TG High Court : రాష్ట్ర రాజకీయం లో కలకలం రేపిన కాళేశ్వరం లిఫ్ట్ ఇరిగేషన్ ప్రాజెక్టు అవకతవకల కేసుపై హైకోర్టు కీలక నిర్ణయం తీసుకుంది. జస్టిస్ పీసీ ఘోష్ నేతృత్వంలోని కమిషన్ సమర్పించిన నివేదిక ఆధారంగా ఎలాంటి కార్యాచరణ చేపట్టవద్దని తెలంగాణ ప్రభుత్వాన్ని హైకోర్టు ఆదేశించింది. ఈ మేరకు మధ్యంతర ఉత్తర్వులను జారీ చేసింది. ఈ ఉత్తర్వులతో బీఆర్ఎస్ పార్టీ అధినేత, మాజీ ముఖ్యమంత్రి కల్వకుంట్ల చంద్రశేఖర్ రావు (కేసీఆర్), మాజీ మంత్రి హరీశ్ రావుకు తాత్కాలికంగా ఊరట లభించినట్లయింది. వీరిద్దరూ హైకోర్టును ఆశ్రయించి, తమపై కమిషన్ నివేదిక ఆధారంగా ప్రభుత్వం చర్యలు తీసుకోకుండా ఆదేశించాలని కోరుతూ పిటిషన్ దాఖలు చేశారు. ఈ పిటిషన్ను విచారించిన న్యాయస్థానం, కమిషన్ నివేదిక ఆధారంగా పరిపాలనా చర్యలు చేపట్టడాన్ని తాత్కాలికంగా నిలిపివేసింది.
Read Also: PM Modi : భారత్ తయారు చేసిన చిన్న చిప్ ప్రపంచాన్ని మార్చే శక్తి కలిగి ఉంది: ప్రధాని మోడీ
విచారణ సందర్భంగా రాష్ట్ర ప్రభుత్వం తరఫున అడ్వొకేట్ జనరల్ (ఏజీ) కోర్టులో వాదనలు వినిపించారు. ఆయన మాట్లాడుతూ, కాళేశ్వరం ప్రాజెక్టులో చోటుచేసుకున్న అవకతవకలపై కేంద్ర దర్యాప్తు సంస్థ (CBI) విచారణ జరిపించాలని ప్రభుత్వం నిర్ణయించిందని తెలిపారు. దీనికి సంబంధించి ఇప్పటికే అవసరమైన ప్రక్రియలు ప్రారంభమైనట్లు కోర్టును ఏజీ ఆవగాహనకు తీసుకొచ్చారు. అయితే, సీబీఐ దర్యాప్తు మరియు జస్టిస్ ఘోష్ కమిషన్ నివేదిక రెండు వేర్వేరు అంశాలుగా కొనసాగుతున్నాయని స్పష్టం చేశారు. కమిషన్ నివేదిక ఆధారంగా చర్యలు తీసుకోవడం కోసం ప్రభుత్వం ప్రయత్నించడం లేదని, అది పరిపాలనా దిశగా మాత్రమే ఉన్న విషయమని కోర్టుకు వివరించారు. ఇరుపక్షాల వాదనలు విన్న హైకోర్టు, ఈ అంశంపై లోతైన విచారణ అవసరమన్న అభిప్రాయాన్ని వ్యక్తం చేసింది. వెకేషన్ అనంతరం విచారణ కొనసాగించాలని తీర్పు తెలిపింది. తదుపరి విచారణను అక్టోబర్ 7వ తేదీకి వాయిదా వేసింది. ఈ విచారణ జరిగేంతవరకు, పిటిషనర్లపై కమిషన్ నివేదిక ఆధారంగా ఏ విధమైన చర్యలు తీసుకోరాదని స్పష్టంగా పేర్కొంది. ఈ మధ్యంతర ఉత్తర్వులతో కేసీఆర్, హరీశ్ రావు బలమైన న్యాయరక్షణ పొందినట్లయింది.
కాళేశ్వరం ప్రాజెక్టు గత కొన్నేళ్లుగా వివాదాస్పదంగా మారిన విషయం తెలిసిందే. భారీ వ్యయంతో చేపట్టిన ఈ ప్రాజెక్టు పనుల్లో అనేక అసంగతాలు చోటుచేసుకున్నాయన్న ఆరోపణల నేపథ్యంలో ప్రభుత్వం జస్టిస్ ఘోష్ నేతృత్వంలో విచారణ కమిషన్ను ఏర్పాటు చేసింది. ఇటీవల ఆ కమిషన్ తన నివేదికను రాష్ట్ర ప్రభుత్వానికి సమర్పించింది. దానిపై చర్యలు తీసుకోవడంలో ప్రభుత్వం ముందుకు సాగుతుందన్న సంకేతాలు వెలువడిన వేళ, కేసీఆర్, హరీశ్ రావు కోర్టును ఆశ్రయించడంపై సర్వత్రా దృష్టి కేంద్రీకృతమైంది. ఈ కేసు తదుపరి విచారణలో ఏమి జరుగుతుందో చూడాలి. అయితే ఇప్పటి వరకు హైకోర్టు జారీ చేసిన ఉత్తర్వులు రాజకీయ పరంగా కేసీఆర్కు ఊరటనిచ్చినవే అనే చెప్పాలి.
Read Also: AP : ఏపీలో అమల్లోకి వచ్చిన కొత్త బార్ పాలసీ