ఎస్ గుర్తింపు లభించనుంది.